Read Iloko Job 18 Bible Online

Job 18 - Iloko bible

Job 18

¹Job, dika pay la sumardeng nga agsasao? No agsardengka ket dumngegka mabalinmi ti makisarita kenka.

³Apay nga ibilangnakami a kas iti nakuneng a baka?

⁴Dangdangram la ta bagim iti pungtotmo. Maulila aya ti daga wenno yalis ti Dios dagiti bantay gapu kenka?

⁵Maiddepto ti silaw ti managdakdakes, ket pulos a dinto magangtanen.

⁶Kumudrep ken maiddepto ti pagsilawan iti taengna.

⁷Natibker idi ti pannagnana, ngem ita maitibkolen; maidaramudom gapu iti bukodna a pammagbaga.

⁸Magna iti lugar nga adda batengna, ket agturong iti pakaipalab-oganna.

⁹Masiloan dagiti mukodna, ket maparautan a naimbag.

¹⁰Adda palab-og a nailemmeng iti daga, adda silo a naipakat iti dalanna.

¹¹Nalikmut iti nakaro a pammutbuteng; sumursurot kenkuana iti sadinoman a papananna.

¹²Nabaknang idi ngem ita agbisinen; agur-uray kenkuana ti didigra.

¹³Agwaras ti nakaro a sakit iti bagina, ket runotenna dagiti takkiag ken luppona.

¹⁴Maitalaw iti nagtaenganna a sitatalged, ket maiguyodguyod a maisaklang ken ni Ari Patay.

¹⁵Ita, mabalinen ti agnaed iti balayna; nawarakiwakanen iti asufre a pangdalus iti taengna.

¹⁶Magango dagiti ramutna, ket malaylay dagiti sangana.

¹⁷Saanen nga agdindinamag iti ilina ken iti sabali a lugar; awanen ti makalagip kenkuana.

¹⁸Mapagtalawto iti taeng dagiti sibibiag; maipanto iti sipnget, maipanaw iti lawag.

¹⁹Awan ti natda a kaputotanna; awan ti nakalasat uray la koma no maysa.

²⁰Iti amin a disso a makadamag iti napasamakna, agpigergerto dagiti tattao gapu iti daksanggasat a nagbanaganna.

²¹Kasta ti pagtungpalan dagiti managdakdakes; kasta ti pagbanagan dagiti di mangikankano iti Dios.