Read Iloko Exodus 38 Bible Online

Exodus 38 - Iloko bible

Exodus 38

¹Akasia ti inaramid ni Bezalel nga altar a pagpuoran kadagiti daton. Kuadrado ti altar: 7 1/2 a kadapan ti kaatiddog ken kalawana, ken 4 1/2 a kadapan ti kangatona.

²Inikkanda kadagiti sinan-sara dagiti uppat a suli ket sangsangkamaysada iti altar. Kinalupkopanna amin iti bronse.

³Bronse dagiti amin nga inaramidna nga alikamen ti altar: dagiti palanggana, pala, kawit, malukong ken palanggana a pagikkan iti beggang.

⁴Nangaramid iti bronse a barandilias ket inkabilna iti sirok ti pagdawadawan ti altar, a dumanon iti kagudua ti kangatona.

⁵Nangaramid iti uppat a pagkursongan sana inkapet kadagiti uppat a suli ti altar.

⁶Inaramidna dagiti assiw iti kayo nga akasia, ket kinalupkopanna iti bronse,

⁷sana inyusong kadagiti pagyusokan iti agsumbangir ti altar. Naaramid ti altar kadagiti tabla ket awan nagyan ti unegna.

⁸Inaramid ni Bezalel ti bronse a palanggana ken ti pagbatayanna manipud kadagiti bronse a pagsarmingan dagiti babbai nga agserserbi iti ruangan ti Tolda ti Dios.

⁹Inaramidna ti paraangan ti Tolda ti Dios nga inalikubkobna iti nalamuyot a linen a kurtina. Iti bangirna iti abagatan, 50 a yarda ti kaatiddog dagiti kurtina.

¹⁰Bronse dagiti duapulo a poste ken dagiti duapulo a batayda. Pirak dagiti kawit iti tunggal poste ken dagiti pakaibitinanda.

¹¹Agpada ti rukod ti paraangan iti bangirna iti amianan

¹²ken iti laud, 25 a yarda ti kaatiddog dagiti kurtina a naibitin iti sangapulo a poste a naipasdek iti sangapulo a pagbatayan. Pirak dagiti kawit ti tunggal poste ken dagiti pakaibitinanda.

¹³Iti bangirna iti daya a yan ti pagserkan, 25 a yarda ti kalawa ti paraangan.

¹⁴Iti agsumbangir ti pagserkan, adda 7 1/2 a yarda a kurtina nga addaan iti tallo a poste ken tallo a pagbatayan.

¹⁶Naaramid iti nalamuyot a tinali a linen ti amin a kurtina iti aglikmut ti paraangan.

¹⁷Bronse dagiti pagbatayan dagiti poste. Pirak met dagiti kawit, dagiti pakaibitinan ken ti naikalupkop kadagiti tuktok ti poste. Napagkakamang dagiti amin a poste ti paraangan babaen kadagiti pirak a pasikkil.

¹⁸Nabordaan ti kurtina ti ruangan ti paraangan ket naaramid iti de lana nga asul, ube, nalabaga ken nalamuyot a tinali a linen. Sangapulo a yarda ti kaatiddog ken 2 1/2 a yarda ti kagayadna a kas iti kurtina ti paraangan.

¹⁹Naibitin iti uppat a poste a naisaad met iti uppat a pagbatayan. Pirak dagiti kawitda, ti naikalupkop iti tuktokda ken dagiti pakaibitinanda.

²⁰Bronse dagiti amin a pasok ti Tolda ken dagiti pasok ti aglikmut ti paraangan.

²¹Daytoy ti listaan dagiti metal a nausar iti Tolda ti Dios a nakaikabilan dagiti dua a tapi a bato a nakailanadan dagiti Sangapulo a Bilin. Pinaaramid ni Moises daytoy kadagiti Levita a nagtrabaho iti panangidaulo ni Itamar nga anak ni Aaron a padi.

²²Ni Bezalel nga anak ni Uri ken apoko ni Hur iti tribu ti Juda ti nangaramid kadagiti amin nga imbilin ni Yahweh.

²³Ni Oholiab nga anak ni Ahisamac iti tribu ti Dan ti nagpaay a katulongan ni Bezalel. Agkitkitikit ni Oholiab, dibuhista ken agab-abel iti de lana nga asul, ube ken nalabaga ken iti nalamuyot a linen.

²⁴Agdagsen iti 1,000 a kilo ti amin a balitok a naidaton iti Apo ken nausar iti pannakaaramid ti santuario. Nausar ditoy ti pagtimbangan ti templo.

²⁵Agdagsen dagiti pirak a naparuar iti pannakasensus dagiti umili iti 3,430 a kilo, segun iti pagtimbangan ti templo.

²⁶Daytoy ti dagup ti binayadan dagiti amin a nasensus; inted ti tunggal maysa ti naituding a gatad, segun iti pagtimbangan ti templo. Agdagup iti 603,550 a lallaki dagiti nailista iti sensus nga agtawen iti 20 wenno nasursurok pay.

²⁷Nausar ti 3,400 a kilo a pirak iti pannakaaramid dagiti 100 a pagbatayan iti santuario ken dagiti kurtina—34 a kilo iti tunggal pagbatayan.

²⁸Iti nabati a 30 a kilo a pirak, inaramid ni Bezalel dagiti pagibitinan ti kurtina, dagiti kawit dagiti poste ken ti naikalupkop iti tuktokda.

²⁹Agdagsen iti 2,425 a kilo dagiti bronse a naidaton iti Apo.

³⁰Dagitoy dagiti naaramid a pagbatayan iti pagserkan iti Tolda ti Dios, ti bronse nga altar agraman bronse a barandiliasna, dagiti amin nga alikamen ti altar,

³¹dagiti pagbatayan ti bengbeng iti likmut ti tolda ken ti pagserkanna ken dagiti amin a pasok iti Tolda ti Dios ken dagiti pasok iti aglikmutna.