Read Iloko Exodus 4 Bible Online

Exodus 4 - Iloko bible

Exodus 4

¹Simmungbat ni Moises ken ni Yahweh, “No ibagak kadakuada a nagparangkayo kaniak ket didanto mamati, anianto ti aramidek?”

²“Ania ta ig-iggamam?” sinaludsod ni Yahweh. “Sarukod, apo,” insungbat ni Moises.

³Kinuna ni Yahweh, “Ipurruakmo iti daga.” Nagtungpal ni Moises ket nagbalin nga uleg ti sarukod. Nagsanud ni Moises manipud iti uleg.

⁴Kinuna ni Yahweh, “Ipusem a piduten.” Tiniliw ni Moises ti uleg babaen iti ipusna ket nagbalin manen a sarukod.

⁵“Aramidem daytoy,” kinuna ni Yahweh, “tapno mamatida a nagparang kenka ni Yahweh a Dios dagiti kapuonanda, ti Dios da Abraham, Isaac ken Jacob.”

⁶Kinuna manen ni Yahweh ken ni Moises, “Yunegmo ta imam iti badom.” Nagtungpal ni Moises ket idi iruarna ti imana, nalapunos iti kukutel ket pimmuraw a kas niebe.

⁷Kinuna ni Yahweh, “Isuksokmo manen ta imam iti badom.” Kasta ti inaramid ni Moises. Idi iruarna ti imana, awanen ti kukutel ket nagsubli manen a kas iti dati.

⁸Kinuna ni Yahweh, “No didakanto patien wenno dida maguyugoy a mamati iti umuna a milagro, mamatidanto iti daytoy maikadua.

⁹Ket no didakanto pay la patien uray no imparangmo dagitoy dua a milagro, mangalakanto iti danum iti Karayan Nile samo ibuyat iti namaga a daga. Agbalinto a dara ti danum.”

¹⁰Kinuna ni Moises ken ni Yahweh, “Saan, apo, saannak nga ibaon. Ni kaanoman saanak a nalaing nga agsao, ket diak met nagbalin a bumibitla manipud pay itay rugiam ti makisao kaniak. Nabannayat ket natabbed toy dilak.”

¹¹Kinuna ni Yahweh kenkuana, “Siasino ti mangted iti ngiwat ti tao? Siasino ti adda pannakabalinna a mamagtuleng wenno mamagumel iti maysa a tao? Siasino ti mangted iti panagkitana wenno mamagbulsek kenkuana? Saan kadi a siak ni Yahweh?

¹²Ala, inkan. Tulongankanto nga agsao ket ibagakto ti sawem.”

¹³Ngem kinuna ni Moises, “Saan, apo. Pangngaasim ta mangibaonka laengen iti sabali.”

¹⁴Nakapungtot ni Yahweh ken ni Moises. “Ket ni Aaron a kabsatmo a Levita?” sinaludsodna. “Ammok a nalaing nga agsao. Kinapudnona, umaynaka sabtenen ket maragsakanto a makakita kenka.

¹⁵Kasaom ket ibagam kenkuana ti sawenna. Tulongankayto nga agsao. Ibagakto ti aramidenyo.

¹⁶Isunto ti pannakangiwatmo ket agbalinkanto a kas iti Dios a mangibaga no ania ti sawenna kadagiti tattao.

¹⁷Itugotmo ta sarukodmo ta daytanto ti pagaramidmo kadagiti milagro.”

¹⁸Nagawid ni Moises iti balay ni Jetro a katuganganna ket kinunana kenkuana, “Palubosannak koma nga agsubli kadagiti kakabagiak idiay Egipto, ta kitaek no addada pay a biag.” Pinalubosan ni Jetro. “Dios ti kumuyog kenka,” kinuna ni Jetro idi agrubbuat ni Moises.

¹⁹Idi adda pay laeng ni Moises idiay Midian, kinuna ni Yahweh kenkuana, “Agsublika idiay Egipto. Natay aminen a nagpanggep a mangpatay kenka.”

²⁰Impasakay ngarud ni Moises ti asawana ken dagiti annakna iti asno tapno mapanda idiay Egipto. Intugotna ti sarukod nga imbilin ti Dios nga alaenna.

²¹Kinuna manen ni Yahweh ken ni Moises, “Ita ta agsublikan idiay Egipto, aramidem dagiti amin a milagro iti sangoanan ti ari. Intedko kenka ti pannakabalin a mangaramid kadagitoy. Ngem patangkenekto ti pusona tapno dina ipalubos a pumanaw dagiti tattao.

²²Kunamto kenkuana a kastoy ti sao ni Yahweh: ‘Ni Israel ti inauna nga anakko a lalaki.

²³Ibagak kenka a palubosam a pumanaw tapno agdaydayaw kaniak ngem dimo pinalubosan. Ita, patayek ti inauna nga anakmo a lalaki.’”

²⁴Iti pagkamkampoan iti dalan nga agpa-Egipto, napan ni Yahweh ket panggepna a patayen ni Moises.

²⁵Nangala ni Sefora iti natadem a bato ket kinugitna ti anakna sana insagid ti nageppas a kudil kadagiti dapan ni Moises. Gapu iti seremonia ti pannakakugit, kinunana ken ni Moises, “Asawaka babaen iti dara.” Iti kasta, pinalubosan ni Yahweh nga agbiag ni Moises.

²⁷Kabayatanna, kinuna ni Yahweh ken ni Aaron, “Inka sabten ni Moises idiay let-ang.” Napanna sinabat ni Moises iti bantay ti Dios ket inagkanna idi agkitada.

²⁸Imbaga ni Moises ken ni Aaron ti amin nga imbaga ni Yahweh idi ibaonna, kasta met ti amin a milagro nga imbilinna nga aramidenna.

²⁹Nagkuyog da Moises ken Aaron a napan idiay Egipto ket inummongda amin a pangulo dagiti Israelita.

³⁰Imbaga ni Aaron kadakuada ti amin a kinuna ni Yahweh ken ni Moises. Inaramid met ni Moises ti amin a milagro iti imatang dagiti tattao.

³¹Namatida. Idi nangngegda a sinarungkaran ida ni Yahweh ket nakitana ti pannakaparparigatda, nagdumogda sada nagdaydayaw.