Read Iloko Exodus 37 Bible Online

Exodus 37 - Iloko bible

Exodus 37

¹Inaramid ni Bezalel ti Lakasa ti Tulag manipud iti kayo nga akasia. Uppat a pulo ket lima a pulgada ti kaatiddog, 27 a pulgada ti kaakaba ken 27 a pulgada ti kangatona.

²Puro a balitok ti inkalupkopna iti uneg ken iti ruarna ket balitok met ti impaikingna iti aglikmut.

³Inyaramidanna iti uppat a pagyusokan a balitok a pagawitan sana inkapet kadagiti uppat a sakana; dua a pagyusokan iti agsumbangir.

⁴Nangaramid kadagiti assiw nga akasia, kinalupkopanna ida iti balitok,

⁵ket inyusongna dagiti assiw kadagiti pagyusokan iti agsumbangir ti Lakasa.

⁶Nangaramid iti kalub iti puro a balitok; 45 a pulgada ti kaatiddog ken 27 a pulgada ti kaakabana.

⁷Nangaramid iti dua a kerubim iti napanday a balitok;

⁸maysa iti agsumbangir a pungto. Inaramidna ida a sangsangkanayon iti kalub.

⁹Siuukrad dagiti payak dagiti kerubim iti ngatoenda; agsinsinnangoda ket linlinonganda ti kalub.

¹⁰Akasia ti inaramid ni Bezalel a lamisaan: 36 a pulgada ti kaatiddog, 18 a pulgada ti kaakaba ken 27 a pulgada ti kangatona.

¹¹Puro a balitok ti inkalupkopna ket balitok met ti impaikingna iti aglikmut.

¹²Pinagdawadawna iti tallo a pulgada ti kaakaba iti aglikmut sana pinaikingan iti balitok.

¹³Inyaramidanna iti uppat a balitok a pagyusokan a pangawit iti lamisaan sana inkapet kadagiti uppat a suli a yan dagiti sakana

¹⁴iti asideg ti agdawadaw.

¹⁵Akasia dagiti assiw nga inaramidna a kinalupkopanna iti balitok.

¹⁶Puro a balitok dagiti inaramidna a mausar iti lamisaan: dagiti pinggan, kopa, pitser ken dagiti malukong a pakaikargaan kadagiti daton nga inumen.

¹⁷Inaramid ni Bezalel ti kandelero iti puro a balitok. Pinanday met a balitok ti inaramidna a puon ken ungkayna. Sangsangkanayon iti kandelero dagiti arkosna a kimmopa a sabong ken busel.

¹⁸Innem ti sangana: tallo iti agsumbangir.

¹⁹Iti tunggal sanga, adda kimmopa a sabong a kas iti sukog ti almendras agraman busbusel ken petalo.

²⁰Adda uppat a kimmopa a sinan-sabong ti almendras ken dagiti busel ti ungkay ti kandelero.

²¹Adda busel ti sabong iti baba ti tunggal maysa kadagiti tallo a paris a sanga.

²²Sangsangkanayon dagiti busel ken dagiti sanga iti kandelero; naaramidda iti napanday a puro a balitok.

²³Nangaramid iti pito a pagsilawan para iti kandelero, agraman dagiti puro a balitok a pagarsang ken pagyarsangan.

²⁴Agdagup iti 35 a kilo a puro a balitok ti inusarna iti kandelero agraman dagiti alikamenna.

²⁵Akasia ti inaramid ni Bezalel nga altar a pagpuoran iti insenso. Kuadrado ti altar: 18 a pulgada ti kaatiddog, kasta met ti kalawana ken 36 a pulgada ti kangatona. Sangsangkanayon iti altar dagiti sinan-sara kadagiti uppat a sulina.

²⁶Kinalupkopanna ti rabawna, dagiti uppat a sikiganna ken dagiti sinan-sarana iti puro a balitok. Pinaikinganna iti balitok ti aglikmut.

²⁷Inyaramidanna iti dua a balitok a pakaiyusokan dagiti assiw ket inkapetna iti baba dagiti iking iti agsumbangir.

²⁸Akasia dagiti inaramidna nga assiw a kinalupkopanna iti balitok.

²⁹Nangaramid ni Bezalel iti nasagradoan a lana a pagkonsagrar ken iti nabanglo nga insenso a natempla a kas iti bangbanglo.