Read Iloko Job 8 Bible Online

Job 8 - Iloko bible

Job 8

¹Nalpas kadin ti bukodmo a bitla? Atiddog ngem awan met ti linaonna.

³Ballikugen aya ti Dios ti hustisia? Killoenna aya ti kinalinteg?

⁴Nalabit a nakabasol dagiti annakmo; dinusa ida ti Dios kas maitutop iti aramidda.

⁵Agkamangka iti Dios a Mannakabalin-amin, ket agpakpakaasika kenkuana.

⁶No pudno a nalintegka ken awan basolmo, awan duadua a tulongannaka ti Dios, ket isublina a kas gunggonam dagiti napukawmo.

⁷Dinto maidilig ti napukawmo a kinabaknang iti itedto kenka ti Dios iti kamaudianan,

⁸Amirisem ti kinasirib idi punganay; utobem dagiti nasursuro dagidi ammatayo.

⁹Ababa unay ti biagtayo ket ania ti ammotayo? Ditoy daga, anniniwan laeng ti kayarigantayo.

¹⁰Paisuroka kadagiti mamasirib idi ugma; ammoem ti pannursuroda, denggem ti ibagada:

¹¹“Saan nga agtubo dagiti runo iti awan danumna; iti la kadanuman ti pakasarakan kadakuada.

¹²No agmaga ti nagtuboanda, magangoda idinto a kalanglangtoda, ken saan pay a mabalin a makeltay, kadagiti amin a mula, umunada a malaylay.

¹³Mayarig dagiti awan Diosna kadagita a runo; apaman a lipatenda ti Dios, mapukaw metten ti namnamada.

¹⁴Agtalekda iti panait—iti sapot ti lawwalawwa.

¹⁵Matuangda no agsanggirda iti balay ti lawwalawwa; no kumpetda iti panait, matulonganna aya ida a tumakder?”

¹⁶Kasla barsanga dagiti managdakdakes nga agtubo iti kainitan, barsanga nga agsaknap iti minuyongan.

¹⁷Kadagiti bato, agkawikaw dagiti ramutda, kadagiti dadakkel a bato nairut ti ikakapetda.

¹⁸Ngem no parutem ida, awan ti makaammo a sadiay ti nagtuboanda.

¹⁹Wen, kasta laeng ti ragsak dagiti managdakdakes, adda dagiti umay a sumublat iti lugarda.

²⁰Saan a baybay-an ti Dios dagiti napudno a tattao; dina met tulongan dagiti nakillo.

²¹Pagragsakennakanto manen; agkatawakanto, agriawkanto iti rag-o.

²²Ngem ibabainna dagiti manggura kenka, ket awanton ti taeng dagiti managdakdakes.