Read Iloko Exodus 31 Bible Online

Exodus 31 - Iloko bible

Exodus 31

¹Kinuna ni Yahweh ken ni Moises,

²“Pinilik ni Bezalel nga anak ni Uri ken apoko ni Hur a kameng ti tribu ti Juda.

³Pinunnok iti pannakabalinko, ket ita, maysa nga eksperto iti amin a kita ti aramid iti arte.

⁴Masirib nga agaramid kadagiti disenio ket kabaelanna a sukogen iti balitok, pirak ken bronse;

⁵agkorte kadagiti napateg a bato a maimontar; ken agkitikit kadagiti kayo ken dadduma pay a kita ti naarte a trabaho.

⁶Tinudengak met a tumulong kenkuana ni Oholiab nga anak ni Ahisamac, a kameng iti tribu ti Dan. Inikkak met iti naidumduma a kabaelan dagiti amin nga eksperto iti trabaho tapno maaramidda dagiti imbilinko a maaramid:

⁷ti Tolda ti Dios, ti Lakasa ti Tulag ken ti kalubna, amin nga alikamen ti Tolda,

⁸ti lamisaan ken ti amin nga alikamenna, ti kandelero a puro a balitok ken amin nga alikamenna, ti altar a pagpuoran iti insenso,

⁹ti altar a pagpuoran kadagiti daton ken amin nga alikamenna, ti pagbuggoan ken ti batayna.

¹⁰Isuda ti agaramid kadagiti arruaten ni Aaron ken dagiti annakna iti panagserbida a kas padi.

¹¹Aramidenda met ti lana a pagkonsagrar ken ti nabanglo nga insenso a maaramat iti Nasantoan a Disso. Aramidenda amin dagitoy nga alikamen nga awan surok ken kurangna kas imbilinko kenka.”

¹²Binilin ni Yahweh ni Moises

¹³nga ibagana daytoy kadagiti Israelita, “Ngilinenyo ti Aldaw a Panaginana, ta daytoy ti agserbi a pagilasinan kadakayo iti agnanayon, a siak, ni Yahweh, pinilikayo nga agbalin a tattaok.

¹⁴Nasagradoan ti Aldaw a Panaginana ket masapul a ngilinenyo. Mapapatay ti saan a mangngilin iti aldaw a panaginana ket mapagtalaw ti siasinoman nga agtrabaho iti dayta nga aldaw.

¹⁵Agtrabahokayo iti innem nga aldaw, ngem naisangsangayan ti maikapito, ta naidaton kaniak. Mapapatay ti siasinoman nga agtrabaho iti dayta nga aldaw.

¹⁶Masapul a ngilinen dagiti Israelita ti aldaw a panaginana a kas pagilasinan iti tulag.

¹⁷Agserbi daytoy a palagip kaniak ken iti entero nga Israel ket agtalinaed iti agnanayon. Ngamin, siak ni Yahweh, pinarsuak ti langit ken ti daga iti las-ud ti innem nga aldaw ket naginanaak iti maikapito nga aldaw.”

¹⁸Idi nalpasen ti pannakisao ni Yahweh ken ni Moises iti Bantay Sinai, intedna kenkuana dagiti dua a tapi a bato a nangisuratan a mismo ti Dios kadagiti bilbilin.