Read Iloko Job 5 Bible Online

Job 5 - Iloko bible

Job 5

¹Umawagka, Job, ta kitaem no adda sumungbat. Adda kadi anghel a mabalinmo a pagkamangan?

²Patayem la ti bagim gapu iti gura ken sakit ti nakem. Minamaag daytoy nga ar-aramidem.

³Nakakitaak kadagiti maag a kasla natalged ti biagda, ngem dinawatko ti kellaat a pannakailunod dagiti taengda.

⁴Saan a natalged dagiti annakda; iti pangukoman, awan mangikalintegan kadakuada.

⁵Kanento dagiti mabisin ti mula ti maag, uray pay dagiti agtubo kadagiti siitan; ket apalanto dagiti mawaw ti sanikuana.

⁶Saan nga agtubo ti kinadakes iti daga, wenno ti riribuk iti tapok.

⁷Ti tao met laeng ti mangpataud iti rigatna, a kas met iti panagtaud ti rissik iti beggang.

⁸No siak ti sika, agkamangak iti Dios, ket iparangko kenkuana ti pagtaktakderak.

⁹Ditay maawatan dagiti naindaklan nga aramidna, ket dagiti milagrona saanda nga agpatingga.

¹⁰Pagtudoenna ditoy daga ket padanumanna dagiti taltalon.

¹¹Wen, ti Dios ti mangitan-ok kadagiti napakumbaba, ken mangliwliwa kadagiti amin nga agladladingit.

¹²Lapdanna ti panggep dagiti nasikap, ket ipalab-ogna dagiti masirib iti kinasikapda met laeng, tapno saan nga agballigi ti aramidenda.

¹⁴Agar-arikapda uray iti tengnga ti aldaw.

¹⁵Ngem isalakanna dagiti napanglaw iti pakatayanda, ispalenna dagiti nakakaasi iti pannakailupitlupitda.

¹⁶Ikkanna iti namnama dagiti napanglaw, ket pagulimekenna dagiti managdakdakes.

¹⁷Nagasat ti tao a ti Dios ti mangdisiplina! Dimo ngarud guraen no tubngarennaka.

¹⁸Bedbedan ti Dios ti sinugatna; agasanna met laeng ti dinunorna.

¹⁹Kanayon a salaknibannaka tapno awan ti pakaan-anoam.

²⁰No dumteng ti bisin, biagennaka; no adda gubat, iti patay ispalennaka.

²¹Salaknibannaka iti pannakapadpadakes; isalakannaka iti pannakadadael.

²²Katawaamto ti ranggas ken bisin; dimonto kabuteng dagiti atap nga animal.

²³Awanto ti bato dagiti aradoem a talon; didakanto darupen dagiti narungsot nga animal.

²⁴Iti kasta, natalgedkanto iti taengmo; inton bilangem dagiti karnerom, awanto ti napukaw kadakuada.

²⁵Adunto ti kaputotam, umadudanto a kas ruot iti daga.

²⁶Atiddogto ti panagbiagmo; napigsakanto pay laeng inton matayka kas trigo a nadanonan ti pannakaapitna.

²⁷Job, nasursuromi daytoy iti nabayag a panangad-adalmi. Pudno daytoy, ket ipangagmo ta pagimbagam.