Read Iloko Psalms 10 Bible Online

Psalms 10 - Iloko bible

Psalms 10

¹O Apo, apay nga adayoka unay kaniak? Iti tiempo ti riribuk, apay nga ilemmengannak?

²Napalangguad ti managdakdakes ket idadanesna ti marigrigat. Matnag koma iti palab-og nga inna impakat.

³Pagpangas ti managdakdakes ti dakes a tarigagayna; iti kinaagumna, agilunod ket laisenna ni Yahweh.

⁴Iti kinatangsitna kastoy ti kunkunana, “Awan ti Dios; saanak nga agsagaba!” Kastoy ti kanayon a pampanunotenna.

⁵Agballigi iti amin nga aramidna. Dina maawatan dagiti pangngeddeng ti Dios; laisenna dagiti kabusorna.

⁶Kunana iti bagina, “Diakto pulos maan-ano; diakto mariribuk uray inton kaano.”

⁷Pasig a lunod, ulbod, ken pammutbuteng ti sasawenna; makapaldaang ken nagubsang dagiti balikasna.

⁸Aglemmeng iti lugar nga awan matagtagitao; aguray sadiay a pumatay kadagiti awan basolna. Siimenna dagiti sanebenna nga awan gawayna.

⁹Aguray a kas leon iti paglemlemmenganna. Agpadpadaan sadiay iti napanglaw; ket ipanawna ti natiliw iti palab-ogna.

¹⁰Napasag ti tao, awan gawayna; naparmek iti inaayup a pigsa.

¹¹Kuna ti managdakdakes iti nakemna, “Ti Dios nanglipaten! Inlemmengna ti rupana kaniak!”

¹²Dusaem, O Apo, dagiti managdakdakes! O Dios, dimo liplipatan ti agsagsagaba.

¹³Apay, O Dios, nga umsiennaka ti managdakdakes ket kunana iti bagina, “Diakto lak-amen ti ipatayna a dusa”?

¹⁴Ngem saanka a nakakidem; makitam ti panagrigat ken panagsagaba ket sisasaganaka a mangted iti tulong. Kumamang kenka ti awan gawayna, ken tultulongam ti awan amana.

¹⁵Dadaelem ti pigsa dagiti dakes ken killo; dusaem ida gapu iti kinadakesda; agingga a saandan nga agaramid iti kasta.

¹⁶Ni Yahweh isu ti ari nga awan inggana; mapukawto dagiti agdaydayaw kadagiti didiosen iti dagana.

¹⁷Mangngegmo, O Apo, ti kararag dagiti nanumo; papigsaem ti pakinakemda.

¹⁸Ipangagmo ti asug dagiti maidadanes ken dagiti ulila, ket iti panangukommo, ipaaymo ti kalinteganda tapno ti tao saannan a butbutngen ti padana.