Read Iloko Job 7 Bible Online

Job 7 - Iloko bible

Job 7

¹Mayarig ti biag ti tao iti kapilitan a panagserbi ti soldado, kasla biag ti agtartrabaho iti nadagsen,

²kas tagabu a kalikagumanna ti paglinonganna, kas mangmangged nga agur-uray iti tangdanna.

³Binulan nga ubbaw ti panagbibiagko; rinabii a ladingit ti malakamko.

⁴No maturogak, alimbasagenak iti iddak; saanak a makaturog, sumgaakon nga aglawag.

⁵Ig-iggesen ti bagik, nalapunos iti keggang; bumtak dagiti gaddilko ket agnanada.

⁶Aggibusen dagiti aldawko nga awan namnamak, naparpardas ngem ti barkilia ti panaglabasda.

⁷Lagipem, O Dios, a kasla anges ti biagko; naggibusen dagiti ragragsakko.

⁸Addaak pay la ita, ngem didakton makita. No birokendak, didakton masapulan.

⁹Kas iti ulep nga aglabas ket agpukaw, kasta ti tao a matay ket dinton agsubli; malipatan payen dagiti makaam-ammo kenkuana.

¹¹Diak mabalin ti agulimek! Madi ti riknak ket makapungtotak. Masapul nga agsaoak.

¹²Apay kadi a pabambantayannak? Ipagarupmo aya a maysaak a dragon ti taaw?

¹³Agiddaak tapno aginanaak; kayatko nga iliwliwag ti panagsagabak.

¹⁴Ngem sika, pagbutngennak kadagiti tagtagainep; pagparmataennak ket butbutngennak.

¹⁵Kaykayatko laengen a mabekkelak; nasaysayaat laengen a matayak ngem ti agbiag iti kastoy a rigat.

¹⁶Saanko a kayaten ti agbiag! Awanen serserbi ti biagko. Baybay-annakon. Awanen serserbi toy biag.

¹⁷Apay a napateg unay ti tao kenka? Apay nga ikaskasom dagiti aramidna?

¹⁸Binigat a bisitaem, ket tunggal kanito a suotem.

¹⁹Dimo la aya mayadayo ti panagkitam kaniak, iti uray apagdarikmat tapno matilmonko ti tuprak?

²⁰No agbasolak, apay aya a sika ti masakitan, sika nga agbambantay kaniak? Apay a siak ti pangipapasam iti pungtotmo? Makapadagsenak unay aya kenka?

²¹Dimo la aya mapakawan ti basolko? Di la mabalin a punasem dagiti labsingko? Agiddaakton iti katapokan, ket no sapulennak awanakton a mabirokam.