Read Iloko Exodus 5 Bible Online

Exodus 5 - Iloko bible

Exodus 5

¹Kalpasanna napan da Moises ken Aaron iti ari ti Egipto ket kinunada kenkuana, “Kastoy ti kuna ti Apo a Dios ti Israel: ‘Palubosam dagiti tattaok a mapan idiay let-ang tapno rambakanda ti fiesta a pangpadayaw kaniak.’”

²Sinaludsod ti ari, “Siasino ti Apo? Apay koma a dumngegak kenkuana tapno palubosak dagiti Israelita? Diak am-ammo ti Apo, ket diak palubosan dagiti Israelita.”

³Kinunada kenkuana, “Nagparang kadakami ti Dios dagiti Hebreo. Ipalubosmo koma nga agdaliasatkami idiay let-ang iti tallo nga aldaw tapno agidatonkami iti Apo a Diosmi. No saan, patayennakami iti sakit wenno gubat.”

⁴Kinuna ti ari kada Moises ken Aaron, “Kayatyo a sawen, taktakenyo dagiti tattao kadagiti trabahoda? Pagsublienyo dagita a tagabu nga agtrabaho.”

⁵Kinuna pay ti ari, “Dakayo, ad-adukayo payen ngem dagiti Egipcio. Ket ita, kayatyon ti agsardeng nga agtrabaho?”

⁶Iti dayta met la nga aldaw, imbilin ti ari kadagiti mangimaton kadagiti tagabu ken kadagiti kapatas:

⁷“Manipud ita, diyon ikkan dagiti tattao iti garami a pagaramidda iti ladrilio. Bay-anyo nga isuda ti mapan mangala iti usarenda.

⁸Ngem paaramidyo met laeng kadakuada ti sigud a bilang ti ladrilio. Kurang ti trabahoda, isut' gapuna nga agasugda nga agkuna, ‘Palubosandakami a mapan agidaton iti Diosmi.’

⁹Nayonanyo ti trabahoda ket ad-adda manen nga ingetanyo ida tapno awan tiempoda a dumngeg iti inuulbod a sasao.”

¹⁰Rimmuar dagiti mangimaton kadagiti tagabu ken dagiti kapatas. Kinunada kadagiti Israelita, “Imbaga ti ari a saankayon a maikkan iti garami.

¹¹Dakayo kanon ti agbirok iti garami ngem masapul a saan a maksayan ti bilang ti ladrilio nga aramidenyo iti inaldaw.”

¹²Nagwaras dagiti Israelita iti entero a daga ti Egipto tapno agbirokda iti garami.

¹³Saan a sinardengan dagiti mangimaton iti panangdagdagda kadakuada nga aramidenda ti isu met la a bilang ti ladrilio iti inaldaw, kas iti sigud nga ar-aramidenda idi maik-ikkanda iti garami.

¹⁴Ngem agkurang ti bilang ti ladrilio a maaramid iti inaldaw. Gapu iti daytoy, kinabkabil dagiti mangimaton dagiti kapatas a nadutokan nga agaywan iti trabaho.

¹⁵Iti kasta, nagreklamo dagiti kapatas. Napanda iti ari ket kinunada kenkuana, “Apay nga ikaskastoynakami, Natan-ok nga Ari?

¹⁶Awan la ngaruden ti maited a garami, ngem mabilinkami latta nga agaramid iti ladrilio! Ita, kabkabilendakami. Dagiti tattaoyo ti akimbasol.”

¹⁷Insungbat ti ari, “Sadutkayo ket diyo kayat ti agtrabaho, isu a dawatenyo a palubosankayo a mapan agidaton iti Apo.

¹⁸Inkay ketdi agtrabahon! Awan ti garami a maited kadakayo ngem masapul nga aramidenyo ti isu met laeng a bilang ti ladrilio.”

¹⁹Nabigbig dagiti kapatas nga agpeggad ti kasasaadda iti naibaga kadakuada a di maksayan ti bilang ti ladrilio nga aramidenda iti inaldaw.

²⁰Bayat ti ipapanawda, nasabatda da Moises ken Aaron a mangur-uray kadakuada.

²¹Kinunada kadagiti dua, “Nakita ti Apo ti inaramidyo ket dusaennakayo koma ta dakayo ti gapuna a guraennakami ti ari ken dagiti ofisialesna. Inikkanyo ida iti pambaran a mangpatay kadakami.”

²²Kimmamang manen ni Moises ken ni Yahweh ket kinunana, “Apo, apay a parparigatem dagiti tattaom? Apay nga imbaonnak ditoy?

²³Manipud napanak iti ari tapno ibagak kenkuana ti saom, indadanesna dagiti tattaom ket pulos nga awan pay inaramidyo tapno matulonganda.”