Read Iloko Job 31 Bible Online

Job 31 - Iloko bible

Job 31

¹Insapatak a pulos a diak matmatan a sidederrep ti maysa a balasang.

²Ania ti ipaay ti Dios a Mannakabalin-amin kadatayo? Kasano ti panangsupapakna kadagiti aramid ti tao?

³Yegna ti didigra ken pannakadadael kadagiti agaramid iti dakes.

⁴Ammo ti Dios ti amin nga aramidko; makitana ti amin nga addangko.

⁵Isapatak nga awan dakes nga inaramidko, ket pulos nga awan ti inallilawko.

⁶Timbangennak koma ti Dios iti husto a timbangan, ket awan duadua a makitana nga awan basolko.

⁷No simmiasiak iti nalinteg a dalan, wenno simmurotak iti kinadakes, no namansaan dagiti imak iti basol,

⁸madadael koma dagiti mulak, wenno kanen ti sabali a tao dagiti apitko.

⁹No nasulisogak iti asawa ti sabali a tao, ket naglemmengak nga agur-uray iti likudan ti ridaw ti balayna,

¹⁰isagana koma ti asawak ti kanen ti sabali a tao, ket makikaidda iti sabali a lalaki.

¹¹Nakaal-alinggaget ti kasta nga aramid ket rumbeng a mapapatay ti akin-gapuanan.

¹²Kasla apuy a gumilgil-ayab nga agkayamkam a mangikisap iti amin a kukuak.

¹³No agasug kaniak ti maysa kadagiti adipenko, ipangagko ket itedko ti kalinteganna.

¹⁴Ania ti rupak iti Dios no diak aramiden ti kasta? Anianto ti makunak, inton maisaklangak iti pangukomanna?

¹⁵Ti Dios a namarsua kaniak, isu met laeng ti namarsua kadagiti adipenko.

¹⁶Tinulongak dagiti napanglaw; diak impalubos nga agbiag a nakaay-ay-ay dagiti balo a babbai.

¹⁷Diak met impalubos a mabisinan dagiti ulila; no la ket adda taraonko, pakanek met ida.

¹⁸Intedko ti masapulda bayat ti panagbiagko.

¹⁹No adda masarakak a nakapangpanglaw a di pay makagatang iti kawesna,

²⁰ikkak iti pagan-anayna a de lana a nagtaud iti dutdot dagiti karnerok. Iti kasta, idaydayawnak iti amin a pusona.

²¹No adda sinaurko nga ulila ta ammok a mangabakak iti pangukoman,

²²matukkol koma dagiti takkiagko, ket masip-akda iti abagak.

²³Kabutengko ti pannusa ti Dios isut' gapuna a diak maaramid ti kasta.

²⁴Pulos a diak nagtalek iti kinabaknangko

²⁵wenno pinagtangsit ti sanikuak.

²⁶Diak nagdaydayaw iti naraniag nga init wenno iti napintas a bulan.

²⁷Diak nasulisog a nagdaydayaw kadakuada ket inagkak ti imak kas pakakitaan ti innak panagrukbak.

²⁸Ti agbasol iti kasta, rumbeng a mapapatay, ta laksidenna ti Dios a Mannakabalin-amin.

²⁹Diak naragsakan iti panagsagaba dagiti kabusorko; iti pannakadidigrada diak met nagrag-o,

³⁰Diak nagbasol babaen iti panangidawatko iti pannakapapatayda.

³¹Ammo dagiti amin a nagserserbi kaniak a siaayatak a mangpasangbay kadagiti ganggannaet.

³²Pinagdagusko dagiti agbibiahe, ket diak impalubos a maturogda iti kalsada.

³³Saanak a kas kadagiti dadduma a mangilemmeng iti basolda.

³⁴Diak nagbuteng uray ania ti kuna dagiti tattao; diak nagulimek wenno nagyan iti balayko gapu iti butengko iti pananglaisda.

³⁵Awan kadi ti dumngeg iti saok? Isapatak a pudno ti amin nga ibagbagak. Sungbatannak koma ngarud ti Dios a Mannakabalin-amin. No naisurat koma dagiti pammabasol ti kabusorko tapno makitak ida,

³⁶ikabilko dagitoy iti bukodko nga abaga ket isaadko iti ulok a kas iti korona.

³⁷Ipakaammok iti Dios ti amin nga inaramidko, ket diak agbain nga agparang kenkuana.

³⁸No tinakawko ti daga a taltalonek, ket inagawko kadagiti pudno nga akinkukua;

³⁹no kinnanko ti naapit sadiay, ket binay-ak ti nagmula a mabisinan

⁴⁰iti talonko, agtubo koma dagiti barsanga ken siitan, imbes a dagiti trigo ken sebada. Daytoy ti gibus ti bitla ni Job.