Read Iloko Exodus 29 Bible Online

Exodus 29 - Iloko bible

Exodus 29

¹“Kastoy ti panangordenmo ken ni Aaron ken kadagiti annakna nga agserbi kaniak a kas papadi. Mangalaka iti bumaro a baka ken dua a kalakian a karnero nga awan depektona.

²Mangalaka met ti kasayaatan nga arina ti trigo nga awan lebadurana ket agaramidka kadagiti tinapay nga adda lanana ken awan lanana, agraman kadagiti naiingpis a bibingka a mapulagidan iti lana.

³Ibasketmo dagitoy ket idatonmo agraman ti baka ken dagiti dua a karnero.

⁴“Ipanmo ni Aaron ken dagiti annakna iti ruangan ti Tolda ti Dios ket digosem ida kas alagaden ti linteg.

⁵Kalpasanna, ikawesmo ken ni Aaron dagiti arwaten ti padi—ti tunika, ti efod, ti kagay a mairutap iti efod, ti pektoral agraman ti barikes.

⁶Ikabilmo ti turban iti ulona ket igalutmo ti nasagradoan nga arkos a nakaikitikitan ti ‘Naidaton iti Apo.’

⁷Alaem ti lana a pagkonsagrar ket patedtedam ti ulo ni Aaron tapno makonsagrar.

⁸“Yegmo dagiti annakna ket kawesam ida iti tunika.

⁹Ikabilmo dagiti barikesda ken dagiti kallugongda. Kastoy ti panangordenmo ken ni Aaron ken dagiti annakna. Agserbidanto kaniak ken dagiti kaputotanda a kas papadi iti agnanayon.

¹⁰“Ipanmo ti baka iti sangoanan ti Tolda ti Dios ket ibagam ken ni Aaron ken kadagiti annakna nga ipatayda dagiti imada iti ulona.

¹¹Partiem ti baka iti nasantoan nga imatangko iti pagserkan ti Tolda.

¹²Mangalaka iti darana, ket isawsawmo ta tammudom samo ipulagid kadagiti sinan-sara ti altar. Kalpasanna, ibuyatmo ti natda a dara iti puon ti altar.

¹³Alaem ti amin a taba a nangbungon kadagiti lalaem, ti taba iti dalem ken dagiti dua a bekkel agraman tabada. Puoram dagitoy iti rabaw ti altar a daton kaniak.

¹⁴Ngem puoram ti lasag, kudil ken dagiti lalaem ti baka iti ruar ti kampo. Daytoy ti daton a mangikkat kadagiti basol dagiti papadi.

¹⁵“Alaem ti maysa kadagiti kalakian a karnero ket ibagam ken ni Aaron ken kadagiti annakna nga ipatayda dagiti imada iti ulona.

¹⁶Partiem ket ibuyatmo ti darana kadagiti sikigan ti altar.

¹⁷Rangrangkayem ti karnero. Buggoam dagiti lalaemna ken dagiti sakana ket iparabawmo dagitoy kadagiti narangrangkay a paset agraman ulona.

¹⁸Puoram ti sibubukel a karnero iti rabaw ti altar a kas daton a makan. Maragsakanak iti nabanglo nga ayamuom daytoy a daton.

¹⁹“Alaem ti maysa pay a karnero—ti karnero a maaramat iti pannakaidaton. Ibagam ken ni Aaron ken kadagiti annakna nga ipatayda dagiti imada iti ulona.

²⁰Patayem ket mangalaka iti darana samo ipulagid kadagiti kannawan a piditpiditda ken kadagiti kannawan a tangan ti ima ken sakada. Ibuyatmo ti natda a dara iti sikigan ti altar.

²¹Mangalaka iti dara nga adda iti rabaw ti altar ken lana a pagkonsagrar ket iwarsim ken ni Aaron ken iti kawesna kasta met kadagiti annakna ken kadagiti kawesda. Kastoy ti pannakaikonsagrar ni Aaron, dagiti annakna ken dagiti kawesda.

²²“Ikkatem ti taba ti karnero, ti nataba nga ipusna, ti taba a nangbalkot kadagiti lalaem, ti taba iti dalem, dagiti dua a bekkel agraman dagiti tabada ken ti akinkannawan a luppo.

²³Manipud iti basket a yan dagiti tinapay a naidaton kaniak, mangalaka iti maysa a tinapay nga adda lanana, maysa a tinapay nga awan lanana ken maysa a bibingka.

