Read Iloko Job 6 Bible Online

Job 6 - Iloko bible

Job 6

¹No matimbang la koma ti rigat ken ladingitko,

³nadagdagsenda pay ngem dagiti darat ti baybay. No nagubsang ti panagsaok dikayo koma masdaaw.

⁴Sinalputnak dagiti pana ti Dios a Mannakabalin-amin ket nagwaras iti bagik ti sabidongda. Inturongna kaniak dagiti pammutbutengna.

⁵Naulimek ti asno no mangmangan iti taraonna, saan nga agemmak ti baka no madama ti pannanganna.

⁶Adda aya mayat a mangan iti awan ramanna? Adda kadi nanam ti puraw ti itlog no awan asinna?

⁷Diak kayat ti kasta a taraon, agsarwaak no manganak.

⁸Apay a di ipangag ti Dios ti dawatko? Apay a dina patgan ti kararagko?

⁹Nasaysayaat laengen a patayennak ti Dios.

¹⁰No ammok nga aramidenna ti kasta, lumagtoak gapu iti rag-o; agragsakak uray pay napalalo ti rigatko. Ammok a nasantoan ti Dios; pulos a diak pay sinupring ti bilinna.

¹¹Ania pay ti pigsak nga agbiag? Ania pay la ti gapuna, awan metten ti namnamak?

¹²Naaramidak aya iti bato? Bronse kadi toy bagik?

¹³Awanen pigsak a mangisalakan iti bagik; awanen ti mabalinko a pagkamangan.

¹⁴Masapulko dagiti napudno a gagayyem iti kastoy a rigatko, tinallikudak man ti Dios wenno saan.

¹⁵Allilawendak, dakayo a gagayyemko; kaskayo la waig a namagaan no awan tudo.

¹⁶Adu ti nagbalay a danum napuskol ti niebe iti waig. Ngem no tiempo ti pudot, marunawda ket ti waig agmaga.

¹⁸Mayaw-awan ti bunggoy dagiti agbibiahe iti panagsapsapulda iti danum nga inumenda; agalla-allada iti langalang ket matayda.

¹⁹Agbirok iti danum dagiti bunggoy a naggapu iti Seba ken Tema,

²⁰ngem mapaayda iti igid dagiti waig a nagmaga.

²¹Kadagita a waig ti pangyarigak kadakayo; makitayo ti rigatko ket makigtotkayo.

²²Dinawatko kadi nga isagutandak? Kiniddawko kadi nga agpasuksokkayo tapno maisalakanak?

²³Imbagak aya nga ispalendak iti kabusor wenno iti nadangkok nga agturay?

²⁴Ala ngarud, isurodak ket ibagayo dagiti biddutko; agulimekak ket dumngegak kadakayo.

²⁵Maguyugoydak no nainsiriban ti palawagyo, ngem minamaag met dagiti sasawenyo.

²⁶Kunayo nga angin ti agaon iti ngiwatko. Apay ngarud a sungbatanyo?

²⁷Pagbibinnunotanyo pay dagiti ulila a tagabu, ket ilakoyo ti nadekket a gayyemyo!

²⁸Perrengendak, saanak nga agul-ulbod.

²⁹Baliwanyo ti panunotyo ket umisu koma ti pangngeddengyo; didak ukomen, ta awan dakes a naaramidko.

³⁰Ngem ipagarupyo nga agul-ulbodak— kunayo a diak mapaglasin ti dakes ken naimbag.