Read Iloko Job 13 Bible Online

Job 13 - Iloko bible

Job 13

¹Nangnangngegko idin dagiti ibagbagayo; maawatak amin ida. Ammok met ti ammoyo; saanak a nababbaba ngem dakayo.

³Ngem ti Dios ti kasuppiatko, saan a dakayo; kayatko ti makilinnawag kenkuana.

⁴Agulbodkayo a pangkalub iti kinanengnengyo; kaskay la doktor nga awan mapaimbagna.

⁵Naim-imbag pay nga agulimekkayo, bareng adda mangipagarup a masiribkayo.

⁶Denggenyo ti rasonko a mangikalintegan iti kasasaadko.

⁷Apay nga agul-ulbodkayo? Ipagarupyo aya a matulonganyo ti Dios iti panagulbodyo?

⁸Salsalaknibanyo kadi ti Dios? Ikalkalinteganyo kadi iti pangukoman?

⁹No sukimatennakayo ti Dios, makasarak ngata iti imbag kadakayo? Maallilawyo kadi ti Dios a kas panangallilawyo iti tao?

¹⁰Uray no ilimedyo ti panangidumdumayo, awan duadua a tubngarennakayto,

¹¹ket kigtotennakayto ti pannakabalinna.

¹²Kasla dapu nga awan serbina dagiti proberbioyo; nalupoy a kas pitak dagiti rasonyo.

¹³Agulimekkayo ket pagsawendak ket sungbatak ti aniaman a mapasamak.

¹⁴Sisasaganaak a mangipusta iti biagko.

¹⁵Napukawen ti amin a namnamak, ket uray no patayennak ti Dios, ikalintegak latta ti bagik kenkuana.

¹⁶Nalabit a ti turedko ti pakaispalak, yantangay ta awan ti managdakdakes a makaitured a sumango iti Dios.

¹⁷Ita, denggenyo a naimbag ti innak ipalawag.

¹⁸Sisasaganaak a mangitakder iti kalintegak, agsipud ta ammok a nalintegak.

¹⁹O Dios, no idarumnak ket mapaneknekam a nagbasolak, sumardengakon nga agsao ket madadaanak a matay.

²⁰Adda dua a banag a dawatek kenka; umanamongka ket dika ilemmengan:

²¹Isardengmon ti panangparigatmo kaniak, ken dinak patayen iti buteng.

²²Agsaoka nga umuna, O Dios, ket sumungbatak, wenno siak ti umuna nga agsao ket sungbatannak.

²³Ania aya dagiti biddut ken labsingko? Ania kadi dagiti basolko?

²⁴Apay aya a lislisiannak? Apay a maysa a kabusor ti pangibilangam kaniak?

²⁵Butbutngem kadi ti maysa la a bulong? Darupem aya ti maysa la nga arutang?

²⁶Nakaro dagiti pammabasolmo kaniak, ket ibilangmo pay dagiti basolko idi ubingak.

²⁷Kawaram pay dagiti sakak; sipsiputam ti tunggal addangko, ammirisen pay dagiti tugotko.

²⁸Ket pagangayanna, madalupisakak a kasla narukop a kayo; kaslaak la pagan-anay a sinanga.