Read Iloko Exodus 35 Bible Online

Exodus 35 - Iloko bible

Exodus 35

¹Inummong ni Moises dagiti amin nga Israelita ket kinunana kadakuada, “Daytoy ti imbilin ti Apo nga aramidenyo:

²Agtrabahokayo iti innem nga aldaw, ngem ngilinenyo ti maikapito, ta nasantoan nga aldaw a panaginana a maidaton kaniak, ni Yahweh. Mapapatay ti siasinoman nga agtrabaho iti dayta nga aldaw.

³Uray ti panamasged laeng iti apuy ti uneg ti balayyo, maiparit iti Aldaw a Panaginana.”

⁴Kinuna ni Moises kadagiti amin nga Israelita, “Daytoy ti imbilin ti Apo:

⁵Mangidatagkay iti daton iti Apo. Siasinoman nga agtarigagay a mangted, yegna dagitoy: balitok, pirak, wenno bronse;

⁶de lana nga asul, ube ken nalabaga; nafino a linen; lupot a naabel iti dutdot ti kalding;

⁷nakorte a lalat ti toro a karnero; nafino a lalat ti kalding; kayo ti akasia;

⁸lana ti pagsilawan; bangbanglo a paglaok iti lana a pagkonsagrar ken iti nabanglo nga insenso;

⁹napateg a karnelia ken napapateg a bato a maimontar iti efod ken iti pektoral ti Kangatoan a Padi.

¹⁰“Masapul nga umay dagiti amin a nalaing a trabahador kadakayo ket aramidenda amin nga imbilin ti Apo:

¹¹ti Tolda ti Dios, ti Tolda agraman ti akin-uneg ken akinruar nga abbongna, dagiti kawit ken dagiti bastidorna, dagiti balunetna, dagiti poste agraman dagiti pagbatayanna,

¹²ti Lakasa ti Tulag ken dagiti assiwna, ti kalub ken ti kurtina a panglinged.

¹³Aramidenda met ti lamisaan ken dagiti assiw ken amin nga alikamenna, ti pagikabilan iti tinapay a maidaton iti Dios,

¹⁴ti kandelero ti pagsilawan agraman dagiti alikamenna, dagiti pagsilawan agraman lana a segdenda.

¹⁵Aramidenda ti altar a pagpuoran iti insenso agraman dagiti assiwna, ti lana a pagkonsagrar, ti nabanglo nga insenso ken ti kurtina ti ruangan ti Tolda ti Dios,

¹⁶ti altar a pagpuoran kadagiti daton agraman ti bronse a barandiliasna, dagiti assiw ken amin nga alikamenna, ti pagbuggoan ken ti pagbatayanna,

¹⁷dagiti kurtina ti paraangan agraman dagiti poste ken pagbatayanna, ti kurtina iti pagserkan iti paraangan;

¹⁸dagiti pasok ken dagiti tali ti Tolda ken ti paraangan,

¹⁹dagiti nadayag a kawes dagiti papadi nga agserbi iti Nasantoan a Disso—dagiti nasagradoan a kawes ni Aaron a padi ken dagiti annakna.”

²⁰Pimmanaw dagiti Israelita,

²¹ket nangyeg iti sagut dagiti amin a mayat a tumulong iti pannakabangon ti Tolda ti Dios. Inyegda ti amin a kasapulan iti panagdaydayaw ken dagiti maaramid a kawes dagiti papadi.

²²Nagisagut ti amin a mayat a tumulong, lalaki man wenno babai. Adda nagited iti gargantilias, aritos, singsing, kuentas ken amin a kita ti alahas a balitok ket indatonda dagitoy ken ni Yahweh.

²³Nangted dagiti addaan iti de lana nga asul, ube wenno nalabaga; nafino a linen; lupot a naabel iti dutdot ti kalding; napalabaga a lalat ti karnero wenno nafino a lalat.

²⁴Amin nga addaan iti pirak ken bronse a mabalinna nga isagut ket impanda dagitoy iti Apo kasta met dagiti addaan iti kayo nga akasia a mabalin a mausar iti patakder.

²⁵Adda dagiti babbai a nagtibbi iti de lana nga asul, ube, nalabaga ken nafino a linen ket indatagda dagitoy.

²⁶Adda met dagiti nagtibbi iti dutdot ti kalding.

²⁷Nagidaton dagiti pangulo kadagiti napateg a bato a karnelia ken dadduma nga alahas a maimontar iti efod ken pektoral,

²⁸agraman bangbanglo ken lana dagiti pagsilawan, lana a pagkonsagrar ken iti nabanglo nga insenso.

²⁹Tunggal Israelita nga adda maitulongna ket indatagna ti sagut ken ni Yahweh para iti trabaho a paaramid ni Yahweh ken ni Moises.

³⁰Kinuna ni Moises kadagiti Israelita, “Pinili ti Apo ni Bezalel nga anak ni Uri ken apoko ni Hur a nagtaud iti tribu ti Juda.

³¹Pinunnona iti bukodna a pannakabalin ket nalaing iti amin a kita ti trabaho iti arte.

³²Masirib nga agaramid kadagiti disenio a sukogenna manipud iti balitok, pirak ken bronse;

³³agtabas ken agimontar iti napateg a bato; ken agkitikit iti kayo ken iti amin a kita ti aramid iti arte.

³⁴Inted ti Apo kenkuana, kasta met ken ni Oholiab nga anak ni Ahisamac iti tribu ti Dan, ti sirib a mangisuro iti trabahoda kadagiti dadduma.

³⁵Inikkanna ida iti naidumduma a sirib nga agaramid kadagiti ar-aramiden dagiti kumikitikit, dagiti dibuhista, dagiti umaabel iti de lana nga asul, ube, nalabbaga ken nafino a linen ken dadduma a lupot. Kabaelanda ti amin a kita ti trabaho ket nalaingda a dibuhista.