Read Iloko Job 34 Bible Online

Job 34 - Iloko bible

Job 34

¹Denggenyo ti sawek, dakayo a masirib ken nasikap a lallaki.

³Ammoyo ti naimas a taraon no maramananyo; ngem apay a diyo mailasin ti nainsiriban a sao no mangngegyo?

⁴Mailasintayo koma ti nalinteg. Ket pilientayo ti naimbag.

⁵Kuna ni Job nga awan basolna, nga inikkat ti Dios ti kalinteganna.

⁶Kunana, “Nupay awan basolko, naibilangak nga ulbod; nasaem ti sugatko, uray awan salungasingko.”

⁷Nakakitakayo kadin iti tao a kas iti daytoy a Job? Inumenna ti panangumsi a kasla danum.

⁸Makikadkadua kadagiti dakes a tattao ken makikuykuyog kadagiti managbasol.

⁹Kunana nga awan a pulos ti magunggona iti panangtungpal iti pagayatan ti Dios.

¹⁰Denggendak ngarud, dakay a mannakaawat! Agaramid kadi iti saan a naimbag ti Dios a Mannakabalin-amin?

¹¹Gunggonaanna dagiti tattao kas mayannurot iti aramidda ket ukomenna ida kas kaikarianda.

¹²Saan nga agaramid ti Dios iti dakes, ti Mannakabalin-amin dina a ballikugen ti hustisia.

¹³Naggapu aya ti pannakabalin ti Dios iti sabali? Adda aya nangisaad kenkuana a mangaywan iti lubong?

¹⁴No alaen ti Dios ti anges ti biag,

¹⁵matay dagiti amin a sibibiag, ket agbalinda manen a tapok.

¹⁶Ita, Job, denggennak no masiribka.

¹⁷Ipagarupmo aya a guraen ti Mannakabalin ti hustisia? Ukomem kadi ti nalinteg a Dios?

¹⁸Dusaen ti Dios dagiti ari ken dagiti agtuturay, no awan serserbida wenno nadangkokda.

¹⁹Saanna nga ayonan dagiti agtuturay. Dina idumduma dagiti baknang kadagiti napanglaw ta pinarsua amin ti Dios ida.

²⁰Mabalin a kellaat a matay ti tao iti rabii. Kabilen ti Dios dagiti tattao ket mapukawda; dagiti mamaingel laklakaenna a patayen ida.

²¹Sipsiputanna ti amin nga addang dagiti tattao.

²²Awan ti nasipnget a lugar a mabalin a paglemmengan dagiti managdakdakes.

²³Saan a masapul nga ituding ti Dios ti aldaw a pannakaisaklang dagiti tattao iti pangukomanna.

²⁴Saan a masapul ti pannakausig tapno ikkatenna dagiti pangulo, ket isaadna dagiti sabali iti lugarda.

²⁵Agsipud ta ammona ti aramidda, ikkatenna ida iti saadda ken parmekenna ida iti rabii.

²⁶Dusaenna dagiti managbasol iti imatang dagiti tattao,

²⁷agsipud ta nagsardengda a sumursurot kenkuana, ket dida inkankano dagiti amin a bilinna.

²⁸Pinilitda dagiti napanglaw tapno umasugda iti Dios, ket impangagna ti dawatda a tulonganna ida.

²⁹No saan nga agtignay ti Dios, siasino ti mangbabalaw kenkuana? No ilingedna ti rupana, awan ti mabalin nga aramiden ti tao.

³⁰Saan koma nga agturay dagiti nadangkok tapno saanda nga isagmak dagiti tattao.

³¹Job, impudnom kadin dagiti basolmo iti Dios? Inkarim kadin kenkuana a saanka nga agbasolen?

³²Dinawatmo kadi iti Dios nga ipakitana dagiti biddutmo? Immannugotka kadi nga isardengmon ti agaramid iti dakes?

³³Gapu ta dimo kayat ti ar-aramiden ti Dios, namnamaem kadi nga aramidenna ti kayatmo? Saan a siak ti mangikeddeng no di sika. Ibagam ngarud no ania ti kapanunotam.

³⁴Awan duadua a kumanunong dagiti manakem; ibaga ti siasinoman a masirib a makangngeg kaniak

³⁵nga agsasao ni Job nga awan ammona, ket awan mamaay ti sasawenna.

³⁶Amirisenyo ti amin nga imbaga ni Job; makitayo nga agsasao a kas maysa a dakes a tao.

³⁷Nayonanna ti basolna iti yaalsa; iti imatangtay amin, lalaisenna ti Dios ken rabrabakenna.