Read Iloko Exodus 33 Bible Online

Exodus 33 - Iloko bible

Exodus 33

¹Kinuna ni Yahweh ken ni Moises, “Pumanawkayo ditoy, sika ken dagiti tattao nga inruarmo idiay Egipto, ket inkay iti daga nga inkarik kada Abraham, Isaac ken Jacob nga ited kadagiti kaputotanda.

²Mangibaonak iti anghel a mangidalan kadakayo ket papanawekto dagiti Cananeo, Amorreo, Heteo, Perezeo, Heveo ken Jebuseo.

³Inkay iti nabaknang ken nadam-eg a daga. Ngem gapu ta nasukirkayo, diak makikuyog kadakayo amangan no patayenkay iti dalan.”

⁴Idi mangngeg daytoy dagiti tattao, nagleddaangda ket saandan a nagarruat iti alahas.

⁵Binilin ngamin ni Yahweh ni Moises nga ibagana kadagiti Israelita: “Nasukirkayo a tattao ket no makikuyogak la ngata kadakayo iti uray apagkanito, pukawenkayo a mamimpinsan. Ita, ikkatenyo dagiti alahasyo tapno ammok ti aramidek kadakayo.”

⁶Manipud idin, kalpasan ti ipapanawda idiay Bantay Sinai, saanen a nagal-alahas dagiti Israelita.

⁷Tunggal agkampo dagiti Israelita, alaen ni Moises ti nasagradoan a Tolda sana ipatakder iti pangadaywen bassit iti ruar ti kampo. Pinanaganan ni Moises daytoy iti “Tolda a Pakiumanan” ket sumrek iti tolda ti siasinoman a makiuman ken ni Yahweh.

⁸Tunggal mapan ni Moises iti tolda, agtakder dagiti tattao iti ruangan ti toldada ket kitkitaenda ni Moises agingga a makastrek iti tolda.

⁹Apaman a makastrek, bumaba met ti monmon ti ulep iti ruangan ti Tolda; makisao ni Yahweh ken ni Moises manipud iti ulep.

¹⁰Apaman a makita dagiti tattao ti ulep iti ruangan ti Tolda, agrukbabda.

¹¹Makisao ken ni Moises iti sangonsango a kas iti pannakisao ti maysa a tao iti gayyemna. Agsubli met laeng ni Moises iti kampo ngem agbati iti uneg ti Tolda ti agtutubo a katulongan ni Moises, ni Josue nga anak ni Nun.

¹²Kinuna ni Moises ken ni Yahweh, “Pudno nga imbagam nga idalanko dagitoy a tattao a mapan iti daga ngem dimo imbaga no siasino ti ibaonmo a tumulong kaniak. Kinunam pay nga am-ammonak unay ket maragsakanka kaniak.

¹³No pudno daytoy, ibagam kaniak dagiti panggepmo tapno makapagserbiak kenka ket agtultuloy a maragsakanka kaniak. Laglagipem met a pinilim a tagikuaen daytoy a nasion.”

¹⁴Kinuna ni Yahweh, “Kuyogenka ket ikkak ti inana ti panunotmo.”

¹⁵“No dika kumuyog kadakami,” kinuna ni Moises, “dinakam ngarud papanawen ditoy.

¹⁶Kasano nga adda makaammo a maragsakanka kaniak ken kadagiti tattao no dinakami met kuyogen? Ngem no kuyogennakami, maipakita a naisalsaluminakami kadagiti amin a tattao ditoy daga.”

¹⁷Kinuna ni Yahweh ken ni Moises, “Aramidek ti imbagam gapu ta am-ammoka unay ket maragsakanak kenka.”

¹⁸Indawat ni Moises, “Pangngaasim ta ipakitam kaniak ti makasisirap a lawag a pagilasinan ti kaaddam.”

¹⁹“Ipakitak kenka ti amin a kinadayagko, ket baliksek ti nasagradoan a naganko, a Yahweh,” insungbat ni Yahweh. “Paraburak ken kaasiakto ti kayatko a kaasian.

²⁰Ngem diak ipakita kenka ti rupak gapu ta matay ti siasinoman a makakita iti rupak.

²¹Adda bato iti abayko a mabalinmo a pagtakderan.

²²No lumabas ti makasisirap a lawag a mangipakita iti kaaddak, ikabilka iti rengngat ti bato ket lingdanka iti imak agingga a makalabasak.

²³Kalpasanna, ikkatek ti imak ket makitamto ti likudak ngem saan a ti rupak.”