Read Iloko Psalms 104 Bible Online

Psalms 104 - Iloko bible

Psalms 104

¹O kararuak, idaydayawmo ti Apo. O Apo a Diosko, anian a tan-okmo! Dayaw ken daeg ti kawesmo;

²nabungonka iti lawag a kasla pagan-anay. Inukradmo dagiti langit a kasla tolda,

³ket impasdekmo ti bukodmo a palasio iti rabaw dagiti danum iti ngato. Aramatem dagiti ulep a kas lugan; dagiti payak ti angin ti pagsakayam.

⁴Aramatem dagiti angin a kas babaonem ken dagiti gumil-ayab nga apuy a kas adipen.

⁵Insaadmo a naimbag ti fondasion ti daga, ket pulos a dinto makuti ti pamuonna.

⁶Mangliwengliweng a taaw ti inyaplagmo a kagayna ket dagiti bambantay nalapunosda.

⁷Ngem idi nakapungtotka, dagiti danum nagtalawda; idi mangngegda ti bilinmo, dagus a pimmanawda.

⁸Nagayusda kadagiti bambantay ken tantanap; napanda iti disso nga inka insangrat.

⁹Nangikabilka iti beddeng a dida mabalin a lasaten tapno ti daga didan layusen.

¹⁰Pinartuatmo dagiti ubbog iti tantanap, ket nagayus ti danumda iti baet dagiti turod.

¹¹Ditoy ti paginuman dagiti ayup ti tay-ak; ditoy met ti pangep-epan iti wawda dagiti asno nga atap.

¹²Iti kakaykaywan iti arubayan agumok ken agkakanta dagiti tumatayab.

¹³Manipud langit, yegmo ti tudo kadagiti bantay, ket mapno ti daga iti pagimbagan.

¹⁴Pagtuboem dagiti ruot nga agpaay kadagiti animal, kasta met dagiti mula nga agserbi iti tao tapno mapataudda dagiti taraon iti daga.

¹⁵Agaramid iti arak a mangparagsak kenkuana, lana ti olibo a mangparaniag iti rupana agraman tinapay a mangted iti pigsana.

¹⁶Nabuslon a tudo ti agtinnag kadagiti sedro ti Libano— dagiti kayo nga immula ni Yahweh.

¹⁷Agumok sadiay dagiti tumatayab; agtaeng kadagiti saleng dagiti teggaak.

¹⁸Dagiti nangato a turod ti ayuyang dagiti kalding a balang. Dagiti kabatoan a disso ti kamang dagiti koneho.

¹⁹Inaramidmo ti bulan a mangibaga iti panagbaliw ti panawen; inaramidmo ti init, ammona ti inna ilelennek.

²⁰Pinarsuam ti rabii, ket iti sipnget rummuar dagiti narungsot nga animal.

²¹Agngernger dagiti urbon a leon bayat ti panaganupda agtaud iti Dios ti kanenda.

²²No sumingising ti init, agsublida, ket mapanda aginana kadagiti rukibda.

²³Ngem rummuar ti tao a mapan iti aramidna, ket iti sumipnget agsardengen iti panagtrabahona.

²⁴O Apo, di mabilang dagiti gapuanam, ket pinarnuaymo amin babaen iti siribmo; pinunnom ti daga kadagiti pinarsuam.

²⁵Adtoy ti mangliwengliweng a taaw a nalawa a taeng dagiti di mabilang a parsua, babassit man wenno dadakkelda.

²⁶Aglayag ditoy a taaw dagiti barko, ket agay-ayam ti Leviatan sadiay, dayta dragon ti taaw nga inaramidmo.

²⁷Amin a parsua agpannurayda kenka iti kasapulanda.

²⁸Itedmo ti taraon ket kanenda; ikkam ida ti makan ket mapnekda.

²⁹No ilingedmo ta rupam, agdanagda; no pasardengem ti angesda, matayda, ket agsublida iti tapok a nagtaudanda.

³⁰Ngem no ikkam ida iti anges, makaungarda, baro a biag ti itedmo iti daga.

³¹Agtalinaed koma nga agnanayon ti dayag ti Apo! Maragsakan koma ti Apo kadagiti inaramidna!

³²Agkintayeg ti daga no taldiapanna; umasuk dagiti turod no sagidenna.

³³Kantaak ti Apo iti unos ti panagbiagko; wen, no la ket adda angesko idaydayawko ti Diosko.

³⁴Maay-ayo koma iti kantak gapu ta isu ti mangparagsak kaniak.

³⁵Mapukaw koma dagiti managbasol ditoy daga; dagiti managdakdakes mamimpinsan koma a maikisapda. O kararuak, idaydayawmo ti Apo. Madaydayaw ti Apo.