Read Iloko Exodus 40 Bible Online

Exodus 40 - Iloko bible

Exodus 40

¹Kinuna ni Yahweh ken ni Moises,

²“Iti umuna nga aldaw ti umuna a bulan, bangonemto ti Tolda ti Dios.

³Ikabilmo iti unegna ti Lakasa ti Tulag a nakaikabilan dagiti Sangapulo a Bilin ket ibitinmo met ti kurtina iti sangona.

⁴Yunegmo ti lamisaan samo iparabaw dagiti alikamenna. Yunegmo met ti kandelero ket ikabilmo dagiti pagsilawanna.

⁵Ikabilmo ti balitok nga altar a pagpuoran iti insenso iti sango ti Lakasa ti Tulag. Ibitinmo ti kurtina iti ruangan ti Tolda ti Dios.

⁶Ikabilmo ti altar a pagpuoran iti daton iti sango ti Tolda.

⁷Ikabilmo ti palanggana a pagbuggoan iti nagbaetan ti Tolda ti Dios ken ti altar ket kargaam iti danum.

⁸Ikabilmo dagiti kurtina a mangalikubkob iti paraangan, ket kurtinaam ti ruanganna.

⁹“Kalpasanna, alaem ti nasagradoan a lana samo warisan ti Tolda ken amin nga alikamenna tapno maikonsagrarda ket agbalinda a nasagradoan.

¹⁰Isarunom nga ikonsagrar ti altar babaen iti panangwarismo iti lana tapno agbalin a naan-anay a sagrado.

¹¹Kastoy met ti panangikonsagrarmo iti palanggana a pagbuggoan ken ti pagbatayanna.

¹²“Ipanmo ni Aaron ken dagiti annakna iti ruangan ti Tolda ti Dios ket digosem ida kas mayannurot iti seremonia.

¹³Kalpasanna, yarruatmo ken ni Aaron ti kawesna a kas padi. Sapsapoam ni Aaron iti lana ket ikonsagrarmo tapno agbalin a padi nga agserbi kaniak.

¹⁴Paasitgem met dagiti annakna; yaruatmo kadakuada dagiti tunika.

¹⁵Ket ikonsagrarmo ida a kas iti amada tapno mabalinda ti agserbi kaniak a kas padi. Iti pannakakonsagrarda, agbalinda a padi ken dagiti kaputotanda iti agnanayon.”

¹⁶Tinungpal ni Moises ti amin nga imbilin kenkuana ni Yahweh.

¹⁷Nabangon ti Tolda ti Dios iti umuna nga aldaw ti umuna a bulan iti maikadua a tawen kalpasan ti ipapanawda idiay Egipto.

¹⁸Insaad ni Moises dagiti pagbatayanna, impatakderna dagiti bastidor, inkapetna dagiti balunet ken binangonna dagiti poste.

¹⁹Inyukradna ti abbong iti rabaw ti Tolda ket imparabawna ti akinruar nga abbong, kas imbilin ni Yahweh.

²⁰Innalana dagiti tapi a bato ket inkabilna iti Lakasa ti Tulag. Inyusokna dagiti assiw sana kinaluban ti Lakasa.

²¹Kalpasanna, inkabilna ti Lakasa iti uneg ti Tolda. Imbitinna ti kurtina ket kastoy ti pannakalinged ti Lakasa, kas imbilin ni Yahweh.

²²Inkabilna ti lamisaan iti uneg ti Tolda, iti bangirna iti amianan iti ruar ti kurtina

²³ket imparabawna ti tinapay a naidaton ken ni Yahweh, kas imbilinna kenkuana.

²⁴Inkabilna ti kandelero iti uneg ti Tolda iti batog ti lamisaan iti bangirna iti abagatan.

²⁵Insaadna dagiti pagsilawan iti kandelero iti sangoanan ni Yahweh, kas imbilinna kenkuana.

²⁶Inkabilna ti balitok nga altar iti uneg ti Tolda iti sangoanan ti kurtina,

²⁷ket pinuoranna ti nabanglo nga insenso, kas imbilin ni Yahweh.

²⁸Imbitinna ti kurtina iti ruangan ti Tolda.

²⁹Iti sangoanan ti kurtina, inkabilna ti altar a pagpuoran kadagiti sakrifisio. Iti rabaw ti altar, indatonna dagiti sakrifisio a sibubukel a mapuoran ken ti daton a makan, kas imbilin ni Yahweh kenkuana.

³⁰Inkabilna ti palanggana iti nagbaetan ti Tolda ken ti altar sana kinargaan iti danum.

³¹Ditoy ti pagbuggoan da Moises, Aaron ken dagiti annakna kadagiti ima ken sakada.

³²Agbuggoda tunggal sumrekda iti Tolda ti Dios wenno umasidegda iti altar kas imbilin ni Yahweh ken ni Moises.

³³Binangon ni Moises ti bengbeng iti aglikmut ti Tolda ken ti altar ket imbitinna ti kurtina iti pagserkan ti paraangan. Inleppas ni Moises ti amin a trabaho.

³⁴Kalpasanna, nagdisso ti ulep a nangkumot iti Tolda ti Dios ket napunno iti makasisirap a lawag ni Yahweh.

³⁵Gapu iti daytoy, saan a makastrek ni Moises iti Tolda.

³⁶Sa la yalis dagiti Israelita ti kampoda no agpangato ti ulep manipud iti Tolda.

³⁷No saan nga umalis ti ulep, saanda met nga umalis iti pagkampoanda.

³⁸Iti amin a panagdaliasat dagiti Israelita, kumuykuyog latta ti ulep ti dayag ni Yahweh ken ti gumilgil-ayab nga apuy. Iti aldaw, adda ti ulep iti ngatoen ti Tolda ket iti rabii, adda ti apuy iti isu met la a lugar a makita dagiti tattao.