Read Iloko Job 27 Bible Online

Job 27 - Iloko bible

Job 27

¹Isapatak iti sibibiag a Dios a Mannakabalin-amin a nangikkat iti kalintegak ken nangpadagsen iti biagko:

³no la ket ikkannak ti Dios iti angesko, no la ket adda ti espiritu iti agongko,

⁴awanto ti dakes nga agaon iti ngiwatko, awanto ti kinaulbod nga innak isao.

⁵Uray inton ano, diak ibaga a dakayo ti husto, ngem ipapilitko nga awan ti basolko kabayatan nga adda pay ti angesko.

⁶Diak mamingga a mangibagbaga a nalintegak; nadalus ti konsensiak, awan ti mansak.

⁷Sapay koma ta amin a kabusorko, madusada a kas kadagiti managdakdakes ken nakillo.

⁸Ania pay ti namnama dagiti awan diosna inton oras nga alaen ti Dios ti biagda?

⁹Inton dumteng ti riribuk, denggen aya ti Dios ti dawatda?

¹⁰Rumbeng a tinarigagayanda ti rag-o nga ipaayna, ken kanayon koma a nagkararagda kenkuana.

¹¹Palubosandak a mangisuro kadakayo iti kadakkel ti pannakabalin ti Dios. Ilawlawagko ti plano ti Dios a Mannakabalin-amin.

¹²Ngem saanen a masapul, ta dakayo a mismo makitayo. Apay ngarud nga awan namaay ti sawenyo?

¹³Kastoy ti panangdusa ti Dios a Mannakabalin-amin kadagiti managdakdakes ken naranggas a tattao.

¹⁴Uray adu ti lallaki nga annakda, iti paggugubatan, mataydanto a sangapada; agkurangto ti taraon dagiti annakda.

¹⁵Agsakitto dagiti makalasat ket mataydanto, inton pumusayda, dinto agdung-aw dagiti baloda.

¹⁶Uray no adu unay ti pirak ti dakes a tao, ken ad-adu ti kawesna ngem ti kasapulanna.

¹⁷Addanto nalinteg a tao a mangala iti pirakna, addanto nalinteg a tao a mangikawes iti pagan-anayna.

¹⁸Agipatakder dagiti managdakdakes kadagiti taeng a kasla balay ti lawwalawwa, wenno kalapaw ti tagabu a taltalon ti ay-aywananna.

¹⁹Iti maudi a tiempoda, maturogdanto a nabaknang, ngem inton agriingda, awanen ti sanikuada.

²⁰Dumtengto a kellaat ti didigra a kas layus; iti rabii ipanawto ti angin ida.

²¹Addanto angin nga aggapu iti daya a mangitayab kadakuada manipud kadagiti taengda.

²²Agdissuorto ti angin nga awan asina kadakuada, didanto makalibas uray no ipakatda ti kabaelanda.

²³Bumanesbes ti angin bayat ti panagtarayda, ket agbutengda gapu iti bilegna a mangdadael kadakuada.