Read Iloko Job 37 Bible Online

Job 37 - Iloko bible

Job 37

¹Gapu iti bagio, agtibbayoak ket uray la lumagto toy puso.

²Dumngegkay amin iti timek ti Dios, ken iti gurruod nga aggapu iti ngiwatna.

³Ibulosna ti kimat iti tangatang ket sal-itenna dagiti pungto ti daga.

⁴Kalpasanna, mangngeg ti ungor ti timekna, ti nadayag a dulluog ti gurruod bayat ti panagsiwet ti kimat.

⁵Agbilin ti Dios, ket maaramid dagiti nakaskasdaaw a banag; wen, dagiti datdatlag a ditay maawatan.

⁶Pagtinnagenna ti niebe ditoy daga, kasta met ti bumayakabak a tudo.

⁷Pagsardengenna ti trabaho dagiti tattao; ipakitana kadakuada no ania ti maaramidna.

⁸Sumrek dagiti atap nga ayup kadagiti rukibda.

⁹Aggapu ti bagio iti abagatan ken ti kasta unay a lam-ek iti amianan.

¹⁰Babaen iti anges ti Dios, agbalay dagiti danum ket agbalinda a yelo.

¹¹Aggilap ti kimat kadagiti ulep.

¹²Agrikosrikosda iti tangatang, ket tungpalenda ti pagayatan ti Dios. Aramidenda amin nga ibilin ti Dios iti sadinoman a paset ti lubong.

¹³Pagtinnagen ti Dios ti tudo a mangpadanum iti daga; mabalin a pangdusana kadagiti tattao, wenno pangipakitana iti kaasina kadakuada.

¹⁴Job, agtalnaka bassit ket dumngegka; utobem dagiti nakaskasdaaw nga aramid ti Dios.

¹⁵Ammom aya no kasano ti panangbilin ti Dios, ket pagkimatenna dagiti ulep?

¹⁶Ammom aya no kasano nga aglayag dagiti ulep iti tangatang? Gappuanan daytoy ti nakaskasdaaw a laing ti Dios!

¹⁷Saanmo nga ammo dayta! Mariknam laeng ti pudot ket agsagabaka no dumteng ti angin-abagatan a manglanet iti daga.

¹⁸Matulongam kadi ti Dios a mangyukrad iti langit ken mangpatangken a kas iti napasileng a metal?

¹⁹Isuronakam iti sawenmi iti Dios, ta nakullaapan ti panunotmi.

²⁰Diak dawaten iti Dios a pagsawennak. Apay nga ikkak ti gundawayna a mangdadael kaniak?

²¹Ket ita, makapurar ti lawag iti tangatang, naraniag unay a kitaen; ket dinalusan ti angin ti langit.

²²Adda makita a nabalitokan nga anaraar iti amianan, ket lapunosennatayo iti buteng ti dayag ti Dios.

²³Naindaklan unay ti pannakabalin ti Dios ket ditay makaasideg kenkuana. Nalinteg ken awan idumdumana iti pannakilangenna.

²⁴Saan ngarud a pagsiddaawan nga agbuteng kenkuana ti amin a tao, ket dina ikankano dagiti mangipagarup a masiribda.