Read Iloko Job 38 Bible Online

Job 38 - Iloko bible

Job 38

¹Siasinoka nga agduadua iti siribko? Ipakpakitam laeng ti kinanengnengmo.

³Tumakderka ita a kas maysa a lalaki, ket sungbatam dagiti saludsodko.

⁴Addaka kadin idi aramidek ti lubong? Ala, agsaoka man no adda ammom.

⁵Siasino ti nangikeddeng iti kadakkelna? Siasino ti nangrukod iti kaakabana? Awan duadua nga ammom!

⁶Ania ti nakaikapetan dagiti adigi a nagbatayan ti daga? Siasino ti nangisaad iti pasuli ti lubong?

⁷Iti parbangon dayta nga aldaw, sangsangkamaysa a nagkanta dagiti bituen ket nagdir-i iti rag-o dagiti nailangitan a parsua.

⁸Siasino ti nangirikep kadagiti ruangan tapno matengngel ti baybay idi nagpussuak iti uneg ti daga?

⁹Siak ti nangabbong iti taaw kadagiti ulep, ket kinumotak iti kinasipnget.

¹⁰Insaadko ti beddeng ti baybay, ket binalunetak dagiti ruanganna.

¹¹Kinunak iti baybay, “Aginggaka laeng ditoy a beddeng; agpatingga ditoy dagiti dadakkel a dalluyonmo.”

¹²Job, bayat ti panagbiagmo adda kadin aldaw a pinagbannawagmo?

¹³Nabilinmo kadin ti bannawag tapno gammatanna ti daga ken gunggonenna dagiti managdakdakes nga iruar kadagiti paglemlemmenganda?

¹⁴Ipannayag ti raniag ti init dagiti turod ken tanap a kas iti nabatad a kupin ti pagan-anay.

¹⁵Naraniag unay ti lawag ti aldaw, ket lapdanna nga agranggas dagiti managdakdakes.

¹⁶Nakapanka kadin kadagiti ubbog iti uneg ti baybay? Nagnaka kadin iti lansad ti taaw?

¹⁷Naipakitan aya kenka dagiti ruangan a mangbantay iti nasipnget a lubong dagiti natay?

¹⁸Ammom kadi ti kadakkel ti lubong? Sungbatannak man no ammom.

¹⁹Ammom kadi ti paggapuan ti lawag, wenno ti pagtaudan ti sipnget?

²⁰Maipakitam kadi kadakuada ti kaadayo ti papananda? Mapasublim kadi ida?

²¹Ammok a maaramidmo ti kasta ta lakayka unayen, ket addakan idi maparsua ti lubong!

²²Nastrekmo kadin ti pagiduldulinak kadagiti niebe ken yelo?

²³Isagsaganak ida iti panawen ti didigra, kadagiti aldaw ti dangadang ken gubat.

²⁴Nakapanka kadin iti leleggakan ti init, wenno iti paggapuan ti angin iti daya?

²⁵Siasino ti nagkali iti pagayusan ti bumayakabak a tudo? Siasino ti nangwaknit iti pagnaan ti gurruod ken kimat?

²⁶Siasino ti mangted iti tudo iti lugar nga awan matagtagitao?

²⁷Siasino ti mangpadanum iti namaga ken natikag a daga tapno agtubo dagiti ruot?

²⁸Adda aya ama ti tudo wenno ti linnaaw?

²⁹Siasino ti ina ti yelo ken uraro,

³⁰a namagbalay iti danum, ket timmangken ti rabaw ti baybay?

³¹Kabaelam kadi a reppeten ti bunggoy dagiti Pleiades, wenno warawaren dagiti galut ti Orion?

³²Maiturongmo aya dagiti bituen iti tunggal panawen? Maidalanmo aya dagiti bituen a managan iti Dakkel ken iti Bassit nga Oso?

³³Ammom kadi dagiti alagaden a mangituray kadagiti langit? Maipakatmo kadi dagitoy iti daga?

³⁴Kabaelam kadi a bilinen dagiti ulep tapno rusependaka iti tudo?

³⁵No bilinem nga aggilap ti kimat, umay kadi kenka ket kunana, “Madadaanak, apo, nga agserbi kenka”?

³⁶Siasino ti pakaammoan ti billit nga ibis nga aglayus ti Karayan Nile? Siasino ti pakaammoan ti kawitan a dumteng ti tudo?

³⁷Siasino ti masirib a makabilang kadagiti ulep ken bangkingenda tapno agbayakabak?

³⁸Ket agtutukel ti tapok a basaen ti tudo.

³⁹Yanupam aya dagiti leon iti taraonda? Mabussogmo kadi dagiti mabisin nga urbonda,

⁴⁰no aglemlemmengda iti rukibda wenno agur-urayda nga agsaneb iti aponda?

⁴¹Siasino ti mangpakan kadagiti wak no mabisin ken agkalkallautangda? Siasino ti mangpakan kadagiti urbonda, no umasugda kaniak gapu iti kaawan kanenda?