Read Iloko Job 2 Bible Online

Job 2 - Iloko bible

Job 2

¹Idi dumteng ti aldaw a panagparang dagiti nailangitan a parsua iti imatang ni Yahweh, naitallaong manen ni Satanas.

²“Sadino ti naggapuam?” sinaludsod ni Yahweh ken ni Satanas. Insungbat ni Satanas, “Sinursorko ti entero a daga.”

³Sinaludsod ni Yahweh, “Napaliiwmo kadi ni Job nga adipenko? Awan ti masarakan iti daga a kas kenkuana iti kinapudno ken awan pakapilawanna. Managbuteng kaniak ket saan nga agaramid iti dakes. Dinawatmo kaniak tapno palubosanka a mangdangran kenkuana nga awan gapgapuna. Ngem kaskasdi a nagtalinaed a napudno kaniak.”

⁴Simmungbat ni Satanas, “Kudil iti kudil. Isalda ti tao ti batogna a langit tapno agbiag.

⁵Ngem padasem ita a dangran ti bagina—awan duadua nga ilunodnaka!”

⁶“Ala, wen, yawatko kenka ni Job,” kinuna ni Yahweh ken ni Satanas. “Aramidem ti kayatmo kenkuana, ngem saanmo a patpatayen.”

⁷Pimmanaw ni Satanas iti sango ni Yahweh. Pinaggaddilna ni Job iti nakaar-arriek iti entero a bagina.

⁸Napan nagtugaw ni Job iti pagbasuraan. Nangala iti buong ti banga a pagikkatna kadagiti keggang ti gaddilna.

⁹Kinuna ti asawana, “Agtalinaedka pay la kadi iti kinapudnom iti Dios? Apay a dimo ilunod ti Dios tapno mataykan!”

¹⁰“Minamaag ti sasawem,” insungbat ni Job. “No mangted ti Dios iti imbag, awatentayo. Apay nga agreklamotayo no mangyeg iti rigat?” Ngem iti laksid ti panagsagaba ni Job, saan latta a nagsao iti maibusor iti Dios.

¹¹Tallo kadagiti gagayyem ni Job ti nakadamag iti didigra a napagtengna. Isuda da Elifaz a taga-siudad ti Teman, Bildad a taga-Sua ken Zofar a taga-Naama. Nagtutulagda a sarungkaran ni Job tapno liwliwaenda.

¹²Nasaripatpatanda ni Job idi adayoda pay laeng ngem dida nabigbig. Idi mailasinda nga isu gayam ni Job, nagsangit ken naganug-ogda. Gapu iti ladingitda, rinay-abda dagiti pagan-anayda sada nagipurruak iti tapok iti ngato ken kadagiti uloda.

¹³Kalpasanna, nakitugawda ken ni Job iti daga iti las-ud ti pito nga aldaw ken rabii. Awan ti nagsao kadakuada gapu iti nakitada a nakaro unay a panagsagabana.