Read Iloko Job 33 Bible Online

Job 33 - Iloko bible

Job 33

¹Job, denggem ngarud a naimbag dagiti amin nga innak isawang.

²Yebkasko ti adda iti panunotko.

³Pudno amin a sasawek, diak agul-ulbod.

⁴Ti espiritu ti Dios ti nangaramid kaniak; inikkannak iti biag.

⁵No kabaelam sungbatannak, isaganam dagiti pakisuppiatmo kaniak.

⁶Job, iti imatang ti Dios, agpadpadata; nabukelak met iti pitak a kas kenka.

⁷Awan ngarud ti panggapuam nga agbuteng kaniak; saanka a parukmaen.

⁸Kastoy ti nangngegko a kinunam;

⁹“Awan basolko, ket diak naglabsing. Nadalusak, ket awan dakes nga aramidko.

¹⁰Ngem agsapul ti Dios iti panggapuanna a mangdangran kaniak, ket ibilangnak a kas maysa a kabusor.

¹¹Kawaranna dagiti sakak; sipsiputanna ti amin a tignayko.”

¹²Ngem ibagak kenka, Job, nga agbiddutka. Natantan-ok ti Dios ngem ti tao!

¹³Apay a makisuppiatka iti Dios? Apay a kunam a dina ipangag ti asug ti tao?

¹⁴Nadumaduma a wagas ti panagsao ti Dios, ngem saan latta nga ikaskaso dagiti tattao.

¹⁵Agsao ti Dios no matmaturog dagiti tattao iti rabii babaen kadagiti tagtagainep ken parmata.

¹⁶Ipangngegna kadakuada ti saona, ket mabutengda kadagiti ballaagna.

¹⁷Agsao ti Dios tapno pagsardengenna ida nga agbasol ken tapno saanda nga agtangtangsit.

¹⁸Saanna nga ipalubos a madadaelda; iti mismo a patay, isalakanna ida.

¹⁹Disiplinaenna ti tao. Yegna kadakuada ti sakit ken ti nasaem nga ut-ot.

²⁰Ti masakit mapukaw ti ganasna a mangan ket dina sagiden ti naimas a taraonna.

²¹Main-inut nga umres ti bagina ket kudil laengen ti mangbungon iti tulangna;

²²asidegen ti ipapanna iti tanemna.

²³Nalabit nga adda anghel a tumulong kenkuana— maysa kadagiti rinibu nga angheles ti Dios— a mangipalagip kadagiti tattao ti rebbengda.

²⁴Agpakpakaasinto ti anghel ket kunana: “Ruk-atam! Saan a mapan iti lubong dagiti natay. Adtoy ti pangsubbotko kenkuana.”

²⁵Umubingto manen ti bagina, sumubli ti pigsana kas idi kabambanuaganna.

²⁶Sungbatanto ti Dios ti kararagna, ket sirarag-onto nga agdaydayaw kenkuana. Pagbalinento manen ti Dios a nalinteg.

²⁷Kunananto kadagiti tattao, “Nagbasolak; saan a naimbag ti inaramidko, ngem inispalnak ti Dios.

²⁸Dina impalubos a mapanak iti lubong dagiti natay, ket ita, addaak pay la a biag.”

²⁹Kanayon a kasta ti ar-aramiden ti Dios;

³⁰ispalenna ti biag ti tao, ket ipaayna kenkuana ti rag-o ti panagbiag.

³¹Job, ipangagmo ti sasawek; agulimekka ket pagsawennak.

³²Ngem ibagam kaniak no adda maisungbatmo; siaayatak a mangannugot a sika ti pudno.

³³Ngem no awan, agulimekka ket denggennak, ta isuroka nga agbalin a masirib.