Read Iloko Exodus 28 Bible Online

Exodus 28 - Iloko bible

Exodus 28

¹“Ayabam ni Aaron a kabsatmo agraman da Nadab, Abiu, Eleazar ken Itamar nga annakna. Ilasinmo ida kadagiti Israelita tapno agserbida kaniak a kas papadi.

²Yaramidam ni Aaron kadagiti kawes ti padi tapno nadayag ken natan-ok iti imatang dagiti tattao.

³Bilinem dagiti amin a dumadait nga inikkak iti laing nga agdait nga aramidenda dagiti kawes ni Aaron a maidaton nga agserbi kaniak a kas padi.

⁴Dagitoy ti daitenda: pektoral, efod, kagay, nabordaan a tunika, mitra ken barikes. Yaramidanda ni Aaron ken dagiti annakna kadagiti nasagradoan a kawes tapno makapagserbida kaniak a kas padi.

⁵Balitok, asul, ube ken nalabaga a de lana, ken nafino a linen ti usaren dagiti sastre.

⁶“Balitok, asul, ube ken nalabaga, ken nafino a linen a nabordaan ti aramidenda nga efod.

⁷Paikkam iti dua a terante a pakaikaptanna ken agsilpo ti pungtoda.

⁸Maysa a barikes a napintas ti pannakaabelna a naaramid iti isu met la a material ti maikapet iti efod tapno sangsangkamaysada a piesa.

⁹Mangalaka iti dua a bato a karnelia ket ikitikitmo kadagitoy ti nagan dagiti annak ni Jacob,

¹⁰segun ti panagsasarunoda a nayanak. Saggi-innem a nagan ti maikitikit iti tunggal bato.

¹¹Ipaaramidmo daytoy iti nalaing a platero; maimontar dagiti bato iti balitok.

¹²Ikabilmo dagitoy bato kadagiti terante ti efod a pakakitaan kadagiti tribu ti Israel. Iti kastoy, awiten ni Aaron dagiti naganda iti abagana tapno, siak, ni Yahweh, kanayon a malagipko dagiti tattaok.

¹³Mangaramidka met iti dua a pagmontaran a balitok

¹⁴ken dua a kawar iti puro a balitok. Taliam daytoy a kawar a kas kordon ket igalutmo kadagiti pagmontaran.

¹⁵“Mangaramidka iti pektoral nga usaren ti Kangatoan a Padi tapno maammoan ti pagayatan ti Dios. Kas iti efod, masapul a maaramid met iti asul, ube ken nalabaga a de lana, ken nafino ti pannakaabelna a linen.

¹⁶Kuadrado, 9 a pulgada ti kaatiddog ken 9 a pulgada ti kaakabana ken makupin iti nagtenggaanna.

¹⁷Imontarmo iti daytoy ti uppat nga intar a napateg a bato. Iti umuna a batog, imontarmo ti rubi, topasio ken garnet;

¹⁸iti maikadua, esmeralda, safiro ken diamante;

¹⁹iti maikatlo, hasinto, agate ken amatista,

²⁰ken iti maikapat, berilio, karnelia ken jaspe. Maimontar dagitoy iti balitok.

²¹Iti tunggal bato maikitikit ti nagan dagiti annak ni Jacob a mangibagi kadagiti sangapulo ket dua a tribu ti Israel.

²²Mangaramidka iti kawar a puro a balitok. Taliem a kas kordon ket ikabitmo iti pektoral.

²³Mangaramidka met iti dua nga argolia a balitok ket ikapetmo kadagiti akingngato a suli ti pektoral,

²⁴ket igalutmo dagiti kordon a balitok kadagiti dua nga argolia.

²⁵Igalutmo met dagiti dua a murdong ti kordon a balitok kadagiti dua a pagmontaran. Iti kasta, maikamangda iti sango iti terante ti efod.

²⁶Mangaramidka met iti dua nga argolia a balitok a maikapet kadagiti akimbaba a suli ti pektoral, iti akin-uneg a pingir iti asideg ti efod.

²⁷Mangaramidka pay iti dua nga argolia a balitok a maikapet iti akimbaba a paset iti sango dagiti dua a terante ti efod, iti asideg ti nagtupian ken ngatoen ti napintas ti pannakaabelna a barikes.

²⁸Galutam dagiti argolia ti pektoral ken dagiti argolia ti efod iti asul a kordon, tapno agsaad ti pektoral iti ngatoen ti barikes ket saan nga agsina.

²⁹“No sumrek ni Aaron iti Nasantoan a Disso, aramatenna ti pektoral a nakaikitikitan dagiti nagan dagiti tribu ti Israel tapno, siak, ni Yahweh, kanayon a malagipko dagiti tattaok.

³⁰Ikapetmo iti pektoral ti Urim ken Tummim tapno awiten ida ni Aaron no dumatag iti nasantoan nga imatangko. Tunggal sumrek iti Nasantoan a Disso, masapul nga aramatenna daytoy a pektoral tapno maammoanna ti kayatko kadagiti Israelita.

³¹“Asul a de lana ti aramidem a kagay a rutap ti efod.

³²Putolam tapno pakayusokan ti ulo. Palikmutam ti putol iti inabel nga arubite tapno saan a nalaka a mapisang.

³³Iti met aglikmut ti gayadan ti kagay, bitinam kadagiti sinan-bunga ti granada a de lana nga asul, ube ken nalabaga, ken baetbaetam iti kampanilia a balitok.

³⁵Usaren ni Aaron daytoy a kagay iti panagserbina a kas padi. No sumrek iti Nasantoan a Disso tapno dumatag kaniak wenno rummuar sadiay, mangngeg ti uni dagiti kampanilia. Iti kasta, saan a mapapatay ni Aaron.

³⁶“Mangaramidka iti arkos a puro a balitok a nakaikitikitan iti daytoy: ‘Naidaton ken ni Yahweh.’

³⁷Singdanam daytoy iti asul ket ikapetmo iti parupa ti mitra.

³⁸Ikabil ni Aaron daytoy iti mugingna, tapno siak, ni Yahweh, awatek dagiti amin nga idaton kaniak dagiti Israelita uray agbiddut dagiti tattao iti aniaman nga idatagda.

³⁹“Mangabelka iti tunika a nafino a linen nga agpaay ken ni Aaron. Nafino a linen ti aramidem a mitra ken barikes a nabordaan.

⁴⁰“Aramidem dagiti tunika, barikes ken kallugong dagiti annak ni Aaron tapno nadayag ken natan-okda iti imatang dagiti tattao.

⁴¹Ikawesmo dagitoy ken ni kabsatmo nga Aaron ken kadagiti annakna. Kalpasanna, ordenam ida babaen iti pananglanam iti uloda tapno agserbida kaniak a kas papadi.

⁴²Yaramidam ida iti sapin a linen a dumanon iti luppo tapno saanda a lamolamo.

⁴³Masapul a kanayon nga usaren ni Aaron dagitoy ken dagiti annakna no sumrekda iti Toldak wenno umasidegda iti altar nga agserbi a kas padi iti Nasantoan a Disso tapno dida agbasol ket mapapatayda. Agnanayon daytoy nga alagaden ni Aaron ken dagiti kaputotanna.