Read Iloko Job 41 Bible Online

Job 41 - Iloko bible

Job 41

¹Mabanniitam kadi ti Leviatan? Mataliam kadi ti dilana?

²Mataldengam kadi? Makawitam kadi ti ngiwatna?

³Agdawat aya kenka tapno bulosam? Agpakpakaasi aya kenka?

⁴Makitulag aya kenka, ket ikarina nga agnanayon a pagserbiannaka?

⁵Galutam aya a kas iti taraken a billit, kas iti paglinglingayan dagiti tagabum a babbai?

⁶Pagtitinnawaran aya dagiti mangngalap? Rangrangkayen aya dagiti agtagtagilako sada ilako?

⁷Matatekmo kadi ti kudilna kadagiti pisga? Masalputmo kadi ti ulona iti pika?

⁸Sagidem la iti mamimsan ket dimonto mapiduan; pulos a dimonto malipatan ti dangadang!

⁹Siasinoman a makakita iti Leviatan, mapabutngan ket mapasag.

¹⁰Narungsot no mapagpungtotmo; awan ti makaitured a sumango kenkuana.

¹¹Siasino ti mangdarup kenkuana ket saan a maan-ano? Iti entero a lubong, awan ti makaaramid!

¹²Saritaek man ti maipapan kadagiti saka ti Leviatan, ket iladawak ti kadakkel ken kapigsana.

¹³Awan ti makalalat kenkuana wenno makasalput iti napuskol a kabalna.

¹⁴Siasino ti makaitured a mangungap iti pangana idinto ta nakabutbuteng dagiti naintar a ngipenna?

¹⁵Dagiti siksikna ti pagtangsitna; nairut ti panagkakamangda, ket kas iti bato ti tangkenda.

¹⁶Nadekket unay ti panagkakapetda, ket awan pagnaan ti angin iti baetda.

¹⁷Nairut unay ti panagsasaipda, ket pulos a dida mapagsisina.

¹⁸No agbang-es, rummuar ti apuy iti agongna; agrimat dagiti matana a kas iti init iti agsapa.

¹⁹Agruar ti gumilgil-ayab nga apuy iti ngiwatna; dagiti rissik ti apuy agparsiakda.

²⁰Agruar ti asuk iti agongna, kasla asuk ti ruot a mapupuoran.

²¹No umanges, sumged dagiti uging; agruar ti apuy iti ngiwatna.

²²Napigsa unay ti tengngedna, ket agbuteng ti makasabat kenkuana.

²³Awan nalukneng a paset ti lalatna; nasikkil ken natangken a kas landok.

²⁴Bimmato ti pusona, di agbuteng; saan a magaraw ken natangken a kas iti gilingan.

²⁵No bumaringkuas, makigtot uray ti kapigsaan; awan ti maaramidda gapu iti buteng.

²⁶Awan ti kampilan a makadunor kenkuana; saan a masugat iti gayang, iti pana wenno iti buneng.

²⁷Ibilangna ti landok a kasla garami ken ti gambang a kasla narukop a kayo.

²⁸Saanna nga itarayan ti pana; kasla kalag-an ti arutang dagiti bato a maibarsak kenkuana.

²⁹Ibilangna a garami ti maysa a pang-or; agkatawa laeng no gayangen dagiti tattao.

³⁰Kasla natadem a buong ti sarming dagiti kukona; no magna iti kataltalonan, maarado ti daga.

³¹Kiburenna ti baybay a kasla agburburek a danum. Pagluagenna ti taaw a kasla lumlumuag a lana.

³²Aglabutab ti malabasanna a baybay; pumuraw a burek ti mapagnaanna.

³³Awan ti kas kenkuana iti rabaw ti daga; maysa a parsua nga awan kabutengna.

³⁴Laisenna uray dagiti kapalangguadan nga animal; isu ti ari dagiti amin a narungsot nga ayup.