Read Iloko Job 4 Bible Online

Job 4 - Iloko bible

Job 4

¹Job, dinak koma kagura no agsaoak, ta diak magawidanen toy dilak.

³Adu a tattao ti sinursuroam, ket pinapigsam dagiti nakapuy nga ima.

⁴No adda idi matuang gapu iti kapsut ken bannogna, tumakder manen no mangngegna ti saom a pammaregta.

⁵Ngem ita ta sikan ti marigatan, ti panagsagaba dimon maibturan.

⁶Managbutengka iti Dios ken natan-ok ti panagbiagmo; rumbeng ngarud a maaddaanka iti talged ken namnama.

⁷Lagipem: Adda kadin awan basolna a nadidigra? wenno nalinteg a nadadael?

⁸Napaliiwko a dagiti agmula iti dakes, dakes met la ti apitenda.

⁹Kasla bagio ti pungtot ti Dios a mangdadael kadakuada.

¹⁰Kasla leon nga agngernger dagiti managdakdakes, ngem pagulimeken ida ti Dios, ket pusienna dagiti ngipenda.

¹¹Kas kadagiti leon nga awan alun-onenda, matayda ket mawarawara amin nga annakda.

¹²Adda nangngegko a sao, kasla arasaas ket dandani saanko a nangngeg.

¹³Kasla nakabutbuteng a tagtagainep a nangtukay iti turogko.

¹⁴Nagbuteng ken nagpigergerak; nagkintayeg ti entero a bagik.

¹⁵Nariknak a napul-oyan ti rupak ket simgar ti dutdotko.

¹⁶Adda nakitak nga agtaktakder sadiay; miningmingak ngem diak nailasin. Pagammoan, nangngegko ti bassit a timek a nagkuna:

¹⁷“Adda kadi tao a nalinteg iti imatang ti Dios? Adda aya nadalus iti sangoanan ti Namarsua kenkuana?

¹⁸Saan a talken ti Dios dagiti nailangitan nga adipenna; uray dagiti anghelesna, adda pangbabalawanna.

¹⁹Pagarupem kadi a talkenna ti naparsua iti pitak, ti nagtaud iti tapok ket nalaka a marumek a kas iti balay ti akot-akot?

²⁰Mabalin a sibibiag ti tao iti bigat, ngem matay a di mapuotan sakbay ti rabii.

²¹Maitalaw ti amin a sanikuana; matay nga awan pay la ti siribna.”