Read Iloko Exodus 9 Bible Online

Exodus 9 - Iloko bible

Exodus 9

¹Kinuna ni Yahweh ken ni Moises, “Inka iti ari ket kunam a paibaga ni Yahweh, ti Dios dagiti Hebreo, a palubosanna a pumanaw dagiti Israelita tapno umayda agdaydayaw kaniak.

²No lapdannakayo manen,

³yegko a pangdusak kenkuana ti maysa nga angol a mangikisap kadagiti animalna—dagiti kabalio, asno, kamelio, baka, karnero ken kalding.

⁴Ilasinkonto dagiti animal dagiti Israelita kadagiti animal dagiti Egipcio. Awanto ti matay nga animal dagiti Israelita.

⁵Siak, ni Yahweh, intudingko ti oras ket mapasamakto daytoy inton bigat.”

⁶Iti sumuno nga aldaw, tinungpal ni Yahweh ti imbagana. Natay amin nga animal dagiti Egipcio, ngem awan natay nga animal dagiti Israelita.

⁷Dinamag ti ari no ania ti napasamak ket naammoanna nga awan ti natay nga uray maysa nga animal dagiti Israelita. Ngem kaskasdi a natangken ti pusona ket dina pinalubosan dagiti tattao.

⁸Kalpasanna, kinuna ni Yahweh kada Moises ken Aaron, “Mangrakemkayo iti dapu iti urno. Ipurruakto ni Moises daytoy iti ngato iti imatang ti ari.

⁹Kaslanto tapok nga agwaras iti entero nga Egipto ket pataudennanto dagiti letteg nga agbalin a gaddil kadagiti tattao ken animal iti amin a lugar.”

¹⁰Nangalada iti dapu sada napan nagtakder iti sango ti ari. Impurruak ni Moises ti dapu iti ngato ket nagtubo ti letteg kadagiti tattao ken kadagiti animal. Nalapunosda iti letteg.

¹¹Kas kadagiti dadduma nga Egipcio, nagsagaba met dagiti salamangkero iti gaddil. Nalapunos ti bagida iti gaddil ket saanda nabalinan ti sumango ken ni Moises.

¹²Ngem pinatangken ni Yahweh ti ulo ti ari. Dina latta impangag da Moises ken Aaron a kas kinuna ni Yahweh ken ni Moises.

¹³Kinuna ni Yahweh ken ni Moises, “Inton bigat, sapaem ti mapan iti ari. Ibagam kenkuana a kastoy ti bilin ni Yahweh, ti Dios dagiti Hebreo, a palubosanna dagiti tattaok tapno umayda agdaydayaw kaniak.

¹⁴Ta itan, saan laeng nga isu ti dusaek no di pay ket dagiti ofisialesna ken dagiti tattao iti sakupna tapno maammoanna nga awan ti kapadak iti entero a lubong.

¹⁵No kinayatko nga inyeg ti didigra a sakit kenkuana ken kadagiti tattaona, natayda koma amin itan.

¹⁶Ngem saanko nga inaramid ti kasta tapno ipakitak kadakuada ti pannakabalinko tapno agsaknap ti kinalatakko iti entero a daga.

¹⁷Ngem natangsit latta ket dina kayat a pumanaw dagiti tattaok.

¹⁸Iti kasta, pagtudoekto iti yelo iti kastoy nga oras inton bigat. Daytoyto ti kakaroan a panagtudo iti yelo iti pakasaritaan ti Egipto.

¹⁹Ibagam kenkuana a pailinongna dagiti animalna ken kasta met nga aglinong dagiti tattao nga adda iti ruar ta matay dagiti amin a matinnagan.”

²⁰Nagbuteng ti sumagmamano nga ofisiales ti ari gapu iti sao ni Yahweh ket pinaglinongda dagiti tagabu ken animalda.

²¹Ngem adda saan a nangikankano iti ballaag ni Yahweh ket binaybay-anda dagiti tagabu ken animalda iti ruar.

²²Kinuna ni Yahweh ken ni Moises, “Ilayatmo ta imam iti langit tapno agtinnag ti yelo kadagiti tattao, animal ken amin a mula iti entero nga Egipto.”

²³Intag-ay ni Moises ti sarukodna. Nagkimat ken naggurruod ket nagtinnag ti yelo iti Egipto. Inyeg ti Apo

²⁴ti kasta unay a yelo a napakuyogan iti agkanabsiit a kimat. Daytoy pay la ti kapigsaan a bagio ti yelo a dimteng iti pagilian manipud nabangon a nasion.

²⁵Iti entero nga Egipto, natinnagan dagiti amin nga adda iti ruar, agraman dagiti tattao ken dagiti animal. Nadadael amin a mula iti away ket naspak amin a kaykayo.

²⁶Ti laeng deppaar ti Gosen a pagnaedan dagiti Israelita ti awan nagtinnag a yelo.

²⁷Pinaayaban ti ari da Moises ken Aaron ket kinunana kadakuada, “Bigbigek itan a siak ti nagbasol! Nalinteg ti Apo. Siak ken dagiti tattaok ti nakabasol.

²⁸Ikararagandakami iti Apo ta madidigrakami la unayen iti gurruod ken yelo. Ikarik a palubosankayon a pumanaw; saankayon nga agyan ditoy.”

²⁹Kinuna ni Moises kenkuana, “Apaman a makaruarak iti siudad, agkararagakto iti Apo. Sumardengton ti gurruod ket awanton ti agtinnag a yelo, tapno maammoam a ti Apo ti akinkukua iti daga.

³⁰Ngem ammok a sika ken dagiti ofisialesmo diyo pay la kabuteng ti Apo a Dios.”

³¹Nadadael dagiti lino ken dagiti sebada agsipud ta natangkenanen ti dawa dagiti sebada ken nakabuselen dagiti lino.

³²Ngem saan a naan-ano dagiti trigo ken senteno ta maladaw a matangkenan dagiti dawada.

³³Pinanawan ni Moises ti ari. Rimmuar iti siudad ket intayagna dagiti imana a nagkararag iti Apo. Simmardeng ti gurruod ken tudo ket awanen ti nagtinnag a yelo.

³⁴Idi makita ti ari ti napasamak, nagbasol manen ket nagtalinaed a natangken ti pusona, kasta met dagiti ofisialesna.

³⁵Dina pinalubosan a pumanaw dagiti Israelita kas imbaga ni Yahweh ken ni Moises.