Read Iloko Job 3 Bible Online

Job 3 - Iloko bible

Job 3

¹Kalpasan ti nabayag nga ulimek, nagsao ni Job ket inlunodna ti aldaw a pannakayanakna.

²O Dios, ilunodmo koma ti aldaw a pannakayanakko; ilunodmo koma ti rabii a pannakainawko.

⁴Pagsipngetem koma dayta nga aldaw, O Dios; dimo koma lagipen ken lawaganen dayta nga aldaw.

⁵Paglidemem ken pagsipngetem koma dayta nga aldaw; kumotam kadagiti ulep, ket abbongam ti init.

⁶Ikkatem dayta a rabii iti tawen, ket saanmon nga ibilbilang.

⁷Pagbalinem koma dayta a rabii a naliday; ikkatem ti amin a ragsakna.

⁸Bilinem dagiti baglan a mangilunod iti dayta nga aldaw, dagiti baglan a makabael a mangbilin iti Leviatan.

⁹Dimo koma pagraniagen ti baggak; dina koma makita ti bannawag.

¹⁰Ilunodmo koma dayta a rabii ta pinalubosannak a nayanak, ket inyawatnak iti ladingit ken rigat.

¹¹Natayak la koman idi addaak pay la iti tian ni inak, wenno idi apaman a nayanakak.

¹²Apay aya a sinaksaklotnak ni inak? Apay pay laeng a pinasusonak?

¹³No natayak la koma idin, agin-inanaak koma itan.

¹⁴Matmaturogak koman a kas kadagiti ari ken agtuturay a nangbangon manen kadagiti nadadael a palasio.

¹⁵Wen, matmaturogak koman a kas kadagiti prinsipe a nangpunno kadagiti balayda iti balitok ken pirak.

¹⁶Matmaturogak koman a kas kadagiti maladaga a natay a nayanak, a dida nakita ti lawag.

¹⁷Idiay tanem, agsardeng ti kinadakes dagiti nakillo, ket sadiay, aginanan dagiti nabannog iti trabaho.

¹⁸Uray pay dagiti balud adda talnada sadiay; saandan a maririawan ken mabugbugtak.

¹⁹Addada amin sadiay, dagiti natan-ok ken nanumo, ket siwawayawayan dagiti tagabu.

²⁰Apay a maikkan iti silaw ti tao nga agbiag a nakaay-ay-ay? Apay a maikkan iti biag ti tao a napnoan pait ti kararuana?

²¹Tarigagayanda ni patay, ngem saan met nga umay. Kaykayatda ti maitanem, ngem ti maaddaan iti uray ania a gameng.

²²Saanda a naragsak agingga a matay ken maitanemda.

²³Saan nga ipakaammo ti Dios ti masakbayanda, ket likmutenna ida iti alad.

²⁴Saanak a makapangan ngem agladingitak, ti panagas-asugko kasla danum a maibuyat.

²⁵Pumayso ti amin a kabutengko ken dagiti amin a kaamakko.

²⁶Awan talna wenno inanak, pulos a di agpatingga ti panagrigatko.