Read Iloko Job 36 Bible Online

Job 36 - Iloko bible

Job 36

¹Aganuska pay bassit a dumngeg ta adda pay ibagak kenka a paibaga ti Dios.

³Adu ti ammok, ket usarek a mangipakita a nalinteg ti Dios a namarsua kaniak.

⁴Awan ti ulbod nga ibagbagak; pudno a masirib daytoy makisasao kenka.

⁵Mannakabalin ti Dios! Awan ti laisenna; awan ti banag a dina maawatan.

⁶Dina pagpauten ti biag dagiti managbasol, ket ipaayna ti hustisia kadagiti napanglaw.

⁷Salaknibanna dagiti nalinteg; pagturayenna ida a kas kadagiti ari, ket bay-anna a madaydayawda iti agnanayon.

⁸Ngem no mabalud ti maysa a tao ket agsagaba gapu iti inaramidna,

⁹ipakaammo ti Dios no ania dagiti labsingna ken ti kinapalangguadna.

¹⁰Ballaaganna ida, inna ida palagipan; ibilinna a panawanda ti dakes a dalan.

¹¹No agtulnogda iti Dios ket agserbida kenkuana, naragsak ken narang-ay ti panagbiagda.

¹²Ngem no dida ikankano ti Dios, mataydanto iti kampilan, ket pumusayda nga awan ti ammoda.

¹³Agtalinaed latta ti pungtot dagiti awan Diosna, dida agdawat iti tulong uray no madusada.

¹⁴Uray no agkabannuagda pay laeng, matayda; napnoan iti bain nga aggibus ti biagda.

¹⁵Ngem isuro ti Dios dagiti tattao babaen iti panagsagaba, ket aramatenna ti rigat a panglukat kadagiti matada.

¹⁶Inaonnaka ti Dios iti pakarigatam, ket intedna ti natalged a panagbiagmo; naglaplapusanan iti makan ti lamisaanmo.

¹⁷Ngem sika, madusdusaka a kas iti kaikariam.

¹⁸Agannadka tapno dika maallilaw iti pasuksok; agannadka amangan no yaw-awannaka ti kinabaknang.

¹⁹Awan imbag nga ited ti panagpaarayatmo; dinaka matulonganen ti amin a pigsam.

²⁰Dimo tarigagayan a dumteng ti rabii, ti tiempo a maisina dagiti tattao iti lugarda.

²¹Kitaem ta dika agaramid iti saan a nasayaat; nagsagabaka tapno agbalinka a naimbag.

²²Laglagipem ti dakkel a pannakabalin ti Dios; isu ti katan-okan kadagiti amin a maestro.

²³Awan ti makaibaga kenkuana iti aramidenna wenno mangpabasol a dakes ti inaramidna.

²⁴Kanayon a maidaydayaw gapu iti aramidna; masapul met ngarud nga idaydayawmo.

²⁵Nakita ti amin a tao dagiti gapuananna, ngem ditay maawatan dagiti aramidna.

²⁶Saan a naan-anay nga ammotayo ti kinatan-okna; saantay met a mabilang ti kaadu ti tawenna.

²⁷Ti Dios ti mangala iti danum ditoy daga, ket pagbalinenna a tudo

²⁸a maibukbok para iti sangkataoan.

²⁹Awan ti makaammo no kasano nga aggunay dagiti ulep wenno agbettak ti gurruod sadi langit a balay ti Dios.

³⁰Pagkimatenna ti entero a langit, ngem nasipnget latta ti lansad ti baybay.

³¹Kastoy ti panangpakanna kadagiti tattao ken pannangtedna iti nawadwad a taraonda.

³²Gammatanna ti kimat ket bilinenna a sal-itenna ti kayatna a puntaan.

³³Ipakaammo ti gurruod ti umay a bagio; ipakdaar met dagiti arban ti isusungadna.