Read Iloko Exodus 8 Bible Online

Exodus 8 - Iloko bible

Exodus 8

¹Kalpasanna, kinuna ni Yahweh ken ni Moises, “Inka ibaga iti ari a kastoy ti kuna ni Yahweh, ‘Palubosam dagiti tattaok tapno umayda agdaydayaw kaniak.

²No agkedkedka, mangyegak iti adu a tukak a pangdidigra iti entero a pagiliam.

³Mapnonto ti karayan iti tukak. Sumang-atdanto ket serkenda ti palasiom, ti kuartom ken ti katrem. Sumrekdanto met kadagiti balay dagiti ofisialesmo ken dagiti tattaom, agraman dagiti paglutlutoam ken dagiti pagmasmasaam iti tinapay.

⁴Kalay-atendakanto, kasta met dagiti tattaom ken dagiti amin nga ofisialesmo.’”

⁵Kinuna pay ni Yahweh ken ni Moises, “Ibagam ken ni Aaron nga ilayatna ti sarukodna kadagiti karayan, kanal ken dan-aw, tapno sumang-at dagiti tukak ket agsaknapda iti daga ti Egipto.”

⁶Kasta ti inaramid ni Aaron iti sarukodna kadagiti dandanum ti Egipto. Simmang-at dagiti tukak ket nagsaknapda iti entero a pagilian.

⁷Ngem babaen iti salamangka dagiti salamangkero, kastoy met ti inaramidda ket timmakdang dagiti tukak.

⁸Pinaayaban ti ari da Moises ken Aaron, ket kinunana, “Idawatyo iti Apo nga ikkatenna dagitoy a tukak ket palubosakon dagiti tattaoyo a mapan agidaton iti Apo.”

⁹Kinuna ni Moises iti ari, “Mapadayawanak a mangikararag kenka. Maikkatto dagiti tukak ket idiayto laeng karayan ti pakasarakan kadakuada. Kaanonto ti kayatmo a panagdawdawatko?”

¹⁰“Inton bigat,” insungbat ti ari. Kinuna ni Moises, “Matungpal ti kiddawmo tapno maammoam nga awan ti kapada ti Apo a Diosmi.

¹¹Mapukawton dagiti tukak iti ayanmo, iti ayan dagiti ofisialesmo ket awanton ti mabati malaksid kadagiti adda iti Karayan Nile.”

¹²Iti kasta, pimmanaw da Moises ken Aaron ket dinawat ni Moises ken ni Yahweh nga ikkatenna dagiti tukak nga inyegna iti ari.

¹³Pinatgan ni Yahweh ti dawat ni Moises. Natay dagiti tukak kadagiti balbalay, paraangan ken taltalon.

¹⁴Binumbunton dagiti natay a tukak nga inummong dagiti Egipcio ket nagadiwara ti buyokda iti Egipto.

¹⁵Ngem idi makita ti ari nga awanen dagiti tukak, timmangken manen ti pusona ket dina impangag da Moises ken Aaron, kas kinuna ni Yahweh.

¹⁶Kalpasanna, kinuna ni Yahweh ken ni Moises, “Ibagam ken ni Aaron nga ibautna ti sarukodna iti daga tapno agbalin a timel dagiti tapok iti entero nga Egipto.”

¹⁷Imbaut ni Aaron ti sarukodna iti daga. Nagbalin a timel dagiti tapok iti amin nga Egipto ket kimpetda kadagiti tattao ken animal.

¹⁸Pinadas met dagiti salamangkero nga inusar ti salamangkada tapno agruar dagiti timel, ngem dida nabaelan. Tinimel amin a tattao ken animal.

¹⁹Kinuna dagiti salamangkero iti ari, “Aramid ti Dios daytoy.” Ngem natangken latta ti ulo ti ari ket dina impangag da Moises ken Aaron, kas iti kinuna ni Yahweh.

²⁰Kalpasanna, kinuna ni Yahweh ken ni Moises, “Inton agsapa, urayem ti ari idiay karayan ket ibagam kenkuana a kastoy ti kuna ni Yahweh, ‘Palubosam a pumanaw dagiti tattaok tapno umayda agdaydayaw kaniak.

²¹Ballaaganka a no dimo kayat, dusaenka babaen iti panangibaonko iti pinangen a ngilaw kadagiti ofisialesmo ken kadagiti tattaom. Mapnonto iti ngilaw dagiti balbalay dagiti Egipcio ket agsaknapdanto iti daga.

²²Ngem ilisikto ti daga ti Gosen a pagnaedan dagiti tattaok, ket awanto ti ngilaw sadiay. Aramidek daytoy tapno maammoam a siak, ni Yahweh, ti mannakabalin iti daytoy a daga.

²³Ilasinkonto dagiti tattaok kadagiti tattaom. Maaramidto daytoy a milagro inton bigat.’”

²⁴Inaramid ni Yahweh daytoy, ket pinangen a ngilaw ti napan iti palasio ti ari, kadagiti balbalay dagiti ofisialesna ken iti entero nga Egipto. Nadadael ti pagilian gapu kadagiti ngilaw.

²⁵Gapu itoy, pinaayaban ti ari da Moises ken Aaron ket kinunana, “Ala, inkay agidaton iti Diosyo ngem ditoy laeng sakup ti Egipto ti pangaramidanyo.”

²⁶“Saan a mabalin a ditoy Egipto,” kinuna ni Moises. “Kaguradakanto dagiti Egipcio no makitadakami nga agidatag kadagiti animal a makarimon kadakuada. No usarenmi dagitoy nga animal a pagidatonmi iti Apo a Diosmi iti lugar a pakakitaanda kadakami, makaguradanto, ket batoendakami agingga a mataykami.

²⁷Masapul nga iti let-ang ti pagidataganmi iti daton iti Apo a Diosmi, a kas iti imbilinna kadakami, ket tallo nga aldaw nga agbiahekami a mapan sadiay.”

²⁸Kinuna ti ari, “Palubosankayo a mapan agidaton iti Apo a Diosyo iti let-ang ngem saankayo nga umadayo unay. Ikarkararagandak.”

²⁹Kinuna ni Moises, “Apaman a makapanawak, dawatek iti Apo nga ikkatenna dagiti ngilaw tapno inton bigat, awandanton kenka, kadagiti ofisialesmo ken kadagiti tattaom. Ngem dinakam allilawen manen. Dimo lapdan dagiti tattao a mapan agidatag iti daton iti Apo.”

³⁰Pimmanaw ni Moises ket nagkararag ken ni Yahweh.

³¹Pinatgan ni Yahweh ti dawatna. Pinanawan dagiti ngilaw ti ari, dagiti ofisialesna ken dagiti tattaona. Awan ti uray maysa a ngilaw a natda.

³²Ngem kaskasdi latta a timmangken ti puso ti ari ket dina pinalubosan a pumanaw dagiti tattao.