Read Iloko Exodus 32 Bible Online

Exodus 32 - Iloko bible

Exodus 32

¹Nabayag ni Moises iti bantay. Gapu ta di met la sumalogen, napan dagiti tattao ken ni Aaron ket kinunada kenkuana, “Saanmi nga ammo ti napasamak iti dayta a Moises a nangiruar kadakami idiay Egipto. Yaramidannakami ngarud iti dios a mangidalan kadakami.”

²Kinuna ni Aaron kadakuada, “Ummongenyo ngarud dagiti balitok nga aritos dagiti assawa ken annakyo, ket yegyo kaniak.”

³Inikkat dagiti tattao dagiti aritosda sada impan ken ni Aaron.

⁴Linunag ni Aaron dagiti aritos sana imbukbok iti sukogan ket inaramidna a sinan-toro a baka. Kinuna dagiti tattao, “Israel, daytoy ti diostayo a nangiruar kadatayo idiay Egipto.”

⁵Kalpasanna, nangaramid ni Aaron iti altar iti sango ti balitok a sinan-toro a baka sana impakaammo, “Inton bigat, agfiestatayo a kas pammadayaw iti Apo.”

⁶Kabigatanna, nagidatagda kadagiti animal sada pinuoran a kas sakrifisio. Sabali pay dagiti pinartida a sindada a kas daton a maipaay a panagkakadua. Nagpapangan ken nagiinum dagiti tattao. Naglabes ti ragragsakda, nagbabartekda ket nagkakaidda dagiti lallaki ken babbai.

⁷Kinuna ni Yahweh ken ni Moises, “Dagdagusem ti sumalog ta nagbasol dagiti tattaom nga inruarmo idiay Egipto ket tinallikudandak.

⁸Binaybay-andan ti dalan nga imbilinko a surotenda. Nangsukogda iti sinan-toro ti baka manipud iti nalunag a balitok ket inaramidda a pagdaydayawan ken pagidatonan kadagiti sakrifisio. Kunkunada a daytoy ti diosda a nangiruar kadakuada idiay Egipto.

⁹Am-ammok dagitoy a tattao ket ammok met ti kinasukirda.

¹⁰Ita, saanka a makibiang, ta gumilgil-ayab ti pungtotko kadakuada ket dadaelek ida. Ket sikanto ti pagtaudan ti maysa a dakkel a pagilian.”

¹¹Ngem nagpakpakaasi ni Moises ken ni Yahweh a Diosna ket kinunana, “Apo, apay a kapungtotmo dagiti tattaom, isuda a winayawayaam idiay Egipto babaen iti naindaklan a pannakabalinmo?

¹²No dadaelem ida, kunanto dagiti Egipcio nga inruarmo dagiti Israelita idiay Egipto gapu ta panggepmo a pukawen ida iti kabambantayan. Pagbaawem ti pungtotmo ket dimo idissuor daytoy a didigra kadagiti tattaom.

¹³Laglagipem da Abraham, Isaac ken Jacob nga adipenmo. Laglagipem ti kari a sinapataam kadakuada a paaduem ti kaputotanda a kas iti kaadu dagiti bituen ti langit ket itedmo amin daytoy a daga nga inkarim a tagikuaenda iti agnanayon.”

¹⁴Nagbabawi ni Yahweh ket dina indissuor ti didigra nga impangtana nga ipalak-am kadagiti tattaona.

¹⁵Nagsubli ni Moises ket simmalog iti bantay. Iggemna dagiti dua a tapi a bato a nakaisuratan dagiti bilin.

¹⁶Mismo a ti Dios ti nangaramid kadagiti tapi ket inkitikitna dagiti bilin iti agsumbangirda.

¹⁷Nangngeg ni Josue ti ariwawa dagiti tattao ket kinunana ken ni Moises, “Mangngegko ti ikkis dagiti aggugubat iti kampo.”

¹⁸Kinuna ni Moises, “Saan nga ikkis dagiti nagballigi wenno dung-aw dagiti naparmek ti mangngegko no di ket kankanta.”

¹⁹Addan ni Moises iti arisadsad ti bantay. Idi asidegen iti kampo ket makitana ti sinan-toro a baka ken dagiti tattao nga agsasala, simged ti pungtotna. Sadiay, imbarsakna dagiti tapi nga ig-iggamanna ket naburburakda.

²⁰Innalana ti inaramidda a sinan-urbon ti baka, linunagna, tinumtumekna ket inlaokna iti danum sana impainum kadagiti Israelita.

²¹Kinunana ken ni Aaron, “Ania aya ti inaramid kenka dagitoy a tattao ta pinalubosam ida nga agaramid iti nadagsen a basol?”

²²Insungbat ni Aaron, “Dinak koma kapungtot, apo. Ammom a napigsa ti tarigagayda nga agaramid iti dakes.

²³Kinunada kaniak, ‘Dimi ammo ti napasamak iti dayta a Moises a nangiruar kadakam idiay Egipto. Yaramidannakami ngarud iti dios a mangidalan kadakami.’

²⁴Imbagak kadagiti adda alahasna a balitok nga itedda kaniak dagitoy. Tinunawko dagiti alahas ket daytoy sinan-toro a baka ti nagbalinanna.”

²⁵Naammiris ni Moises a pinalubosan ni Aaron dagiti tattao nga aglablabesda ket nagbalinda a maag iti imatang dagiti kabusorda.

²⁶Nagtakder ngarud ni Moises iti ruangan ti kampo ket impukkawna, “Umay ditoy ti amin a sumurot iti Apo!” Napan dagiti amin a Levita iti yanna,

²⁷ket kinunana kadakuada, “Imbilin ti Apo a Dios ti Israel nga alaenyo ti kampilanyo sayo dakiwasen ti entero a kampo, manipud ditoy agingga iti sabali a ruangan ket patayenyo amin a makitayo—kakabsatyo man wenno gagayyemyo wenno kaarrubayo.”

²⁸Nagtungpal dagiti Levita ket pinapatayda ti agarup 3,000 a lallaki iti dayta nga aldaw.

²⁹Kinuna ni Moises kadagiti Levita, “Ita nga aldaw, indatonyo dagiti bagbagiyo a kas papadi iti panagserbi iti Apo gapu iti panangpapatayyo kadagiti annakyo ken dagiti kakabsatyo. Ngarud, inted ti Apo ti bendisionna kadakayo.”

³⁰Kabigatanna, kinuna ni Moises kadagiti tattao, “Nadagsen unay ti nagbasolanyo. Ngem ita, innak iti Apo iti bantay bareng no maipamuspusak ti pannakapakawanyo.”

³¹Nagsubli ni Moises ken ni Yahweh ket kinunana, “Nadagsen ti basol dagitoy a tattao! Nangaramidda iti dios a balitok ket nagdaydayawda kenkuana.

³²Ipakpakaasik a pakawanem koma ida. No dimo pakawanen ida, pangngaasim ta ikkatem ti naganko iti libro a nangisuratam kadagiti nagan dagiti tattaom.”

³³Kinuna ni Yahweh ken ni Moises, “Dagiti laeng nagan ti nakabasol kaniak ti punasek iti librok.

³⁴Dumtengto ti aldaw a dusaek dagitoy a tattao gapu iti basolda. Inkan ket ipanguloam ida a mapan iti lugar nga imbagak kenka. Laglagipem nga idalannakanto ti anghelko.”

³⁵Iti kasta, dinusa ni Yahweh dagiti tattao ket pinagsakitna ida gapu ta pinilitda ni Aaron a mangaramid iti sinan-toro ti baka.