Read Iloko Exodus 3 Bible Online

Exodus 3 - Iloko bible

Exodus 3

¹Ay-aywanan idi ni Moises dagiti karnero ken kalding ni Jetro a katuganganna a padi ti Midian. Impanna ti arban iti labes ti let-ang ket dimteng idiay Horeb a bantay ti Dios.

²Sadiay, nagparang kenkuana ti anghel ni Yahweh a kas gumilgil-ayab nga apuy nga aggapu iti tengnga ti bassit a kayo. Nakita ni Moises a sumsumged ti kayo ngem saan a marunot.

³Kinunana iti nakemna, “Nakaskasdaaw daytoy. Apay ngata a saan a mauram ti kayo? Umasidegak man ta kitaek.”

⁴Idi makita ni Yahweh nga umas-asideg ni Moises, inawaganna manipud iti tengnga ti kayo. “Moises, Moises!” kinunana. “Adtoyak,” insungbat ni Moises.

⁵“Dika umas-asideg,” kinuna ti Dios. “Ikkatem ta pallokam ta nasantoan ti daga a pagtaktakderam.

⁶Siak ti Dios ti amam—da Abraham, Isaac ken Jacob.” Liningdan ni Moises ti rupana ta mabuteng a kumita iti Dios.

⁷Kinuna ni Yahweh, “Nakitak ti nakakaasi a kasasaad dagiti tattaok idiay Egipto. Nangngegko ti panagdawatda iti tulong gapu iti pannakaparparigatda. Wen, ammok dagiti sagsagabaenda.

⁸Bimmabaak tapno ispalek ida kadagiti Egipcio. Iruarko ida iti dayta a daga ket ipanko ida iti daga a nadam-eg ken nalawa. Nabaknang ken nabunga daytoy a daga a pagnanaedan ita dagiti Cananeo, Heteo, Amorreo, Perezeo, Heveo ken Jebuseo.

⁹Wen, nangngegko ti asug dagiti tattaok ket makitak ti panangparparigat dagiti Egipcio kadakuada.

¹⁰Ita, ibaonka iti ari tapno iruarmo dagiti tattaok nga Israelita manipud Egipto.”

¹¹Kinuna ni Moises iti Dios, “Nanumoak laeng a tao. Kasano a mapanak iti ari tapno iruarko dagiti Israelita iti Egipto?”

¹²“Addaakto kenka,” insungbat ti Dios, “ket daytoyto ti pagilasinan a siak ti nangibaon kenka: Inton mairuarmo dagiti tattaok iti Egipto, agdaydayawkayto kaniak ditoy a bantay.”

¹³Kinuna ni Moises, “Inton innak kadagiti Israelita ket ibagak kadakuada nga imbaonnak ti Dios dagiti kapuonanda, ket saludsodenda ti naganmo, ania ti ibagak?”

¹⁴Kinuna ti Dios, “Siak ti siak. Daytoy ti ibagamto kadagiti Israelita, ‘Imbaonnak ti mangawag iti bagina iti SIAK.’

¹⁵Ibagamto kadagiti Israelita, a siak ni Yahweh a Dios dagiti kapuonanyo, ti Dios da Abraham, Isaac ken Jacob, imbaonka kadakuada. Daytoy ti naganko iti agnanayon. Isunto ti pangawag kaniak dagiti amin a kaputotan.

¹⁶Inka ummongen dagiti pangulo ti Israel ket ibagam kadakuada a nagparang kenka ni Yahweh a Dios dagiti kapuonanyo, ti Dios da Abraham, Isaac ken Jacob. Ibagam a naimatanganna ti kasasaadyo ken ti ar-aramiden dagiti Egipcio kadakayo.

¹⁷Inkeddengko nga iruarko ida idiay Egipto ket ipanko ida iti daga dagiti Cananeo, Heteo, Amorreo, Perezeo, Heveo ken Jebuseo. Nadam-eg ken nabunga dayta a daga.

¹⁸“Ipangagto dagiti tattaok ti saom. Kalpasanna, kakuyogmonto dagiti pangulo ti Israel a mapan iti ari ti Egipto ket kunayonto kenkuana, ‘Nakisao kadakami ni Yahweh a Dios dagiti Hebreo. Palubosannakami koma a mapan idiay let-ang iti tallo nga aldaw tapno agidatagkami iti daton ken ni Yahweh a Diosmi.’

¹⁹Ammok a dinakayto palubosan ti ari malaksid no mapilit.

²⁰Ngem usarekto ti pannakabalinko ket dusaekto ti Egipto; nakabutbutengto dagiti aramidek sadiay. Kalpasan dayta, palubosannakayton.

²¹“Itan-okkonto dagiti tattaok tapno raemen ida dagiti Egipcio ket inton pumanawda, saandanto nga ima-ima.

²²Mapanto ti tunggal babai nga Israelita iti babai nga agnaed iti balay ti kaarrubana nga Egipcio ket dumawat iti pagan-anay ken alahas a pirak ken balitok. Yarruatdanto dagitoy kadagiti annakyo. Kastoyto ti panangalada iti kinabaknang dagiti Egipcio.”