Read Iloko Job 16 Bible Online

Job 16 - Iloko bible

Job 16

¹Nangngegkon dagita a sasao; padagsenandak laeng kadagita a panangliwliwayo.

³Dikay pay laeng aya sumardeng a sao a sao? Dakayo laengen ti mapatpati ti saona?

⁴No dakayo ti adda iti lugarko, mabalinko met a sawen ti ibagbagayo. Mabalinkay met a wingiwingan, layusenkayo iti adu a sao.

⁵Mapapigsakayo met kadagiti pammagbagak; diak met sumardeng nga agsasao a mangliwliwa kadakayo.

⁶Ngem awan ti maitulong ti amin a sasawek; di met maep-ep dagiti ut-otko no agulimekak.

⁷Inibusmo, O Dios, ti amin nga adda kaniak; binaybay-am a napapatay ti familiak.

⁸Tiniliwnak, sika ti kabusorko. Kudil laengen ti nangbungon kadagiti tulangko, ket dayta ti ibilang dagiti tattao a pammaneknek a nakabasolak.

⁹Iti pungtot ti Dios, lasanglasangennak; urayna la kagaten ti bibigna gapu iti gurana kaniak.

¹⁰Guyabandak dagiti tattao; aribungbongandak ket tungpaendak.

¹¹Inyawatnak ti Dios kadagiti managdakdakes.

¹²Natalna idi ti panagbiagko, ngem binekkelnak ti Dios, ket dinudog ken indumudomnak. Aramatennak a pagsanayanna iti panagpana,

¹³ket panaenna ti amin a sikigak kadagiti pana a mangdunor ken mangsalput kaniak; uray kasta, pulos a dinak kaasian.

¹⁴Saan a mauma a mangdundunor kaniak; kasla agpagunggan a mannakigubat a mangdarup kaniak.

¹⁵Agladingitak ket agpanesak iti nakersang a lupot; agtugawak iti katapokan gapu iti pannakaparmekko.

¹⁶Nakalablabbagan toy rupak iti kasasangit; lumlumbeg ken lumitlitem payen dagitoy matak.

¹⁷Ngem awan ti inaramidko a kinaranggas, ket napasnek ti kararagko iti Dios.

¹⁸O daga, dimo kaluban dagiti dakes a naaramid kaniak! Ipalubosmo a mangngeg ti asugko a mangtunton iti kalintegak.

¹⁹Sadi langit, adda mangkanunong ken mangitakder kaniak.

²⁰Umsiendak dagiti gagayyemko; agarubos dagiti luluak iti Dios.

²¹Adda koma mangikalintegan kaniak iti Dios, kas panangitakder ti maysa a tao iti gayyemna.

²²Bassiten ti nabati nga aldawko, ket magnaakton iti dalan nga awan ti makasubli.