Read Iloko Exodus 7 Bible Online

Exodus 7 - Iloko bible

Exodus 7

¹Kinuna ni Yahweh ken ni Moises, “Pagbalinenka a pannakabagi ti Dios iti sangoanan ti ari, ket ninto Aaron a kabsatmo ti pannakangiwatmo nga agsao kenkuana.

²Ibagam ken ni Aaron ti amin nga ibilinko kenka ket dawatennanto iti ari a palubosanna dagiti Israelita a pumanaw iti dagana.

³Ngem patangkenekto ti puso ti ari, ket dinakayto denggen uray no mano ti nakabutbuteng a banag ti aramidek idiay Egipto. Kalpasanna, idissuorkonto ti nadagsen a dusa iti Egipto ket iruarkonto dagiti tribu dagiti tattaok iti dayta a daga.

⁵Inton dusaek dagiti Egipcio ket iruarko dagiti Israelita iti pagilianda, maammoandanton a siak ni Yahweh.”

⁶Tinungpal da Moises ken Aaron ti imbilin ti Apo.

⁷Agtawen iti 80 ni Moises ket 83 met ni Aaron idi makisaoda iti ari.

⁸Kinuna ni Yahweh kada Moises ken Aaron,

⁹“No ibaga ti ari a mangipakitakayo iti milagro a pammaneknek a naibaonkayo, ibagam ken Aaron nga ipurruakna ti sarukodna iti sangoanan ti ari ket agbalinto nga uleg.”

¹⁰Napan da Moises ken Aaron iti ari. Kas imbilin ni Yahweh, impurruak ni Aaron ti sarukodna iti sangoanan ti ari ken dagiti ofisialesna ket nagbalin nga uleg.

¹¹Inayaban ti ari dagiti mamasirib ken dagiti salamangkerona ket babaen iti salamangkada, inaramidda met ti inaramid ni Aaron.

¹²Impurruakda dagiti sarukodda. Nagbalin met nga uleg dagiti sarukod ngem inalun-on ida ti sarukod ni Aaron.

¹³Nupay kasta, nagtalinaed a natangken ti puso ti ari ket, kas kinuna ni Yahweh, dina impangag ida.

¹⁴Kinuna ni Yahweh ken ni Moises, “Nasubeg la unay ti ari, ket dina kayat a papanawen dagiti tattao.

¹⁵Inton bigat, alaem ti sarukod a nagbalin nga uleg ket inka idiay Karayan Nile. Urayem ti ari iti igid ti danum.

¹⁶Ibagam kenkuana nga imbaonnaka ni Yahweh a Dios dagiti Hebreo tapno kiddawek a palubosanna dagiti tattaok a mapan agdaydayaw kaniak idiay let-ang. Ibagam kenkuana nga agingga ita, dipay nangipangpangag.

¹⁷Ibagam nga imbagak a maammoannanto a siak ni Yahweh babaen iti parnuayenna a didigra. Ibagamto kenkuana a yablatmonto ti sarukod iti danum ti karayan; agbalinto a dara ti danum.

¹⁸Ibagam a matayto dagiti lames; agbuyokto ti karayan, ket karugitto dagiti Egipcio nga inumen ti danumna.”

¹⁹Kinuna ni Yahweh ken ni Moises, “Ibagam ken ni Aaron nga ilayatna ti sarukodna kadagiti dandanum ti Egipto: kadagiti karayan, kanal ken dan-aw. Agbalinto a dara dagiti danum ket addanto dara iti entero a daga uray pay kadagiti burnay ken pagkargaan iti danum.”

²⁰Tinungpal da Moises ken Aaron ti imbilin ni Yahweh. Iti sangoanan ti ari ken dagiti ofisialesna, inyablat ni Aaron ti sarukodna iti karayan ket nagbalin a dara ti danumna.

²¹Natay dagiti lames, ket gapu ta kasta unay ti buyok ti karayan, saan a mainum dagiti Egipcio ti danumna. Nagbalin met a dara ti amin a danum iti entero nga Egipto.

²²Ngem nagsalamangka dagiti salamangkero ti Egipto; kasta met ti inaramidda. Ad-adda manen a timmangken ti puso ti ari. Dina impangag da Moises ken Aaron a kas iti kinuna ni Yahweh.

²³Nagawid ketdi iti palasiona ket dina pulos inkaskaso uray pay daytoy.

²⁴Kabayatanna, nagkali dagiti amin nga Egipcio iti igid ti karayan tapno adda pangalaanda iti inumenda ta dida mainum ti aggapu iti karayan.

²⁵Pito nga aldaw ti limmabas manipud inyeg ni Yahweh ti didigra iti karayan.