Read Iloko Job 14 Bible Online

Job 14 - Iloko bible

Job 14

¹Agpapadatay amin a nakapuy ken awan mabalbalinna, ababa ken napno iti rigat ti biagtayo.

²Dumakkel ken malaylaytayo a kas iti sabong; agpukawtayo a kas iti anniniwan.

³Kitaennak pay kadi, O Dios, wenno isaklangnakon ket ipaulogmo ti pangngeddengmo?

⁴Adda kadi nadalus nga agtaud iti narugit a tao?

⁵Naitudingen dagiti aldawna; naikeddengen ti kaatiddog ti biagna. Inkeddengmon ti kaatiddogna, ket saanen a mabaliwan.

⁶Dimo talliawenen ket panawamon bay-am a ragragsakenna ti biagna a napno iti kinarigat.

⁷No mapukan ti maysa a kayo, mabalin nga agsaringitto manen ket dinto sumardeng nga aguggot.

⁸Uray no lumakay dagiti ramutna, ket matay ti puonna iti daga,

⁹no la ket adda danum, agsaringit ken agsanganto a kas iti apagtubo a mula.

¹⁰Ngem matay ti tao, ket daytan ti gibusna. Mauyos ti biagna, agpatinggan ti kaaddana.

¹¹Kas iti karayan nga agsardeng ti panagayusna wenno kas iti dan-aw nga agmaga

¹²matay ti tao, awanton ti ibabangonna. Didanto agriing uray awanen dagiti langit; pulos a didanton agkuti iti turogda.

¹³Ilemmengnak koma iti lubong dagiti natay; wen, ilingednak koma agingga nga agbaaw ti pungtotmo; kalpasanna, tudingam ti tiempo a pananglagipmo kaniak.

¹⁴No matay ti tao, agbiagto aya manen? Ngem urayek ti nasaysayaat a tiempo agingga nga agpatingga daytoy agdama a rigatko.

¹⁵Kalpasanna, ayabannakto ket sumungbatak; maay-ayokanto kaniak a parsuam.

¹⁶Sipsiputamto dagiti addangko, ngem dimonton kitaen dagiti basolko.

¹⁷Pakawanem ken pukawemto dagiti salungasingko, ket punasemto amin dagiti labsingko.

¹⁸Dumtengto ti panagreggaay dagiti bantay; mayalisto pay dagiti dadakkel a bato.

¹⁹Runotento ti danum dagiti bato, ket ti daga yanudto ti napigsa a tudo; kasta ti panangpukawmo iti namnama ti tao.

²⁰Parmekem ti tao ket pukawem iti agnanayon; agbaliw ti rupana iti ipapatayna.

²¹Makagun-od dagiti annakna iti pammadayaw ngem pulos a saanna a maammoan; awan mangibaga kenkuana no maibabainda.

²²Ti laeng ut-ot ti bagina ti mariknana ken ti leddaang ti pusona.