Read Iloko Job 24 Bible Online

Job 24 - Iloko bible

Job 24

¹Apay a di mangituding ti Dios iti aldaw a panangukomna tapno ipaulogna ti hustisia kadagiti agserserbi kenkuana?

²Dagiti tattao yalisda dagiti mohon ti daga tapno makagamgamda iti nalawlawa a sakupenda. Agtakawda kadagiti karnero, ket itiponda kadagiti arbanda.

³Takawenda dagiti asno dagiti ulila, ket alaenda ti baka ti balo a babai a pangigawidanda iti utangna.

⁴Ikkatenda ti kalintegan dagiti napanglaw, ket kapilitan nga aglemmengda gapu iti butengda.

⁵Mayarig dagiti napanglaw iti atap nga asno nga agsapul iti taraon idiay let-ang. Awan sabali a pagbirokanda iti kanen dagiti annakda.

⁶Kapilitan nga aganida iti talon a dida kukua, ket burasenda ti ubas dagiti managdakdakes.

⁷Maturogda iti rabii nga awan pagulesda wenno kagay a mangpapudot kadakuada.

⁸Maslepda iti tudo nga agtinnag kadagiti bantay, ket aglinongda kadagiti dadakkel a bato.

⁹Tagabuen dagiti managdakdakes dagiti ulila iti ama. Alaenda dagiti annak ti napanglaw a kas bayad ti utangna.

¹⁰Ngem rummuar dagiti napanglaw nga awan pagan-anayda; agan-anida latta uray no mabisinda.

¹¹Agpespesda kadagiti olibo a maaramid a lana, ken kadagiti ubas a maaramid nga arak, ngem isuda mawawda.

¹²Manipud siudad, rumkuas ti ikkis dagiti nasugat ken agbugbugsot, ngem saan nga ipangag ti Dios ti kararagda.

¹³Adda dagiti manglaksid iti lawag; no ania daytoy, saanda a maawatan ket saanda a suroten ti inna pagturongan.

¹⁴Parbangon a rummuar ti mammapatay, ket uloyanna ti napanglaw; rabii no mapan agtakaw.

¹⁵Aguray iti sumipnget sa rummuar ti mannakikamalala; lingdanna ti rupana tapno awan ti makabigbig kenkuana.

¹⁶Iti rabii, serken dagiti mannanakaw dagiti balbalay. Ngem aglemmengda iti aldaw ket liklikanda ti lawag.

¹⁷Kabutengda ti lawag ti aldaw, ngem awan amakda iti sipnget.

¹⁸Mayanud ti managdakdakes iti layus, ket ilunod ti Dios ti dagana; saanen a mapan agtrabaho iti kaubasanna.

¹⁹No kasano a marunaw ti niebe iti tiempo ti kalgaw, kasta met a mapukaw ti managbasol iti daga dagiti sibibiag.

²⁰Awan ti makalagip kenkuana, uray ti mismo nga inana; iggesen ket mapukan a kas iti kayo.

²¹Inlupitlupitna ngamin dagiti balo a babbai ken dina kinaasian dagiti babbai nga awan annakna.

²²Babaen iti pigsa ti Dios, dadaelenna ti nabileg. Agtignay ti Dios, ket matay ti managdakdakes.

²³Palubosan ti Dios nga agbiag a sitatalged, ngem kanayon a sipsiputanna.

²⁴Rumang-ay ti managdakdakes iti apagbiit ngem malaylay a kasla ruot, kasla garami a maparaspas.

²⁵Adda kadi makailibak iti daytoy? Adda kadi makaipaneknek a saan a pudno ti saok?