Read Iloko Exodus 36 Bible Online

Exodus 36 - Iloko bible

Exodus 36

¹“Da Bezalel ken Oholiab, agraman dagiti amin nga inikkan ti Apo iti sirib ken laing, isuda ti agaramid kadagiti amin a kasapulan iti pannakaibangon ti santuario. Masapul nga aramiden ti amin kas imbilin ti Apo.”

²Inayaban ni Moises da Bezalel, Oholiab ken amin nga inikkan ni Yahweh iti sirib ken laing agraman dagiti mayat a tumulong ket pinairugina kadakuada ti trabaho.

³Inted ni Moises kadakuada dagiti insagut dagiti Israelita a maipaay iti pannakabangon ti santuario ngem intultuloy dagiti Israelita ti binigat a pannangtedda kadagiti sagutda.

⁴Napan dagiti trabahador ken ni Moises,

⁵ket imbagada kenkuana, “Ad-adun ngem ti kasapulan ti yeg dagiti tattao a maipaay iti trabaho nga imbilin ti Apo a maaramid.”

⁶Ngarud, imbilin ni Moises iti entero a kampo a maisardengen ti panagited kadagiti sagut nga agpaay iti santuario. Isu nga awanen ti nagited iti sagut.

⁷Nupay kasta, adu unayen ti naipan sadiay a pangleppas iti amin a trabaho.

⁸Dagiti kalaingan a trabahador ti nangaramid iti Tolda ti Dios. Naaramid daytoy iti sangapulo a pessat a lupot iti tinali a nafino a linen ken naabel iti asul, ube ken nalabaga a de lana, ken nabordaan kadagiti ladawan dagiti kerubim.

⁹Agpapada ti rukod ti tunggal pessat: 12 a metro ti kaatiddog ken dua a metro ti kaakaba.

¹⁰Pinagsasaipda ti lima a pessat iti maysa a naig; kasta met ti inaramidda kadagiti lima a pessat.

¹¹Nangaramidda kadagiti pagyusokan iti lupot nga asul iti akinruar a pingir ti tunggal naig.

¹²Saglilimapulo a pagyusokan ti naikapet iti tunggal naig.

¹³Nangaramidda iti 50 a kawit a balitok a namagkamang kadagiti dua a naig, isu a sangsangkanayon ti Tolda ti Dios.

¹⁴Kalpasanna, inaramidda ti abbong ti Tolda iti sangapulo ket maysa a pessat ti lupot a naabel iti dutdot ti kalding.

¹⁵Agpapada ti rukod ti tunggal pessat: 13 a metro ti kaatiddog ken dua a metro ti kaakaba.

¹⁶Pinagsasaipda ti lima kadagitoy iti maysa a naig; kasta met ti inaramidda kadagiti innem.

¹⁷Saglilimapulo a pagyusokan ti inkapetda iti pingir ti maudi a pessat iti umuna a naig ken iti pingir ti sabali a naig.

¹⁸Nangaramidda iti 50 a kawit a bronse a pangikamangda kadagiti dua a naig tapno agbalin a maysa nga abbong.

¹⁹Nangaramidda pay iti dua nga abbong, maysa iti napalabbaga a lalat ti karnero ket ti maysa iti nafino a lalat a mayaplag iti rabawna.

²⁰Nangaramidda kadagiti bastidor ti Tolda manipud iti kayo nga akasia.

²¹Sangapulo ket lima a kadapan ti kaatiddog ti tunggal bastidor ket 27 a pulgada ti kalawana.

²²Adda dua nga agpada a sunta ti tunggal bastidor tapno agkakamangda. Sinuntaanda ti amin a bastidor.

²³Nangaramidda iti 20 a bastidor para iti paset ti bangirna iti abagatan ti tolda,

²⁴ken ti 40 a pirak a pagbatayanda, dua a pagbatayan ti bastidor a mangtengngel iti dua a suntana.

²⁵Nangaramidda met iti duapulo a bastidor para iti bangirna iti amianan,

²⁶agraman ti 40 a pirak a pagbatayan, dua a pagbatayan ti tunggal bastidor.

²⁷Innem a bastidor ti inaramidda nga agpaay iti paset ti bangirna iti laud;

²⁸ken dua a bastidor nga agpaay kadagiti suli iti likudan ti Tolda.

²⁹Nagkamang dagitoy pasuli a bastidor iti baba agingga iti tuktok nga yan ti umuna a pagkursongan. Kastoy ti pannakaaramid dagiti dua a bastidor iti dua a suli.

³⁰Adda ngarud walo a bastidor ken 16 a pirak a pagbatayan; dua a pagbatayan iti tunggal tabla.

³¹Nangaramidda iti 15 a balunet iti kayo nga akasia; lima a balunet nga agpaay kadagiti bastidor iti maysa a sikigan ti Tolda;

³²lima nga agpaay kadagiti bastidor iti sabali a sikigan ken lima nga agpaay kadagiti bastidor iti paset iti bangirna iti laud.

³³Inkabilda ti akintengnga a balunet a mamagkakamang kadagiti bastidor manipud iti maysa a sikigan agingga iti sabali.

³⁴Kinalupkopanda dagiti bastidor iti balitok ket inkapetda ti balitok a pagyusokan a mangtengngel kadagiti balunet a nakalupkopan met iti balitok.

³⁵Nangaramidda iti kurtina iti nafino a linen, ken naabel iti asul, ube ken nalabaga a de lana ken nabordaan kadagiti ladawan dagiti kerubim.

³⁶Nangaramidda iti uppat a poste iti kayo nga akasia a pakaibitinan ti kurtina ket kinalupkopanda iti balitok; balitok dagiti inkapetda a kawit. Nangaramidda met iti uppat a pirak a pagbatayan dagiti poste.

³⁷Para iti pagserkan iti Tolda, nangaramidda iti kurtina iti nafino a linen ken naabel iti asul, ube ken nalabaga a de lana ken nabordaan,

³⁸agraman iti lima a poste a naikkan kadagiti kawit. Kinalupkopanda iti balitok dagiti tuktok dagiti poste ken dagiti pasikkil. Nangaramidda iti lima a bronse a pagbatayan dagiti poste.