Read Iloko Job 30 Bible Online

Job 30 - Iloko bible

Job 30

¹Ngem ita, rabrabakendakon dagiti lallaki nga in-inaudi ngem siak! Annak ida dagiti awan serserbina a tattao; diak pay impalubos a tulonganda dagiti asok nga agbantay kadagiti arbanko.

²Napaksuyan ken agkakapuyda a bunggoy; agkakapuyda ket awan ti maitulongda.

³Kasta unay ti panglaw ken bisinda; iti rabii, kibkibanda uray dagiti nagango a ramut kadagiti putputong ken awan matagtagitao a disso.

⁴Pinarut ken kinnanda dagiti mula iti let-ang, uray ti awan ramramanna a ramut ti buyboy.

⁵Mapapanawda a ririawan dagiti tattao ket kasda laeng mannanakaw a maririawan.

⁶Kapilitan nga agnaedda kadagiti rukib, kadagiti abut a naaramid kadagiti rangkis.

⁷Kasda la animal nga agungor iti kabakiran; aguummongda iti kasamekan.

⁸Tattao nga awan serserbi ken kaes-eskanda! Napagtalawda iti daga.

⁹Ita, nagbalinak a kas maulit-ulit a kanta, ken ubbaw a sarsarita iti imatangda.

¹⁰Karugitdak, ket tupraanda pay toy rupak; ipagarupda a naim-imbagda ngem siak.

¹¹Gapu ta pinarigat ken pinagkapsutnak ti Dios, ipakatda ti amin a pungtotda kaniak.

¹²Darupendak daytoy naranggas a bunggoy ket agtarayak; ipakatda kaniak dagiti pamuspusan a pakadadaelak.

¹³Bangenanda ti pagtarayak tapno maparmekdak, ket awan ti mangatipa kadakuada.

¹⁴Sumrekda kadagiti abut ti sarikedkedko, ket agdadarisonda nga agtupak kaniak.

¹⁵Gapu iti daytoy, malapunosak iti buteng. Mapukaw ti taknengko a kas iti pul-oy ti angin, awanen ti kinabaknangko a kas iti ulep.

¹⁶Ita, umasidegen ti ipapatayko; di met laengen lumag-an ti sagsagabaek.

¹⁷Iti rabii, agut-ot amin a tultulangko; di sumardeng ti sakit a mangtutuok kaniak.

¹⁸Gammatan ti Dios ti kueliok, ket kunesenna dagiti pagan-anayko.

¹⁹Ipalladawnak iti kapitakan, ket awan dumak iti rugit.

²⁰Umawagak kenka, O Dios, ngem pulos a dika sumungbat. No agkararagak, dinak met ipangag.

²¹Naranggaska la unay kaniak; idadanesnak iti amin a pigsam.

²²Baybay-annak nga itayab ti angin; ipallatoknak iti nadawel a bagio.

²³Ammok nga ipannak iti pakatayak, iti pagtungpalan ti amin a tao.

²⁴Apay a kabilem ti nadadaelen a tao, ti tao nga awanen maaramidna no di la agpakpakaasi?

²⁵Diak aya nakipagladingit kadagiti mailupitlupit? Diak aya nakipagrikna kadagiti marigrigat?

²⁶Ninamnamak nga umay ti ragsak ken lawag, ngem sipnget ken rigat ketdi ti dimteng.

²⁷Kasla marangrangkay toy bagik gapu iti danag ken rigat, panagsagaba laeng ti adda iti masakbayak.

²⁸Magnaak a sililiday ket awan liwliwak; agtakderak iti gimong tapno agpatulongak.

²⁹Dagiti laeng atap nga aso ken kullaaw ti kaduak.

³⁰Ngimmisiten ti kudilko; kasta unay ti gurigorko.

³¹Naragsak a tokar ti mangmangngegko idi; itan, pasig a sangsangit ken dungdung-aw.