Read Iloko Exodus 6 Bible Online

Exodus 6 - Iloko bible

Exodus 6

¹Kinuna ni Yahweh ken ni Moises, “Ita, makitam ti aramidek iti ari. Pilitek a mangpalubos kadagiti tattaok. Kinapudnona, pilitek a pagtalawenna ida iti dagana.”

²Kinuna ti Dios ken ni Moises, “Siak ni Yahweh.

³Nagparangak a kas Dios a Mannakabalin-amin kada Abraham, Isaac ken Jacob, ngem diak impakaammo kadakuada ti nasantoan a naganko a Yahweh.

⁴Nakitulagak pay kadakuada: Inkarik nga itedko kadakuada ti daga a Canaan a nagnaedanda a kas ganggannaet.

⁵Ita, nangngegko ti asug dagiti Israelita a tagtagabuen dagiti Egipcio ket nalagipko ti pannakitulagko.

⁶Ngarud, ibagam daytoy kadagiti Israelita, ‘Siak ni Yahweh. Ispalenkayto ket wayawayaankayto iti pannakatagabuyo kadagiti Egipcio. Ipariknak kadakuada ti dagsen ti mannakabalin nga imak; nakabutbutengto ti panangdusak kadakuada ket isalakankayto.

⁷Pagbalinenkayto a tattaok ket siakto ti Diosyo. Maammoanyonto a siak ni Yahweh a Diosyo inton wayawayaankayo iti pannakatagabuyo idiay Egipcio.

⁸Ipankayto iti daga nga insapatak nga ited kada Abraham, Isaac ken Jacob. Itedkonto a kukuayo. Siak ni Yahweh.’”

⁹Imbaga ni Moises daytoy kadagiti Israelita ngem dida patien ta napukawen ti namnamada gapu iti nakaro a pannakatagabuda.

¹⁰Kinuna ni Yahweh ken ni Moises,

¹¹“Inka ibaga iti ari ti Egipto a masapul nga ipalubosna a pumanaw dagiti Israelita iti dagana.”

¹²Ngem kinuna ni Moises ken ni Yahweh, “Didakto pay ipangag dagiti Israelita, ipangagnakto ketdin ti ari? Saanak a nalaing nga agsao.”

¹³Imbilin ni Yahweh kada Moises ken Aaron nga ibagada kadagiti Israelita ken iti ari nga isuda a dua ti nabilin a mangiruar kadagiti Israelita idiay Egipto.

¹⁴Uppat ti lallaki nga annak ni Ruben nga inauna nga anak ni Jacob: Hanoc, Pallu, Hezron ken Carmi. Isuda ti kapuonan dagiti familia a naipanagan kadakuada.

¹⁵Innem ti annak ni Simeon: Jemuel, Jamin, Ohad, Jakin, Zohar ken Saul nga anak ti maysa a Cananea; isuda ti kapuonan dagiti sangkafamiliaan a naipanagan kadakuada.

¹⁶Tallo ti annak ni Levi: Gerson, Cohat ken Merari. Isuda ti kapuonan dagiti familia a naipanagan kadakuada. Nagbiag ni Levi iti 137 a tawen.

¹⁷Dua ti annak ni Gerson: Libni ken Simei ket adu ti kaputotanda.

¹⁸Uppat ti annak ni Cohat: Amram, Izar, Hebron ken Uzziel. Nagbiag ni Cohat iti 133 a tawen.

¹⁹Dua ti annak ni Merari: Mali ken Musi. Dagitoy ti familia ni Levi agraman dagiti kaputotanda.

²⁰Inasawa ni Amram ni Jocabed a kabsat ni amana. Inyanak ni Jocabed da Moises ken Aaron. Nagbiag ni Amram iti 137 a tawen.

²¹Tallo ti annak ni Izar: Kora, Nefeg ken Zikri.

²²Tallo met ti annak ni Uzziel: Misael, Elisafan ken Sitri.

²³Inasawa ni Aaron ni Eliseba nga anak ni Aminadab ken kabsat ni Naason; inyanakna da Nadab, Abiu, Eleazar ken Itamar.

²⁴Tallo ti annak ni Kora: Asir, Elcana ken Abiasaf; isuda ti kapuonan dagiti benneg dagiti sangkafamiliaan ni Kora.

²⁵Inasawa ni Eleazar nga anak ni Aaron ti maysa kadagiti annak ni Futiel; inyanakna ni Finees. Dagitoy dagiti ulo ti familia ken dagiti kafamilia iti tribu ni Levi.

²⁶Da Aaron ken Moises ti nagkunaan ni Yahweh, “Iruaryo dagiti tribu ti Israel iti Egipto.”

²⁷Isuda ti nangibaga iti ari ti Egipto a wayawayaanna dagiti Israelita.

²⁸Idi nagsao ni Yahweh ken ni Moises idiay Egipto,

²⁹kinunana, “Siak ni Yahweh. Ibagam iti ari ti Egipto dagiti amin nga ibagak kenka.”

³⁰Ngem insungbat ni Moises ken ni Yahweh, “Ammoyo a diak nalaing nga agsao; kasano a denggennak ti ari?”