Read Iloko Exodus 30 Bible Online

Exodus 30 - Iloko bible

Exodus 30

¹“Mangaramidka iti altar nga akasia a pagpuoran iti insenso.

²Kuadrado ti altar ket 18 a pulgada ti kaatiddog ken kaakabana ken 36 a pulgada ti kangatona. Ikkam iti sinan-sara iti tunggal sulina ket sangkanayonda iti altar.

³Kalupkopam iti puro a balitok ti rabawna, dagiti uppat a sikiganna ken dagiti sinan-sara. Paikingam ti aglikmut iti balitok.

⁴Yaramidam iti dua a balitok nga argolia ket ikapetmo iti baba dagiti agsumbangir nga ikingna a pakayusokan dagiti assiw a pangawit iti altar.

⁵Aramidem dagitoy nga assiw iti kayo nga akasia ket kalupkopam ida iti balitok.

⁶Ikabilmo daytoy nga altar iti ruar ti kurtina iti sango ti Lakasa ti Tulag. Daytoy ti lugar a pangsarungkarak kadakayo.

⁷Tunggal bigat a mapan estimaren ni Aaron dagiti pagsilawan, masapul nga agpuor iti nabanglo nga insenso iti rabawna.

⁸Kasta manen ti aramidenna iti sumipnget no gangtanna dagiti pagsilawan. Agtultuloyto nga agnanayon ti pannakapuor ti insenso.

⁹Diyo idaton iti rabaw ti altar ti maiparit nga insenso, ti daton nga animal a mapuoran wenno ti daton a makan ket diyo ibukbok iti rabawna ti daton nga inumen.

¹⁰Maminsan iti tunggal tawen nga aramiden ni Aaron ti seremonia ti pannakadalus ti altar: kadagiti sinan-sara ipulagidna ti dara ti animal a maidaton gapu iti basol. Masapul a maaramid daytoy iti tinawen iti amin a tiempo. Masapul a naan-anay a sagrado daytoy nga altar a naidaton kaniak, ni Yahweh.”

¹¹Kinuna ni Yahweh ken ni Moises,

¹²“Inton alaem ti bilang dagiti tattao ti Israel, masapul a mangited kaniak ti tunggal tao iti kuarta a gatad ti biagna tapno awan dakes a mapasamak kenkuana bayat ti pannakaala ti sensus.

¹³Amin a mairaman iti sensus ket masapul a bayadanna ti naituding a gatad, kas mayannurot iti naituyang a pagtimbangan. Agbayad ti tunggal maysa nga agpaay a daton ken ni Yahweh.

¹⁴Tunggal maysa a mailista nga agtawen iti duapulo wenno nasursurok pay, masapul a bayadanna kaniak daytoy a gatad.

¹⁵Nabaknang man wenno napanglaw—agpada ti itedda a gatad a kas pangsubbot iti biagda.

¹⁶Kolektaem daytoy a kuarta kadagiti Israelita, ket isu ti magasto kadagiti kasapulan iti Tolda. Daytoy ti buis a pagbayadda iti biagda, ket laglagipek a salakniban ida.”

¹⁷Kinuna ni Yahweh ken ni Moises,

¹⁸“Mangaramidka iti bronse a palanggana nga adda bronse a batayna. Ikabilmo iti nagbaetan ti Tolda ti Dios ken ti altar ket kargaam iti danum.

¹⁹Daytoy ti usaren ni Aaron ken dagiti annakna a pangbuggo kadagiti ima ken sakada

²⁰sakbay a sumrekda iti Tolda ti Dios wenno umasidegda iti altar a mangidatag iti daton a makan. Iti kasta, saanda a mapapatay.

²¹Masapul a buggoanda dagiti ima ken sakada tapno saanda a matay. Annurotenda daytoy nga alagaden iti agnanayon, isuda ken dagiti kaputotanda.”

²²Kinuna ni Yahweh ken ni Moises,

²³“Mangalaka iti kasayaatan a bangbanglo: Innem a kilogramo a tubbog ti mirra, sagtatallo a kilogramo a nabanglo a sinamon ken nabanglo a kanela,

²⁴ken innem a kilogramo a kasia (matimbang amin dagitoy segun ti naituyang a pagtimbangan). Laokam iti uppat a litro a lana ti olibo.

²⁵Mangaramidka iti nasagradoan a lana a pagkonsagrar, ket templaem a kas iti bangbanglo.

²⁶Aramatem daytoy a pangkonsagrar iti Tolda ti Dios, iti Lakasa ti Tulag,

²⁷iti lamisaan ken amin nga alikamenna, iti kandelero ken amin nga alikamenna, iti altar a pagpuoran iti insenso,

²⁸iti altar a pakapuoran dagiti daton ken amin nga alikamenna ken iti pagbuggoan agraman ti pagbatayanna.

²⁹Kastoy ti panangikonsagrarmo kadagitoy nga alikamen tapno agbalinda a naan-anay a nasagradoan ket ti siasinoman wenno aniaman a mangsagid kadagitoy, madangranto babaen iti kinasantona.

³⁰“Kalpasanna, ikonsagrarmo ni Aaron ken dagiti annakna ket ordenam ida a papadi nga agserbi kaniak.

³¹“Ibagam daytoy kadagiti Israelita, ‘Masapul a mausar daytoy nasantoan a lana a pagkonsagrar iti panagserbi kaniak iti amin a tiempo.

³²Diyo ibukbok daytoy iti gagangay a tao ket diyo tuladen ti kastoy a pannakaaramidna. Nasagradoan daytoy ket masapul nga ibilangyo a nasagradoan.

³³Saanen a maibilang a taok ti siasinoman a mangaramid iti kastoy wenno mangusar iti siasinoman a tao a saan a padi.’”

³⁴Kinuna ni Yahweh ken ni Moises, “Mangalaka kadagiti nabanglo a rekado: estakte, onitsa, galbanum ken puro nga olibanum; pagpapadaem ti kaadu ti tunggal maysa.

³⁵Aramidem dagitoy nga insenso a matempla a kas bangbanglo. Asinam tapno agtalinaed a puro ken sagrado.

³⁶Mangmekmekka iti insenso samo ipan iti Tolda ti Dios iti imatangko ket iwarakiwakmo iti sangoanan ti Lakasa ti Tulag. Ibilangmo daytoy nga insenso a naan-anay ti kinasagradona.

³⁷Diyo tuladen ti kastoy a pannakatempla iti insenso nga agpaay kadakayo. Ibilangyo daytoy a nasantoan a naidaton kaniak.

³⁸No adda mangaramid iti kastoy tapno aramatenna a bangbanglo, saanen a maibilang a maysa kadagiti tattaok.”