²⁴Ipaiggemmo dagitoy ken ni Aaron ken kadagiti annakna ket idatonda kaniak a kas naisangsangayan a sagut.

²⁵Kalpasanna, alaem dagitoy kadakuada samo puoran iti altar, iti rabaw ti daton a mapuoran a kas daton a makan a maidatag kaniak. Maragsakanak iti ayamuom daytoy a daton.

²⁶“Alaem ti barukong daytoy a karnero ket idatonmo kaniak a kas naisangsangayan a sagut. Kukuam daytoy a paset ti animal.

²⁷No maordenan ti maysa a padi idatonda kaniak ti barukong ken ti luppo ti karnero a mausar iti seremonia ti pannakaorden, maidatonda kaniak a kas naisangsangayan a sagut daytoy ket mailasinda para kadagiti papadi.

²⁸Agnanayon a bilinko a no mangidatag dagiti tattaok iti datonda a pakikappia, kukua dagiti papadi dagiti barukong ken luppo ti animal. Daytoy ti sagut dagiti tattao kaniak, ni Yahweh.

²⁹“Inton matay ni Aaron, maited dagiti pagan-anayna a kas padi kadagiti annakna tapno usarenda iti pannakaordenda a kas papadi.

³⁰Pito nga aldaw nga usaren ti anak ni Aaron a sumukat kenkuana a padi dagiti kawes no sumrek iti Tolda ti Dios tapno agserbi iti Nasantoan a Disso.

³¹“Alaem ti karnero a nausar iti pannakaorden ni Aaron ken dagiti annakna ket angrem iti nasagradoan a lugar.

³²Iti ruangan ti Tolda ti Dios ti pangananda iti karne ken iti tinapay nga adda iti basket.

³³Masapul a kanenda dagiti naaramat iti seremonia ti pannakapakawan bayat ti pannakaordenda. Dagiti laeng papadi ti mangan iti daytoy agsipud ta nasantoan.

³⁴No adda matda a karne wenno tinapay agingga iti bigat, masapul a mapuoran. Saan a kanen agsipud ta nasantoan.

³⁵“Pito nga aldaw nga annongem ti pannakaorden ni Aaron ken dagiti annakna iti wagas nga imbilinko kenka.

³⁶Inaldaw a masapul a mangidatonka iti toro a baka a kas sakrifisio tapno mapakawan ti basol. Daytoy ti mangdalus iti altar iti imatang ti linteg. Kalpasanna, lanaam ti altar tapno agbalin a nasantoan.

³⁷Inaldaw nga aramidem daytoy iti las-ud ti pito nga aldaw. Iti kasta, naan-anayton a nasantoan ti altar, ket siasinoman wenno aniaman a mangsagid iti altar, madangranto babaen iti pannakabalin ti kinasantona.

³⁸“Dagitoyto ti inaldaw nga idatagmo iti altar iti agnanayon: dua nga urbon ti karnero a maysa ti tawenda.

³⁹Idatonmo ti maysa iti agsapa ket ti sabali iti sumipnget.

⁴⁰Pakuyogam ti umuna a daton iti maysa a kilogramo a nafino nga arina ti trigo a nalaokan iti sangalitro a puro a lana ti olibo, agraman maysa a litro nga arak a kas daton nga inumen.

⁴¹Pakuyogam met ti maikadua a daton iti isu met laeng ti kaadu ti arina, lana ti olibo ken arak a kas iti maidatag iti bigat. Daytoy ti daton a makan a maidatag kaniak, ni Yahweh, ket maragsakanak iti ayamuomna.

⁴²Iti amin a tiempo iti masakbayan, maidatag daytoy daton a mapuoran iti imatangko iti ruangan ti Tolda ti Dios. Sadiay ti pangsarakak kadagiti tattaok ken pakiumanak kenka.

⁴³Sadiay ti pangsarakak kadagiti Israelita ket agbalinto a sagrado dayta a lugar gapu iti kaaddak.

⁴⁴Pagbalinekto a sagrado ti Tolda ti Dios agraman ti altar, ket ikonsagrarko ni Aaron ken dagiti annakna tapno agserbida kaniak a kas papadi.

⁴⁵Agtaengakto iti sidong dagiti Israelita ket siakto ti Diosda.

⁴⁶Maammoandanto a siak ni Yahweh a Diosda a nangiruar kadakuada idiay Egipto tapno agnaedak iti sidongda. Siak ni Yahweh a Diosda.