Read Iloko Psalms 103 Bible Online

Psalms 103 - Iloko bible

Psalms 103

¹Idaydayawmo ti Apo, O kararuak! Amin nga adda kaniak, idaydayawyo ti nasantoan a naganna.

²Amin a kaunggak idaydayawmo ti Apo; silalagipka koma iti kinamanangngaasina.

³Pakawanenna ti amin a basolko, paimbagenna ti amin a sakitko.

⁴Yadayonak iti patay ken bendisionannak iti asi ken ayat.

⁵Punnoenna ti biagko iti kinaimbagna tapno agtalinaedak nga agtutubo ken napigsa a kas iti agila.

⁶Ikalintegan ni Yahweh dagiti mailupitlupit; itdenna kadakuada ti kalinteganda.

⁷Impakaammona ken ni Moises dagiti panggepna; impakitana kadagiti Israelita dagiti naindaklan nga aramidna.

⁸Managayat ken manangngaasi ni Yahweh; saan a nalaka nga agpungtot, ket di agbalbaliw ti ayatna.

⁹Saan a kanayon a mangbabalaw, saan met nga agnanayon ti pungtotna.

¹⁰Saannatayo a dusaen kas mayannatup iti basoltayo. Saannatayo met balsen kas mayannurot iti labsingtayo.

¹¹Kas iti kalawa ti nagbaetan ti langit ken daga, kasta ti ayatna kadagiti agbuteng kenkuana.

¹²No kasano ti kaadayo ti laud manipud daya, kasta met ti kaadayo ti pangikabilanna kadagiti basbasoltayo.

¹³Kaasian ti ama kadagiti annakna; kasta ti panangngaasi ni Yahweh kadagiti agraem kenkuana.

¹⁴Ammona no ania ti nakaaramidantayo; malagipna a tapoktayo.

¹⁵Mayarig iti ruot ti biag ti tao. Kas iti sabong iti let-ang a dumakkel ken lumasbang.

¹⁶Dumteng ti angin ket mapukawen, awanton ti makakita, dinto agparangen.

¹⁷Ngem kadagiti agdayaw iti Apo agnanayon ti ayatna, awan patinggana. Kadagiti amin a kaputotan, agpaut ti kinaimbagna.

¹⁸Kasta met kadagiti mangtungpal iti tulagna, kadagiti napudno a mangannurot kadagiti bilbilinna.

¹⁹Impasdek ti Apo ti tronona sadi langit, ket isu ti ari ti amin.

²⁰Idaydayawyo ti Apo, dakayo a mannakabalin ken napipigsa nga anghelesna, dakayo a dumngeg ken agtulnog iti bilinna.

²¹Idaydayawyo ti Apo, dakayo a nailangitan a pannakabalin, dakay a babaonenna nga agtungpal iti pagayatanna.

²²Idaydayawyo ti Apo, dakayo amin a parsuana, iti amin a disso a pagturayanna. O kararuak, idaydayawmo ti Apo.