Read Iloko Job 15 Bible Online

Job 15 - Iloko bible

Job 15

¹Job, ubbaw dagiti imbalikasmo, ubbawda!

³Awan ti masirib nga agsao a kas kenka wenno mangikalintegan iti bagina kadagiti awan serserbina a sao.

⁴Dagiti agbuteng iti Dios maupayda; lapdam ida nga agkararag kenkuana.

⁵Ti basolmo ti mamagsao kenka; ab-abbongam dagiti basolmo kadagiti nasikap a sao.

⁶Saan a masapul nga ikeddengko a nagbasolka; dagiti met la saom ti mangukom kenka.

⁷Ipagarupmo aya a sika ti kaunaan a nayanak? Addaka kadin idi parsuaen ti Dios dagiti bantay?

⁸Nangngegmo kadi dagiti panggep ti Dios? Siksika la aya ti tao nga adda ammona?

⁹Ammomi amin ti ammom.

¹⁰Nagtaud ti kinasiribmi kadagiti ub-ubanan a lallakay, lallaki a nayanak sakbay ni amam.

¹¹Liwliwaennaka ti Dios ngem dimo ikaskaso; iti naganna, naalumamay dagiti saomi ngem dimo ikankano.

¹²Nupay kasta, masair ta riknam, ket sipupungtotka a mangkuskusilap kadakami.

¹³Kapungtotmo ti Dios, ket agsaoka pay iti maibusor kenkuana.

¹⁴Adda aya tao a nadalus? Adda kadi nalinteg iti imatang ti Dios?

¹⁵Di pay talken ti Dios dagiti anghelesna; uray isuda, saanda a nadalus iti imatangna.

¹⁶Anianto ketdin ti narukop a tao nga awan serserbina, Arub-obenna ti dakes a kas iti danum nga inumenna.

¹⁷Dumngegka, Job, ta ibagak ti ammok.

¹⁸Insuro dagiti mamasirib kaniak ti pudno a naadalda kadagiti ammada, ket awan inlimlimedda.

¹⁹Awan ti mangyadayo kadakuada iti Dios, ta awan ganggannaet a nakipagtaeng kadakuada.

²⁰Ti dakes a tao a mangirurumen, agtutuokto bayat ti panagbiagna.

²¹Nakabutbutengto nga ikkis dagiti mangngegna; no ipagarupna nga awan ti pakaan-annoanna, serken dagiti mannanakaw ti balayna.

²²Awan namnamana a makaaon iti sipnget, ta agur-uray ti kampilan a mangpapatay kenkuana.

²³Agur-uray met dagiti buitre a mangsida iti bangkayna. Ammona a nasipnget ti masakbayanna,

²⁴ta agur-uray kenkuana ti pannakadadael kas nabileg nga ari a mangdarup kenkuana.

²⁵Kasta ti pagtungpalan ti tao a bumusor iti Dios, ti pagbanagan ti agsukir iti Mannakabalin-amin.

²⁶Napalangguad ken nasukir ti kasta a tao; sitatangsit a mangitag-ay iti kalasagna, ket agdarasudos a mangsaranget iti Dios.

²⁸Dayta ti tao a nangsakup kadagiti siudad ken nangtagikua kadagiti balbalay a dagiti akinkukua pimmanawda ngem madadaelto dagitoy inton adda gubat.

²⁹Dinto agbayag ti kinabaknangna; dinto met agpaut ti sanikuana. Mapukawto uray ti anniniwanna

³⁰ket dinanto malisian ti sipnget. Mayarigto iti kayo a mauram dagiti sangsangana, ken ipalais ti angin dagiti sabongna.

³¹No maag nga agtalged iti kinadakesna, kinadakes met laeng ti apitenna.

³²Malaylayto sakbay ti naikeddeng a tiempona, ket saanton a lumangto dagiti sangana.

³³Kaslanto iti ubas a maregreg dagiti bungana sakbay a maluomda; kaslanto iti olibo nga agtinnag dagiti sabongna.

³⁴Awanto ti kaputotan dagiti awan Diosna; mauramto dagiti balay a nabangon gapu iti pasuksok.

³⁵Dagitoy dagiti tattao a dakes ti panggepda; panangallilaw ti kanayon a pampanunotenda.