Read Iloko Job 20 Bible Online

Job 20 - Iloko bible

Job 20

¹Job, riribukem toy panunotko. Diak maibturanen ti di sumungbat.

³Makapabain dagiti imbalikasmo, ngem ammok ti isungbatko kenka.

⁴Pagaammom a manipud un-unana, idi naisaad ti tao ditoy rabaw ti daga,

⁵awan ti managdakdakes a nagbayag ti ragsakna.

⁶Uray dumanon sadi langit ti kadakkelna wenno tumukno kadagiti ulep ti katayagna,

⁷maipalaisto a kas iti tapok. Agbalawto dagiti nakaam-ammo kenkuana no sadino ti napananna.

⁸Agpukawto a kas iti tagtagainep nga awan tugotna, kas iti parmata iti rabii saanton a makita.

⁹Agpukawto iti lugar a sigud a nagnanaedanna.

¹⁰Birokento dagiti annakna ti parabur dagiti napanglaw, ket isublinanto ti kinapanglawna.

¹¹Agkabannuag ken napigsa idi, ngem agbalinton a tapok ti bagina.

¹²Naimas ti panagramanna iti dakes; mangisakmol ken mulmolanna tapno nanamenna.

¹⁴Ngem pumait ti taraon iti tianna, a kas kapait iti apro ti uleg.

¹⁵Isarwa ti managdakdakes ti kinabaknang a tinakawna; payula ti Dios uray no addan iti tianna.

¹⁶Kasla sabidong ti aniaman a maalimonna; kasla gita ti uleg a mangpatay kenkuana.

¹⁷Dinanto makita dagiti karayan ti lana ti olibo wenno ti waig nga agayus iti gatas ken diro.

¹⁸Yawatnanto ti amin a nagbannoganna; dinanto mananam ti kinabaknang nga inurnongna.

¹⁹Ngamin, indadanesna dagiti napanglaw, ket binaybay-anna ida. Inagawna dagiti balay a binangon ti sabali.

²⁰Pulos a di mapnek iti kinaagumna.

²¹No mangan awan a pulos ti ibatina, ngem ita, aggibusen ti kinarang-ayna.

²²Iti alimpatok ti balligina, agtupakto kenkuana ti dagsen ti amin a kinadaksanggasat.

²³Bay-am nga aguma a mangan iti kaykayatna; dusaento ti Dios iti nakaro a pungtotna!

²⁴No landok a kampilan ket malisianna, tinto bronse a pana ti mangdaleb kenkuana.

²⁵Salputen ti pana ti bagina, ket agaruyot ti darana iti sumilsilap a murdongna; buteng ti manglapunos iti pusona.

²⁶Madadael ti amin nga urnongna; apuy, saan a tao, ti manguram kenkuana agraman amin a kameng ti familiana.

²⁷Ipalgak ti langit ti basol daytoy a tao, ket agsaksi ti daga a maibusor kenkuana.

²⁸Madadaelto amin a kinabaknangna inton idissuor ti Dios ti nakaro a pungtotna.

²⁹Amin a managdakdakes kastoy ti tungpalda, kastoy ti ikeddeng ti Dios a pagbanaganda.