Read Iloko Job 21 Bible Online

Job 21 - Iloko bible

Job 21

¹Denggenyo a nalaing ti innak ibaga; dayta la ti pangliwliwa a dawatek kadakayo.

³Palubosandak nga agsao ket kalpasanna, ituloyyo ti manglais kaniak no kayatyo.

⁴Saan a tao ti pakaiturongan toy asugko; adda gapuna a saanakon a makaan-anus.

⁵Mingmingandak no dikay maikuleng a makakita iti kasasaadko.

⁶No malagipko ti napasamak kaniak, maikulengak ket agpigergerak.

⁷Dagiti managdakdakes napaut ti biagda. Apay a palubosan ti Dios a rumang-ayda?

⁸Makitada ti idadakkel dagiti annak ken appokoda.

⁹Saan nga ipalubos ti Dios a dumteng ti didigra kadagiti balayda, ket agbiagda a natalged ken natalna.

¹⁰Agdakep dagiti bakada, ket nalaka ti panaganak dagiti kabaianda!

¹¹Agtataray ken agaayam dagiti annakda a kas kadagiti urbon a karnero.

¹²Agsasalada a buyogan ti arpa ken flauta.

¹³Narang-ayda iti unos ti panagbiagda, natalna ti ipapatayda ket dida agsagaba.

¹⁴Ibaga dagiti managdakdakes iti Dios a bay-anna ida. Dida kayat a maammoan ti pagayatanna iti panagbiagda.

¹⁵Kunada a dida masapul ti agserbi iti Dios, ket awan magunggonada nga agkararag kenkuana.

¹⁶Ipagarupda nga agballigida babaen iti bukodda a pigsa. Ngem diak patien ti kasta a kapanunotanda.

¹⁷Adda kadin managdakdakes a naiddep ti silawna? Addan aya maysa kadakuada a nadidigra? Addan aya dinusa ti Dios kadakuada iti pungtotna,

¹⁸tapno kasda la arutang a mayangin wenno taep nga itayab ti bagio?

¹⁹Kunayo a dusaen ti Dios ti ubing gapu kadagiti basol ti amana. Saan! Dagiti nagbasol koma ti rumbeng a dusaenna; ipakitana koma a kasta ti aramidenna gapu kadagiti salungasingda.

²⁰Rumbeng a sagabaen dagiti nagbasol ti mismo a dusada; ti pungtot ti Dios a Mannakabalin-amin masapul a riknaenda.

²¹No matayen ti tao, panunotenna pay kadi ti kasasaad dagiti annakna?

²²Adda kadi tao a makaisuro iti Dios idinto nga ukomenna dagiti natan-ok?

²³Adda tattao a nasalun-at agingga iti ipupusayda; naragsakda a matay ken awan pakariribukanda, awan ti sagubanitda, naimbag ti pannakataraonda.

²⁵Adda met dagiti awan a pulos ti ragsakda; agbiag ken nalidayda iti ipapatayda.

²⁶Ngem agpapadada a matay ken maitanem; padapadada met nga iggesen.

²⁷Ammok no ania ti pampanunotenyo a mangdangran kaniak.

²⁸Ammok a damagenyo no ayanna itan ti balay ti nabaknang, ti tao a nagar-aramid iti kinadakes.

²⁹Dikay aya nagsaludsod kadagiti agbibiahe? Diyo aya naammoan ti inyawidda a damag?

³⁰Iti aldaw nga agpungtot ti Dios, kanayon a ti managdakdakes ti maispal iti pannusana.

³¹Awan ti mangbabalaw iti managdakdakes wenno mangbales kenkuana iti amin nga inaramidna.

³²Inton maipan iti pakaitabonanna, iti nainget ti guardiana a tanemna, rinibu ti makipamumpon. Uray ti maigabor a daga nainayad nga agdisso iti bangkayna.

³⁴Ket dakayo, awan serserbi ti pangliwliwayo kaniak! Pasig nga ulbod ti imbagbagayo!