Read Iloko Job 17 Bible Online

Job 17 - Iloko bible

Job 17

¹Asidegen ti ipapatayko. Mapugsaten ti angesko; agur-urayen ti tanemko.

²Malikmutak kadagiti manglalais kaniak iti sadinoman a papanak.

³Napudnoak, O Dios; patiem koma ti saok! Awanen ti uray maysa a kumanunong kaniak.

⁴O Dios, kinullaapam ti panunotda ket dida makaawat; dimo ipalubos nga abakendak.

⁵Adda pagsasao a gapu iti kuarta, liputan ti maysa a tao dagiti gagayyemna, ket agsagaba dagiti annakna gapu iti dayta.

⁶Ita, aramatenda daytoy a pagsasao a maibusor kaniak, ket umayda tupraan ti rupak.

⁷Dandanin diak makakita gapu iti ladingitko; nakakutkuttongen dagiti takkiag ken luppok.

⁸Makigtot dagiti agkunkuna a nalintegda, ket kunada amin nga awan Diosko.

⁹Dagiti agkuna a nataknengda, umad-adda ti panangipapanda a nalintegda.

¹⁰Ngem no umayda amin agparang kaniak, awan ti uray maysa a masirib a masarakak.

¹¹Naglabasen dagiti aldawko; saan a natungpal dagiti arapaapko, napukawen ti namnamak.

¹²Ngem kuna dagiti gagayyemko a nagbalin nga aldaw ti rabii. Kunada nga asidegen ti panaglawagna, ngem addaak pay met la iti sipnget.

¹³Ti la namnamakon isut' panagtaengko iti lubong dagiti natay a pagiddaak a maturog iti sipnget.

¹⁴Kunakto a ti tanem isut' amak ket dagiti igges nga agkaan kaniak, isuda ti inak ken kakabsatko a babbai.

¹⁵Sadino ngarud ti ayan ti namnamak? Adda kadi makakita iti namnamak?

¹⁶Saan a kumuyog kaniak ti namnama inton mapanak iti lubong dagiti natay.