Read Iloko Job 9 Bible Online

Job 9 - Iloko bible

Job 9

¹Wen, nangngegko aminen dagita. Ngem iti imatang ti Dios, awan ti makaikalintegan iti bagina.

³Kasta met nga awan ti makasuppiat kenkuana, awan makasungbat iti rinibu a saludsodna.

⁴Masirib ken nabileg unay ti Dios; awan ti agballigi a bumusor kenkuana.

⁵Di mapakpakadaan a yalisna dagiti bantay; iti pungtotna dadaelenna ida ket inda margaay.

⁶Paggingginedenna ti daga, ket gunggonenna dagiti fondasionna.

⁷Mabalinna a di palgaken ti init, ken di pagrimaten dagiti bituen.

⁸Awan timmulong kenkuana idi inyukradna ti tangatang wenno idi nagtalaytay kadagiti dalluyon ti taaw.

⁹Binilinna ti Oso ken ti Orion iti tangatang, ken ti Pleiades ken ti grupo dagiti bituen iti abagatan.

¹⁰Ditayo maawatan dagiti nakaskasdaaw nga aramidna; saan nga agpatingga dagiti milagrona.

¹¹Lumabas ti Dios, ngem diak makita.

¹²Alaenna ti kayatna, ket awan ti makalapped kenkuana; awan ti makaitured nga agkuna, “Ania ti ar-aramidem?”

¹³Saan a medmedan ti Dios ti pungtotna; pinarukmana dagiti katulongan ni Rahab iti babaenna.

¹⁴Ania ngarud ti masaok, Ania ti isungbatko iti Dios?

¹⁵Nupay awan basolko, awan maaramidko; idawdawatko laengen iti Dios a kaasiannak.

¹⁶Uray ikkannak iti gundaway nga agpalawag, saanak a mamati nga ipangagnak.

¹⁷Mangyeg iti bagio a mangbasnot kaniak, awan ti gapgapuna a sugatsugatennak.

¹⁸Pulos a saannak a paangsen; bin-ig a kinapait ti impaayna kaniak.

¹⁹Aramatek ti pigsa? Adda aya makaparmek kenkuana? Idarumko? Sinno ti makabael.

²⁰Awan basolko ket napudnoak, ngem iti panagsaok, kasla nakabasolak, ket amin a sawek kasla ukomendak.

²¹Awan basolko ngem awanen aniamanna kaniak; maumaakon nga agbibiag. Total, isu met la nga isu: nakabasoltayo man wenno saan, agpapadatayo a dadaelento ti Dios.

²³Agkatawa ti Dios no kellaat a matay ti awan basolna.

²⁴Inyawat ti Dios ti lubong kadagiti managdakdakes. Kinullaapanna ti mata dagiti amin nga ukom. No saan a ti Dios ti akin-aramid iti daytoy, siasino ngarud?

²⁵Napardas ti panaglabas dagiti aldawko; awan ti naimbag kadakuada, uray la koma no maysa.

²⁶Lumabas ti biagko a kas iti kapardasan a bangka, kas iti kapardas ti agila a mangsippayot iti tukmaanna.

²⁷No umisemak ket padasek a lipaten ti rigatko, agsubli met laeng a mangtuok kaniak dagiti ut-otko. Ammok nga ikeddeng ti Dios a nakabasolak.

²⁹Yantangay ta ibilang ti Dios a nakabasolak, apay pay laeng a maringgorannak?

³⁰Uray sabonak dagiti basolko, diak maikkat ida.

³¹Iti abut a narugit ti nangipurruakan ti Dios kaniak, ket uray dagiti pagan-anayko, karugitdak.

³²No tao la koma ti Dios, mabalinko a sungbatan; mabalinmi ti dumatag iti pangukoman tapno maibanag ti ririmi.

³³Ngem awan mamagkappia kadakami; awan ukom a mangrisut iti ringgormi.

³⁴O Dios! sardengannakon a dusaen! Yadayom kadin kaniak dagiti pammutbuteng!

³⁵Saanak nga agamak, agsaoak latta! Ngamin, ammok ti bukodko a karirikna.