Read Iloko Job 19 Bible Online

Job 19 - Iloko bible

Job 19

¹Apay a didak sardengan a tutuoken babaen kadagiti sasaoyo?

³Dikay agsardeng a mangpabpabain kaniak; awan kadi bainyo ta lalaisendak?

⁴No kas pangarigan nagbasolak, ania koma ti pakaibianganyo?

⁵Ipagarupyo a naim-imbagkayo ngem siak, ket ibilangyo ti rigatko a mangipaneknek a nakabasolak?

⁶Saanyo kadi a makita a ti Dios ti akin-aramid iti daytoy? Nangipakat iti palab-og a pakatiliwak.

⁷Busorek ti kinaranggasna, ngem awan ti mangikaskaso kaniak. Awan dumngeg iti asugko nga agkiddaw iti hustisia.

⁸Binangenan ti Dios ti dalan ket diak makalasat; pinagsipngetna ti pagnaak.

⁹Innalana amin a sanikuak, ket inuksobna ti dayag ken dayawko.

¹⁰Pisangpisangennak iti amin a sikigak; kas iti mula, bag-otenna ti namnamak, ket bay-annak a malaylay ken matay.

¹¹Kasta unay ti pungtot ti Dios kaniak, ket imbilangnak a kadaksan a kabusorna.

¹²Ibaonna ti armadana a mangdarup kaniak; agkalida iti abut a paglingedanda, ket lakubenda ti taengko.

¹³Inyadayo ti Dios dagiti kakabsatko, ket binaybay-andak. Ganggannaetakon kadagiti makaam-ammo kaniak.

¹⁴Pinanawandakon dagiti kakabagiak; awan metten dagiti gagayyemko.

¹⁵Nalipatandakon dagiti sinangailik idi iti balayko; ibilangdak payen a ganggannaet dagiti babaonek.

¹⁶No ayabak ti maysa kadagiti adipenko, saan a sumungbat, uray no agpakpakaasiak a tulongannak.

¹⁷Saan a maibturan ni asawak ti sang-awko, didak pay asitgan dagiti kakabsatko.

¹⁸Laisen ken katawaandak dagiti ubbing a makakita kaniak.

¹⁹Karugitdak dagiti nadekket a gagayyemko; tinallikudandak dagiti ipatpategko.

²⁰Kudil ken tultulangko laengen ti natda; tantannawagakon ti ngarab ni patay.

²¹Kaasiandak kadi, dakayo a gagayyemko, ta nagdissuor kaniak ti ima ti Dios.

²²Apay nga idadanesdak a kas iti pampamay-an ti Dios kaniak? Dikay pay la aya mapnek a mangtutuok kaniak?

²³Adda la koma mangisurat kadagiti sasawek, ket ilanadna ida iti maysa a libro!

²⁴Wenno ikitikitna dagiti balikasko iti bato, ket ilanadna ida tapno mataginayonda!

²⁵Ngem ammok nga adda maysa sadi langit nga umayto iti kamaudianan a mangikalintegan kaniak.

²⁶Uray kalpasan a runoten ti sakit toy kudilko, makitakto ti Dios iti daytoy a bagik.

²⁷Makitakto a mismo ti Dios, ket saanto a ganggannaet kaniak. Napukaw ti turedko gapu ta kinunayo,

²⁸“Kasano ti panangparigattayo kenkuana?” Nagbirokkayo iti panggapuanyo a mangkabil kaniak.

²⁹Ngem ita, agbutengkay iti kampilan— ti kampilan a mangyeg iti pungtot ti Dios iti basol tapno maammoanyo nga adda maysa a mangukom.