Read Iloko Job 29 Bible Online

Job 29 - Iloko bible

Job 29

¹Nagsao manen ni Job:

²Agsubli la koma ti sigud a kasasaad, dagidi panawen a panangaywan ti Dios kaniak.

³Kanayon idi a kadkaduaennak, ket linawaganna ti pagnaak.

⁴Isuda dagidi aldaw a kapigpigsak, idi salsalakniban ti Dios ti pagtaengak, gapu ta gayyemnak.

⁵Wen, adda idi kaniak ti Dios a Mannakabalin-amin; adda met dagiti amin nga annakko iti dennak.

⁶Adu idi ti gatas dagiti baka ken kaldingko; kadagiti kabatoan, dimmakkel dagiti bukodko nga olibo.

⁷No agtataripnong dagiti panglakayen ti siudad, ket makikatugawak kadakuada,

⁸wayaandak dagiti agtutubo a lallaki, ket tumakder dagiti lallakay a mangipakita iti panagraemda kaniak.

⁹Sumardeng nga agsao dagiti pangulo ti ili;

¹⁰agulimek uray pay dagiti natan-ok a tattao.

¹¹Nasayaat idi ti pakasarsaritaak kadagiti amin a makakita ken makangngeg iti maipapan kadagiti aramidko.

¹²No umasug idi dagiti napanglaw, tulongak ida; inarayatko dagiti ulila nga awan pagkamanganna.

¹³Indaydayawdak dagiti nagsagaba iti nakaro a rigat. Tinulongak dagiti balo, nga agbirok iti pagsanggiranda.

¹⁴Inkagumaak ti nalinteg a panagbiag; agpapada amin a tao, awan indumdumak.

¹⁵Nagserbiak a mata dagiti bulsek, nagpaayak a saka dagiti pilay.

¹⁶Nagbalinak a pannakaama dagiti napanglaw, ket inkalintegak dagiti ganggannaet a mailupitlupit.

¹⁷Dinadaelko ti bileg dagiti naranggas, ket inispalko dagiti rinanggasanda.

¹⁸Ninamnamak a napaut ti biagko ken natalna ti ipapatayko iti balayko.

¹⁹Arigko iti kayo a kanayon a nabasa ti ramutna ken malinlinnaawan dagiti sangana.

²⁰Kanayon nga idaydayawdak dagiti tattao, ket pulos a saanak a kimmapsut.

²¹Agulimek dagiti tattao no bagbagaak ida, ket denggenda a naimbag dagiti patigmaanko kadakuada.

²²Kalpasan ti panagsaok awan ti mainayonda; sumagepsep a kasla tudo ti saok kadakuada.

²³Sigagagardak nga urayen nga agsao, kas kadagiti mannalon nga aguray iti tudo.

²⁴Isemak ida no mapukawda ti tured-pakinakemda; mapapigsada a makakita iti daytoy naragsak a rupa.

²⁵Nagbalinak a panguloda, ket inkeddengko ti maaramid. Indalanko idi ida a kas iti panangidalan ti ari iti buyotna, ket liniwliwak ida idi naupayda.