Read Iloko Exodus 39 Bible Online

Exodus 39 - Iloko bible

Exodus 39

¹De lana nga asul, ube ken nalabaga ti naaramid a kawes dagiti papadi nga agserbi iti Nasantoan a Disso. Inaramidda ti kawes ni Aaron a kas padi, kas imbilin ni Yahweh ken ni Moises.

²Inaramidda ti efod iti nafino a linen de lana nga asul, ube ken nalabaga; ken panait a balitok.

³Nangpitpitda iti balitok agingga nga immingpis ket rinagragasda nga inyabel iti de lana nga asul, ube ken nalabaga ken ti nabordaan a nalamuyot a linen.

⁴Inaramidda ti terante ti efod a maikapet iti agsumbangir a sikiganna tapno agkamang.

⁵Napintas ti pannakaabel ti barikes a naikamang iti efod ket sangsangkanayonda; naaramid daytoy iti isu met laeng a material, kas imbilin ni Yahweh ken ni Moises.

⁶Tinabasda dagiti napateg a bato a karnelia sada immontar kadagiti balitok a pagitampokan. Naikitikit kadagiti bato dagiti nagan dagiti 12 nga annak ni Jacob.

⁷Iti terante ti efod ti nakaikabitan dagitoy a mangibagi kadagiti 12 a tribu ti Israel, kas imbilin ni Yahweh ken ni Moises.

⁸Inaramidda ti pektoral iti isu met la a material a naaramat iti efod ken isu met la a borda.

⁹Kuadrado ti pektoral a nagkulpi iti tengnga; siam a pulgada ti kaatiddog, kasta met ti kaakabana.

¹⁰Minontaranda iti uppat nga intar iti napapateg a bato; iti umuna nga intar, immontarda ti rubi, topasio ken granate;

¹¹iti maikadua, esmeralda, safiro ken diamante;

¹²iti maikatlo, hasinto, agata ken amatista;

¹³ket iti maikapat, berilio, karnelia ken jaspe. Naimontar dagitoy iti balitok.

¹⁴Iti tunggal bato, naimontar ti maysa a nagan dagiti annak ni Jacob a mangibagi kadagiti 12 a tribu ti Israel.

¹⁵Nangtalida iti pinitpit a puro a balitok a kordon para iti pektoral.

¹⁶Nangaramidda iti dua a balitok a pagmontaran ken dua a balitok a pagyusokan nga inkapetda kadagiti suli ti pektoral, iti akingngato a pasetna.

¹⁷Inggalutda ti murdong dagiti kordon a balitok kadagiti dua a balitok a pagyusokan.

¹⁸Inggalutda met ti maysa a murdong ti tunggal kordon kadagiti pagmontaran ket kastoy ti pannakaikamangda iti sango kadagiti terante ti efod.

¹⁹Nangaramidda iti dua a pagyusokan a balitok ket inkapetda kadagiti akimbaba a suli ti pektoral iti akin-uneg a gayadan a dumna iti efod.

²⁰Nangaramidda pay iti dua a pagkursongan a balitok ket inkapetda iti akimbaba a paset ti sango dagiti dua a terante iti asideg ti nagtupian ken ngatoen ti naabel a barikes ti efod.

²¹Babaen iti asul a kordon, pinagkamangda dagiti pagyusokan ti pektoral ken dagiti pagyusokan ti efod iti ngatoen ti barikes tapno agsaad ti pektoral iti barikes ket saanda nga agsina. Inaramidda daytoy kas imbilin ni Yahweh ken ni Moises.

²²Puro a de lana nga asul ti inabelda a kagay a rutap ti efod.

²³Tapno saan a mapisang ti putol ti kagay, adda indaitda nga arubite a lebleb iti lawlawna.

²⁴Iti aglikmut ti gayadan ti kagay, nangikabilda kadagiti sinan-bunga ti granada manipud iti de lana nga asul, ube ken nalabaga ken naingpis a tinali a linen a binaetbaetanda kadagiti puro a balitok a kampanilia, kas imbilin ni Yahweh ken ni Moises.

²⁷Inaramidda dagiti abito ni Aaron ken dagiti annakna,

²⁸kasta met ti turban, dagiti kallugong, dagiti linen a sapin,

²⁹ti napintas ti pannakaabelna a linen a barikes ken de lana nga asul, ube ken nalabaga a nabordaan kas imbilin ni Yahweh ken ni Moises.

³⁰Puro a balitok ti inaramidda nga insignia, ti nasagradoan a pakakitaan ti pannakaidaton. Inkitikitda dagitoy a balikas: “Naidaton ken ni Yahweh.”

³¹Inggalutda daytoy iti turban babaen iti asul a kordon kas imbilin ni Yahweh ken ni Moises.

³²Nalpas ti amin a trabaho iti Tolda ti Dios. Inaramid dagiti Israelita ti amin kas imbilin ni Yahweh ken ni Moises.

³³Impanda ken ni Moises ti Tolda agraman dagiti amin nga alikamenna, dagiti kawit, dagiti bastidor, dagiti balunet, dagiti poste ken dagiti batayna;

³⁴ti napalabaga nga abbong a lalat ti karnero, ti abbong a nafino a lalat, ti panglinged a kurtina,

³⁵ti Lakasa ti Tulag a nakaikabilan dagiti tapi a bato, dagiti assiw ken ti kalub ti Lakasa,

³⁶ti lamisaan ken amin nga alikamenna, ti tinapay a maidaton iti Dios,

³⁷ti kandelero a puro a balitok ken dagiti pagsilawanna; dagiti pagsilawan ken amin nga alikamenna; ti lana ti pagsilawan;

³⁸ti altar a balitok; ti lana a pagkonsagrar; ti nabanglo nga insenso; ti kurtina iti pagserkan ti Tolda;

³⁹ti bronse nga altar agraman ti bronse a barandiliasna, dagiti assiwna, ken dagiti amin nga alikamenna, ti palanggana a pagbuggoan agraman ti pagbatayanna;

⁴⁰dagiti kurtina ti paraangan, dagiti poste ken dagiti pagbatayanda; ti kurtina ti pagserkan ti paraangan, dagiti talina, dagiti pasok ti Tolda ken dagiti amin nga alikamen iti panagserbi iti Tolda ti Dios,

⁴¹ken dagiti nadayag a kawes dagiti papadi nga agserbi iti Nasantoan a Disso; dagiti nasagradoan a kawes ni Aaron a padi ken dagiti kawes dagiti annakna.

⁴²Inaramid dagiti Israelita dagiti amin a trabaho, kas imbilin ni Yahweh ken ni Moises.

⁴³Sinaggaysa a sinukimat ni Moises ti amin ket nakitana a mayannurot dagitoy iti imbilin ni Yahweh. Iti kasta, binendisionanna amin ida.